Texts
Return to list | edit | delete | Create a new | history | Statistics | ? Help
Толмачевская А.. Родное карельское. Двунадесятые праздники на карельскомъ нарѣчiи съ переводомъ на русскiй языкъ
Двунадесятые праздники на карельскомъ нарѣчiи съ переводомъ на русскiй языкъ
Толмачевская А.
Родное карельское. Двунадесятые праздники на карельскомъ нарѣчiи съ переводомъ на русскiй языкъ
Karelian Proper
Old written Tver
Bohročan
šyndymine .
Jakim’a i Anni oldih Davidan rovušta , i oldih , blahočestivoit .Ei eulun lašta , hyö userdno kumarreldih Jumalalla , štobi Hiän andois’ heilä h lašta ; i toivotettih , jesli Hospodi työndäy heilä lapšen , andua händä kirikköh Jumalalla sluužimah .Malitva hiän oli priimitty Jumalalla , i heilä šyndy tytär , kumbazella annettih nimen Mar’u .
Vejettih sv’atoida Bohroččua Mar’uo kirikköh .
Konža Mar’u oli kolme vuotta , roditel’at hänen tuodih kirikköh i šielä jätettih sluužie Hospodilla .Tytöt nämä elettih osobennoissa pertilöissä kirikön reunašša .Zakonua myöten kaikkieda , kumbazet posv’atittu Jumalalla pervosv’aščennikka priimi i blahoslovi kirikön oven luona , a konža tuodih Mar’un , niin pervosv’aščennikka , Jumalan šanua myöten , vedi händä sv’atoih šijah , kunne ičellä voičči käyvä vain yksičči vuuvešša .Ei maltannun iče , mintäh näin luadi , i diivuliečih ommalla tulennalla , i duumaičči , što pidäy olla šuuri oža toivotettu tytöllä Mar’ulla .
Blahoveščenie Presv’atoilla tytöllä .
Väliän jälgeh šidä , kuin Anheli vei viestin šuannan Iivanan Prettečan , Arhanheli Gavriil ožuttuačih Presv’atoilla Tytöllä Mar’ulla Nazaretašša .Hiän oli rovušta Duavidan , vain eli keyhäšti i obručittu oli Iosifalla šidä že roduo cuarin vain šidä myöten , štobi hiän imeičis’ händä vaš huolda pidäis’ , a ičellä hajušša oli jiähä Tytökši .Arhanheli šano Hänellä , što Hiän šuau Poijan , i andau hänellä nimen Iisus , i Hiän šanuočou Poijakši Ylimmäštä , i rubieu carstvuimah ijän .Mar’u priimi tämän vieron kera vagavaldi i zavedi vačašša , Duuhašta Sv’atoista .
Šyndyndä Hospodin .
Konža šyndy Hospodin , ših aigah mua Iudejan oli käzissä Riml’anoizilla .Rimašša carstvuičči Avgusta .Hiän käški luadie narodan kirjuttamizen .Žentäh Iosippa i Mar’u Nazaretašta tuldih oman muan linnah Viflejemah .Tiälä i šyndy Spuasu miiron Iisus Hristos , i pandu oli šoimeh , žentäh što oli äijä narodua linnašša , i ei voinun löydiä šijua kodiloissa .Šinä žе yönä Viflejeman paimenet oldih storažana omašša stuadašša .Jiäviečih Anheli i šano heilä , što šyndy Spuasu , Kumbane on Hristos , i löyvetäh hyö bladen’čan , venymäššä šoimešša .Niin i löyvettih Spuasun , kuin šano heilä Anheli , i enžimäzet kumarduačettih Hänellä .
Vaštuanda Hospodin .
Nellä kymmeneš päivän šyndynyöh bladen’ča Iisus oli tuodu kirikköh , kuin kirjutettu Moisejan zakonašša .Täh aigah eli Jerusalimašša Simana , mieš blahočestivii , kumbazella toivotettu oli Jumalašta , što hiän ei kuole , kuni ei niä Spuasuo .
Jumalan Duuhan neuvondua myöten Simana tuli kirikköh , otti käzih bladen’čan Iisusan i šano : tänä piänä laššet raban Šiun , Vladiko , Šiun šanondua myöten spokoino , žentäh nähtih miun šilmät spuasen’je Šiun .Yheššä Simanan kera Anni -proročica kiiti Jumalua i šaneli Spuasuh nähen kaikilla , ken vieron kera vuotti Händä .
Rissitändä Hospodin .
Konža Spuasulla oli kolme kymmendä vuotta , šilloin Hiän tuli Iordanalla Iivanan luoh rissitiäčemäh .Iivana šano Hänellä : "Miula pidäy Šiušta rissittiäčie , a ei Šiula miušta ".Iisusalla pidi rissittiäčie , a Iivanalla pidi rissittiä Händä , žentäh što oli niin käškietty Jumalašta .Iivana kuundeli Händä .Konža Iisus rissitiäčehyö h viidi veještä , Iivana nägi avaudun taivaš i Duuhan Jumalan , kuin gul’ust’a , heittiäčemäššä Iisusah , i kuuli iänen taivahašta : "Tämä on Poiga Miun , kummast’a Mie šuačen , i kumbazella Miun miilosti ".
Spuasun Preobraženie .
