Texts
Return to review | Return to list
LAUČČU
history
August 07, 2025 in 14:25 Нина Шибанова
- created the text
- created the text: Suuren linnan meččylaijas, Pitkän pihan yläagjas, Ylen korgien taloin piäs Lauččaine on seizomas. Mečikközes taloin rinnal Päčin kivet muan pinnal, Alužimet hapannuot, Puuloin alle painunnuot. Midäbo tiä oli enne, Kenen taloi, pereh kenen? Toinah kodi ammui paloi? Vaigo vanhuttugo kuadui? Tietäh – enne kylä oli, Tuli aigu – kylä kuoli. Jo niken ei nygöi tiä Musta sidä enämbiä. Eule mustuo, eule tieduo, Tuatat nuoret, kuoltih died’oit. Et nimidä pahua sano, Ethäi kätty vastah pane. Joga siäl, kezäl, talvel Laučču tyhjy seizou harvah. Lujat jallat, jämei laudu, Silei, lämmin, tilua täydyy. Pagizemah tänne ainos Tullah, kelle himoitannou. Ielleh eule dorogastu, Ielleh pimieh meččäh astuo. Linnan mölyy tiä ei kuulu, Ei ni vilu tuuli tunnu. Lämmin kohtu, hil’l’aine, Kui kyläs taloin pihaine. Unohtutah pahat mustot, Mennäh iäres huolet, tuskat, Nygöi kenbo nenga maltau Kaikkii ainos ottua vastah? Ei ni iče tietä vikse, Kiirehtetäh tänne mikse, Mindäh laučču linnan laijas Rodih rahvahale kallis.