Texts
Return to list | edit | delete | Create a new | history | Statistics | ? Help
Irina Sotnikova. Taidehpirdajiden kaceg vepsän Änižröunaha
Irina Sotnikova
Taidehpirdajiden kaceg vepsän Änižröunaha
Veps
New written Veps
Šoutjärven
vepsläižes etnografižes muzejas avaitihe ozuteluz , sen nimi om "Toine sil’m .Kaceg Moskvaspäi , Piterišpäi da Petroskoišpäi vepsän Änižröunaha ".Ozutelusel om ezitadud taidehradod , miččed sünduiba vepsän mal jäl’gmäižes 30 vodes .Avtoroiden keskes oma tetabad taidehpirdajad : Vladimir Dragunskii , Sergei Komarov , Alina Lesova , Anatolii Ščerbakov , Boris Prokazov , Irina Peregorodina , Vladimir Zorin i toižed .
– Ezmäižed kuvad , miččil om kuvatud Šoutjärv’ da susedküläd , sünduiba vodel 1994. Niid tegiba venälaižed taidehpirdajad Vladimir Dragunskii i Jurii Baškircev , kudambad tuliba vepsän male ičeze üläopenikoidenke .Sikš ozutelusen avaidab Vladimir Dragunskijan kuva "Šoutjärv’ tal’vel ".Hän navedi tulda mijale joga vodenaigal , no kaik hänen kuvad om sidotud tal’venke .Sid’-žo om Sergei Komarovan rad i Alina Lesovan "Matvejan sel’g ".Moskvalaižiden taidehpirdajiden keskes oma Anatolii Ščerbakov i Boris Prokazov .Heiden kuviden abul voib putta Kalagehe i Himjogehe , – starinoičeb Natalja Anhimova .
Muloi Karjalan taidehmuzei todenzoiti eloho melentartuižen projektan "Joksmust vaste . Pohjoižvepsläižed ".Sen aigan karjalaižed taidehpirdajad tegiba kezaekspedicijoid Änižröunha pohjoižvepsläižidennoks .Necil ozutelusel voib nähta Vladimir i Viktoria Zorinoiden , Irina Peregorodinan , Natalja Košelevan , Vladimir Lobanovan i Georgii Ivanovan kuvid , miččed nügüd’ čomenzoitaba muzejan .Irina Peregorodinan kuval om čoma Vehkojan hram .
Sikš ku nece om taideh-literaturine ozuteluz , sil voib nähta i lugeda vepsläižid muštatišid , fol’klorad , vepsläižiden kirjutajiden da runoilijoiden prozad da runoid siš , miččid tundmusid jäti avtoroiden südäimihe vepsän röun .
– Mijale tuleba tedonhimoižed turistad , kudambad küzuba , midä völ voib kacta täs . Nadeimoiš , ozutelusel hö nägištaba vepsän man čomut , i heil sündub taht oleskelda neniš vepsläižiš tahoiš .A meile om tarbhašt nägištada , mittušt kaceged vepsän Änižröunaha jätaba taidehpirdajad Moskvaspäi , Piterišpäi da Petroskoišpäi , – sanub muzejan pämez’ Natalja Anhimova .
Ehtkat olda ozutelusel i sada ihastust vepsän röunan čomudes Ozuteluz radaškandeb voden 2026 uhokun lophusai .
Taidehpirdajiden kaceg vepsän Änižröunaha
Veps
New written Veps