Texts
Return to list | edit | delete | Create a new | history | Statistics | ? Help
Natalja Antonova. Karjalaine veri vedäy
Natalja Antonova
Karjalaine veri vedäy
Livvi
New written Livvic
Kazahstanas eläi
Marina Bekmuhametova pidäy omua iččie puolekse karjalazennu .Azerbaidžanah miehele mennyh tyttäreh Dariga Naimanova ylbiesti sanou , ku hänes on nelläs vuitti karjalastu verdy .Inehmizet kezäkuun lopus Karjalas olles käydih omien piäle kalmužimale .
Tverinkarjalazien da livvinkarjalazien roduloin yhtyndy mennyön vuozisuan allun aigah libui sissäh , ku jälgipolves tuli musul’muanoin nastu .
Bol’šoje ploskoje – tverinkarjalazeh kyläh rodivunnuzien Kudr’avtsevien sizäreksien – Man’an , Pal’an da Ton’an – oza on olluh lähtie meijän puolele Karjalua .Man’a puutui miehele Vieljärven kyläh Mininan Paušile da jäi tänne "šäššättämäh " ihan kuolendassah .Juuri tverinkarjalazien luaduh šäššättäjänny händy mustellah nygöigi .Nuorin sizär Ton’a-podruuganke iškiettih kihlat da viuhkaldettihes muadu murdamah Kazahstanah .Sie löydi vastinehen – Bekmuhametovan Sagitan , kudai puolekse oli kazahu da puolekse tatuaru .Sagitan vahnembat ei oldu ruadi vierasverellizel neveskäl , ei blahoslovittu heidy menemäh yhteh .Ton’a lähti ruadoh Belomorskah , ga ei suurekse kodvakse .Mielespiettävy sanoi kovan sanan vahnembile da lähti händy iäres tuomah .Vahnembat lauhtuttih , parembua neveskiä heile jo ei olluh , karjalastu tyttyö piettih tyttärenny .Molodoit kazvatettih nelli lastu , eräs niilöis – Marina .
Marina sizärien , vellilöin , sevoittarienke joga keziä kerryttih Vieljärveh Man’a-t’outalluo .Kazahstanaspäi pidi ajua nelli yömbäristyö .T’outal da diädäl omua lastu ei olluh , kezäkse tuli arteli .Marina ei puuttunuh panemah t’outua muah , käyndy Vieljärveh keskustui enämbäkse kahtukymmendy vuottu .Hänes tuli naizien liägäri – ginekolougu .Nämmis leivis Marina oli enämbän nelliäkymmendy vuottu Pavlodaran linnas .
– Man’a-t’outa da Ton’a-muamo annettih tiediä omas ičes . Minä hyvin tunzin , ku pidäy lähtie Karjalah .Yhtenny piän minulluo ruadovastahotol tuli naine sugunimenke "Minina ", juuri hänen peräh tuli toine – nimenke "Antonina ".Heijän lähtiettyy minä nouzin istumas , menin ikkunalluo da kačahtimmos taivahah .Sie läikähtih päivän sugahaine dai kerras peityi .Nedälin peräs liput oldih jo ostetut .Matku tänne lykystyi .Kerras lövvyttih rahvas , ket ozutettih kus on muas Man’a-t’outa .Hänen susiedat otettih meidy tyttärenke vastah , piettih stolat , paginat .Minä uvvessah puutuin lapsestusaigah , itkusilmin kerdou Marina .
Hänen tyttäreh Dariga on balerina da modeli , eläy Bakuus .Häigi kaiken matkan itköy , hozi Karjalas on ezmästy kerdua .Azerbaidžanah tulduu häi tahtou kohti sanuo omale miehele , ku hänes nelläs vuitti on karjalastu verdy , kudamua tippaine – ga puutui heijän yhtehizeh Nail’a-tyttäreh .
Karjalaine veri vedäy
Livvi
New written Livvic