Niin kuin muokat Iisusan pöllätettih učenikoida Hänen , žentäh Hiän iellä kumbazilla heistä ožutti sluavan Oman žentäh , štobi lujendua Heidä vierošša häneh .Yksičči , konža Hiän kumardeli goralla , iho Hänen čirotti , kuin päiväne , i vuate Hänen luadiečen valgie , kuin lumi .Hänellä jäviečettih Moiso i Il’l’a , šiidä svietloi pilvi katto Hänen i kaikkieda , hänen kera Apostoloida , i kuulovane oli iäni Jumalan Tuaton : "Tämä on Poiga Miun šuattava , Šidä kuunnelgua ".Šiinä oldih Apostolat : Pedri , Juakko i Iivana .
Hospodin mänendä Jerusalimah .
Jälgeh elavutandua Luazarin Iisus Hristos mäni Jerusalimah , yhtä aigua myöten tullešta pruazniekan Äijän , rahvahašta otettih pal’movoit okšat , i viijittih Hänellä vaštah i ravistih : Spuasenii Davidan poijalla !Ožakaš mänijä Jumalan nimeh !A kumbazet levitettih omat vuattiet dorogua myöten .Iisus Hristos istuočih oslalla šelgäh , katettu vuattiella učenikoin .Niin oli šuuri Cuarin mänendä Jerusalimah .
Elavunun Hospodin .
Huomenekšella enžimäzen päivän Šuovatan jälgeh , kumbane nyt šanuočou Pyhäpäivä , kumbazet blahočestivoit naizet mändih Hospodin grobun luoh žentäh , štobi voidua hibie Hänen miirolla , midä ei kerritty luadie kätkiessä .Ših aigah Anheli kumai kiven , kumbazella katettu oli grobu Hospodin .Storožat pöläššyttih , kuin nähtih Anhelie , i hypättih pois’ .Miiron kandajat naizet nähtih grobu avattu i häneštä löyvettih vain riizut Hospodin .Anhelit ožuttuačettih heilä i šanottih , što Iisus , kumbane oli rasp’atittu rissiššä , eloi .Šiidä i Iče Elovuttu Hospodi ožuttuačih i miiron kandajilla , i Apostoloilla , i äijillä äijän kerdua .Fomalla , kumbane ei vierinnyn Hänen elondeh , Hospodi hänellä kuotella käški omat ruanat .Hiän ožuttuačih Apostoloilla nellä kymmendä päiviä , pagizi hein kera toista ilmua Jumalan ; toivotti heilä väliän tulomis’t’a Sv’atoida Duuhua ; käški heilä männä kaikkeh miiroh šanelomah Jevangelie kaikella narodalla da rissittiä heidä nimeh Tuaton , i Poijan , i Sv’atoin Duuhan .
Hospodin Taivahan Noužendu .
Ožuttuačih Apostoloilla nellä kymmenenä piänä Elondua Oman , Hospodi vedi heidä Jerusalimašta goralla Eleonskoilla , bluaslovi heidä i hiän šilmissä nouži taivahah .Šiidä ožuttuačettih , Anhelit šanottih heilä , što Hiän tuašen tulou taivahašta niin že , kuin nähtih Händä mänemäššä taivahah .
Tulomine Sv’atoida Duuhua .
Voznesen’jan jälgeh Apostolat myöštiäčettih Jerusalimah , oldih kaikin yheššä i kumarreldih Jumalalla , vuottuas’s’a tulomis’t’a Sv’atoida Duuhua .Viennen kymmenen päivänä Jumalan eloudumis’t’a huomnekšella keralla luadiečih šumu taivahašta , ka kuin šuurešta tuulešta ; i jogohizeh heistä šolahtih tulen kielet .I jälgeh šiidä Apostolat zavodittih paissa toizih kielilöih , kumbazie ei tietty iellä .Soberiečettih rahvaš i diivuidih tädä azieda .Žentäh Apostala Pedri zavodi propoveduimah niin väliän , što šinä že piänä rissitti počki kolme tuhattua mieštä .
Noštamine Hospodin ristie .
Jälgeh kuolendua Iisusan Hristosan ristikanžat tirpettih ves’ma äijän muukkua jazičnikoista .Žentäh risti , kumbazella Hiän oli rasp’atittu , veny muašša kolme šadua vuotta .Šillä šijua oli strojittu šuuri jazičnikoin kirikkö , i žentäh löydiä ylen trudno oli ristie .Jumalalla ugodno oli ožuttua čudesat .Grekan cuari yheššä voinašša nägi taivahašša ristie i häneššä kirjuttamine : "Tällä pobedit ".Hiän vieruičči vägeh ristie i želaičči löydiä Sv’atoi risti , kumbazella oli rasp’atittu Iče Hospodi Iisus Hristos , i työndi ših varoin omua muamuo Ol’onua Jerusalimah .Jälgeh šuurda ečindiä šai löydiä Ol’onalla šija , missä oli zavalittu Hospodin risti .Hiän käški roija kirikön , kumbane šeizo šillä šijua , i muašša löyvettih kolme ristie yhenmuos’t’a , i trudno oli tunnuštua , kumbazella heistä oli rasp’atittu Hristos .Oldih čudesat : kuin koššuttih Hospodin rissillä , niin elaudu kuolie , kummas’t’a šidä aigua kannettih kätkemäh .Šilloin šeizatettih rissin yläh , štobi nägyis’ rahvahalla , kumbazet käydih Hänellä kumardelomah .
Родное карельское. Двунадесятые праздники на карельскомъ нарѣчiи съ переводомъ на русскiй языкъ
Karelian Proper
Old written Tver