Texts
Return to list | edit | delete | Create a new | history | Statistics | ? Help
Mehed L’udmila . Marfa-ämmö
Mehed L’udmila
Marfa-ämmö
Karelian Proper
New written karelian
Kešäiltana mieleh
muistu ämmö Marfa Mihailovna Bogdanova .Muisselmat etähäiseštä lapšuošta lämmitetäh šieluo .
Muissan , kuin kävimä kylyh .
– Läkkä , läkkä , kultani , kylyh ! Kyly kaikkina aikoina parenti kaikkie pahavointija .Lämmitä luut , kylvetä lujemmin – iho tulou veröväkši ta šiliekši .Pešumuila on paraš tukkie varoin .A šiitä elä laiskottele , huuhtele piä čiilahainivejellä – näin tukka tulou kaunehekši .
Myö kuuntelima ämmyö ta ruatoma niin , kuin hiän käški .
A kylyn jälkeh aina joima čäijyö .
– Čäijyttä en piäššä . Täššä on kuivattu malina , pane čäijyh , še on makieta ta tervehellistä .Ennein aina liäkiččeyvyttih heinillä .Još leikkauvuttih , pantih čiilahaista ta tukittih verenvuoto .A nuarmoih pantih tielehtie .Kylmyttä parennettih näin : savarittih malinaokšie ta lehtie , kuivattih malinamarjua ta vielä puolua ta karpaluo šurvottih šokerin ta kipätkän kera ta šuatih morššie .Maituo hauvottih kiukuašša ta kuumana juotih yökši , a šiitä kiivettih kiukualla ta huomenekšella oltih tervehinä .
– A-voi-voi , a nyt myrkytetäh iččie eri tablettiloilla .
– Ämmö , ennein vet ei ollun liäkärijä eikä aptekkija , voi i liäkinnäššä käytettih kaikkie .
– Pitäy tietyä heinie , kerätä ta parenteliutuo . Luonto tykkyäy meitä kaikkija ta liäkiččöy .– A-voi-voi , ihmiset laisettih , a mečäššä kaikki heinät ollah tervehelliset . Keryä , kuivua ta olet tervehenä .
Ämmön neuvot aina oltih helpot ta hyövylliset .
Myö Marfa-ämmön kera kävimä meččäh .Piti kerätä liäkeheinie , a še on kokonaini tietoala .
– Rautaheinällä voipi parentua joka huava , šano hiän miula ta näytti šuurie vihreitä lehtijä polun laijalla .
– Lešenlehti pelaštau ryvinnäštä . Mehiläiset tykätäh šitä kukkua – še enšimmäisenä alottau kukkie talven jälkeh ta ilahuttau ihmisieki .Kuisma auttau monešta tauvista .Še on oikein hyövyllini .Šitä pitäy kerätä kukinnan aikana , heinäkuušša .Kalganin juuri auttau ripulista , šaneli ämmö ta lisäsi :
– Pane kaikki muistih .
Mie iänettä aššuin ämmön peräššä .Kepillä šiirtelin okšie ta käpyjä polulta .Meččä oli täyši kaunehie iänie : okšat rapšattih jalkojen alla , linnut laulettih , lehet šahistih , a šiitä äkkie puušta tipahti käpy , tahi kivi lenti jalan lyönnistä , tahi tikka alko koputtua puun runkuo .Heinien ta puijen kummalliset tuokšut täyvennettih koko vartalo erikoisella voimalla .Himotti henkittyä tätä ilmua ta muistua näitä hajuja .
– Kačo jalkoješ alla , tiälä voit ni kiärmehie olla , opaštavašti pakasi ämmö .
– No , mie kačon , vaštasin .
Tulima meččäh ta alkoma leikata mussikan varšija eri vakkaseh .
– Mussikka on hyvä näkyö varoin šekä mikrobija vaštah . A varšiloista savarittu čäijy on oikein makie , šelitti ämmö ta jatko :
– A-voi-voi , suali , jotta tänä vuotena ei ollun hilluo , vet šen verholehet hyvin autetah ryvinnäštä .Kaikki heinät voijah meitä auttua , pitäy vain šuattua niitä käyttyä .
Konša myö myöštymä kotih , ni ämmö huolellisešti levitteli kaikki heinät kankahalla sarajašša tahi luati niistä kupoja ta riputti kuivamah varjošša .Talvella myö rikeneh joima čäijyö malinan , mussikan , viinimarjan lehtien kera .
Muissan , jotta ämmön keitetty ruoka niise oli tosi tavallini : potakkua , kalua , marjua , nakrista , šientä , kualie , marjapiiraita ta kalittoja pruasniekkoina .Suarittuo ei šyöty , kaikkie hauvottih kiukuašša čuhunnikoissa .
Rakaš Marfa-ämmö eli pitän elämän ta ruato vain hyvyä ihmisillä , šentäh jätti hyvän jälen omah kotišeutuh .Kotikyläläiset lämpimäšti muissetah häntä .
Marfa-ämmö
Karelian Proper
New written karelian
–
–