Texts
Return to list | edit | delete | Create a new | history | Statistics | ? Help
Gromova Ljudmila , Pavlova Olga. Tverinkarielazet ožallissuttih olimpiadah omalla kielellä
Gromova Ljudmila , Pavlova Olga
Tverinkarielazet ožallissuttih olimpiadah omalla kielellä
Karelian Proper
New written Tver
Tverinkarielazet
opaštujat ožallissuttih Federal’noih školanopaštujin olimpiadah omalla kielellä .
OLIMPIADAN OŽALLISTUJAT
Nelländenä piänä šulakuuda tverinkarielazet opaštujat vaštuačettih Tverissä Veniähen Federacijan Neuvoston eduštajanke L’udmila Nikolajevna Skakovskoinke .Hiän pidäy huolda pienin kielin Federal’noin školanopaštujin olimpiadašta , kumbane tänä vuodena oli nellännen kerran , i jo on luajittu 50 kielellä i murdehella .
L’udmila Nikolajevnan mieleštä kai tverinkarielazilla pidi ottua ožua täššä aziešša !
Tverinkarielakši Olimpiadan materialat 8.–9. kluassan tažalla oldih valmissettu šygyžyllä 2024 Tverin universitetašša .Kaikilla lapšilla , ket tietäh karielan kieldä , voičči kirjuttua olimpiadan zadanjat i työndiä internetan kautti .
L’udmila Nikolajevna kučču ne lapšet , kumbazet enžimäzinä ožallissuttih Federal’noih školanopaštujin olimpiadah tverinkarielan kielellä .Kaikkiedah heidä oli vain kolme : Stanislav Jemeljanov (Lihoslavl’a , 1. škola ), Nadežda Moisejeva (Piiteri , Puškina-linna , 406. gimnazija ), Veronika Rodionova (Piiteri , Puškina-linna , 335. škola ).
Pidäy šanuo , jotto nyt tverinkarielan kielellä on ves’ma heikko asema : kaikella Tverin alovehella opaššetah kieldä vain kahešša školašša – Kozlovalla (Spiirovan MO ) da Ol’oššovalla (Ruameškan MO ).
Stanislav Jemeljanov kuuli kieldä diedon pereheššä vanhašša karielan kyläššä Borušša , kumbane šeizou Medvedičan joven rannalla .Šinne hiän rigeneh ajelou , konža on hänelä joudavua aigua .Niin i rubei brihane maltamah da pagizemah diedon kielellä .Lihoslavl’an 1. školan johtaja Irina Vladimirovna Martinova kekši tämän azien i ehotti Stanislavalla tartuo olimpiadah .Tuloš oli hyvä , opaštuja šai diploman !
Moisejevan Nadeždalla i Rodionovan Veronikalla ollah tverinkarielazet juuret , vainka hyö eletäh Piiterin luona Puskina-linnašša .Tyttözet iče löyvettih tieduo Olimpiadah näh internetašta i rohkiečettih kirjuttua zadanjat .Hyö niinže šuadih diplomat .
L’udmila Skakovskaja lämbymäšti hyvitteli školanopaštujie , školanjohtajie da Olimpiadan materialoin varuštajie .Olimpiadan ožallistujilla hiän mieleheldi ando diplomat .L’udmila Nikolajevna toivou , jotto opaštujat ruvetah jatkamah oman kielen opaššundua , a heih kaččuos’s’a i toizet kiännytäh omah kieleh päin .
MATERIALAT OLIMPIADAH VAROIN
Tverin universitetašša jatkuvašti ruatah Veniähen vähäluguzin kanžoin kielin šäilyttämizekši .Karielan kielen da kul’turan kehittämizekši oldih valmissettu seminuarat "Opaššumma karielan kieldä " (2022), "Karielan kieli i kul’tura Tverin alovehella " (2024), kumbazissa otettih ožua tiedomiehet i opaštajat Tveristä i Karielan Tažavallašta .Tverinuniversitetta nygyaigana äijän ruadau yheššä Karielan opaššukšen kehittämizen institutanke Petroskoista .
Tverin universitetan prorektora Jelena Nikolajevna Vasiljeva jälgimäzellä seminuaralla ehotti luadie materialat Federal’noin školanopaštujin olimpiadah varoin tverinkarielakši .Tverinkarielazin kul’turnoin avtonomijan aktivistat Marina Jevgrafova , L’udmila Gromova , Ol’ga Pavlova otettih žen mielen ruavokši .
Moskun kielitiedon institutan nuorembi tiedomieš Ol’ga Pavlova lieni proektan koordinatorana .Hiän pidi yhtehyttä Luodehizen federal’noin Amosovan nimen universitetanke , kumbane ohjai Olimpiadua .Tverin universitetan dotsenta , karielan kielen opaštaja i opaššandakniigoin kirjuttaja L’udmila Gromova lieni proektan Metodičeskoin komissijan vanhembana .Hänenke yheššä varuššettih materialoida Olimpiadah varoin karielan kielen kursuloin opaštajat i opaššandakniigoin luadijat Julija Anatoljevna Jegorova i Irina Jurjevna Komissarova .
Myö uššomma , jotto Olimpiada andau vägie Tverin alovehen školilla ruveta enämmän opaštamah karielan kieldä .Lihoslavl’an školan johtaja Irina Martinova toivotti , jotto kohti tänä šygyžynä alottau kielen opaššannan .Tverin universitetan rektora Sergei Nikolajevič Smirnov vaštuači olimpiadaniekoinke i toivotti Tverin alovehen školilla universitetašta päin abuo karielan kielen opaštamizešša .
Tverinkarielazet ožallissuttih olimpiadah omalla kielellä
Karelian Proper
New written Tver