Texts
Return to list | edit | delete | Create a new | history | Statistics | ? Help
Alina Gapejeva. Korbiselgy on kylä!
Alina Gapejeva
Korbiselgy on kylä!
Livvi
New written Livvic
Korbisellän kyliä
et lövvä muailman kartoil .Kyliä pietäh karjalazien endizenny eländykohtannu .Yhtelläh sie on vie eläjii – avvoisydämellizii , hyväntahtozii da rahmannoloi .
Ku lähtenet Korbesellän kyläh , roih sinul arbaitus – Kus se ollou ? Navigattoru ei auta .Priäžän piirin vahnu kylä menettih kylän stuatusan da sidä ruvettih sanomah ven’akse "territorija ". Moine abei sana .Tänäpäi se "territorija " kuuluu Jessoilan kyläkunnan Prokkoilan kyläh .Prokkoilan da Korbisellän välis on kolme kilometrii meččiä .
– Algiä ajakkua siiriči meijän kiännälmykses , se on Liettien da Prokkoilan välis , sellittäy meile dorogua Korbisellän eläi .
Löydiä tädä Korbisellän kiännälmysty enzikerras on jygei :se on kaidu , tuhjoloil kazvoitunnuh .Nimittumii tieviittehii tiel ei ole .Tie on moine kaidu , enimite talvel , ku vastakkai ajajat mašinat ei synnytä tiele .Yhten kilometrin piäs puut rounoku vältytäh tielpäi da matkailijan ies avavuu suarnalline kuva .Moine čomus , kai hengen salbuau .Korgevimal kohtal seizojes näet Korbisellän kui omal kämmenel : yksi piha vönyy lamminrandua pitkin , koit ollah segai , vahnal pogostal kazvetah igivahnat kuuzet .
Kelle da min hyvyös piätti yhtistiä kaksi kyliä , kudamat ollah loitton toine toizespäi ?
Haldivollis-alovehellizen jaguamizen luvettelon mugah , monet kylät , kudamien joukosgi Korbiselgy , hävitettih vuozinnu1993-1994 .Optimizatsii niyhty ei žiälöinnyh kylästy :täs nygöi eigo ole laukkoi , eigo feršalipunktua , eigo školua , eibo päivykodii .Tänne ei kävvä maršruuttuavtoubusat .Sih kaččomattah kyläs ymbäri vuvven eläy nelli perehty ,yhtes niilöis ollah lapset , dai erähil eläjil on ruaduo .
Uuzi elos .
Mennyön vuozisuan lopus Korbiselgy oli häviemizilleh .Ozakse , ei hävinnyh : omien ezi-ižien roindumuale ruvettih kiändymäh rahvas .
Vuvvennu 1992 Korbiselläle tuldih elämäh linnaspäi Sergei da Galina Šambinat .Heijän pasportois eländykohtannu on : "Prokkoilan kylä , territorija "Korbiselgy ", endine eländykohtu ".
– Kellebo oli tiel meijän kylä ? Kuibo voi nimittiä vahnua kyliä territorijakse ?Meijän tiešuaral ei ole ni viitehty , eigo kyläs ole pihan nimie , hämmästyy Galina Šambina ozuttajes omua pasportua .
Ezmäi Šambinat ruvettih fermeroikse : ostettih traktoran , piettih žiivattoi , kazvatettih ouveššiloi .Nygöi mollembat ollah eläkkehel .Aijan aloh hyö kunnostettih omua kodii , nygöi sie ollah viet da kanalizatsiet .Päivät terväh hušketah : lumet pidäy suomie , murgin keittiä , lämmittiä päčit .
– Aiven tahtoin eliä kyläs : vavot , meččy , puhtas ilmu . Died’oi ongiruavat on pannuh kundoh – voibi ongittua .A linnas midäbo ?Nouzet viijendeh kerrokseh da istut kovas rouno .Kiändyö Petroskoih emmo rubie ,midäbo sie ruadua ?sanou emändy .
– Kuibo elättö laukoittah ?
– Meijän eläkehmaksoloinke laukkoih parembi olla käymättäh . Se šuutkakse sanon , tiettäväine .Meil kaikkie on kylläl , a ku pidänöy midätahto , kerran nedälis ajan tyttärenke Jessoilan laukkoih .
Yhtes Sergein da Galinanke eletäh heijän An’a-tytär da bunukat .Hyö mutettihes Korbiselläle ei ammui .
Anna ruadau magieloinvalmistajannu Jessoilan sel’pos .Ruadoh ajelou omal mašinal ,yhtel tiel vedäy lapsii Jessoilan školah da päivykodih .L’on’a opastuu nelländes kluasas , viizivuodine Polina kävyy päivykodih .Vahnembal tyttärel on 23 vuottu , häi eläy linnas .
Kyläs eläjes ruaduo ainos löydyy .Annal paiči kodihommii on vie mieliruado .Häi pajattau L’ubava-ansamblis , kudai ruadau Jessoilan etnokeskuksen tyves .Erähil kylis on igävy eliä , toizil igävöičendoih aigua ei ole : kai rippuu ristikanzas .
Kuz’mič .
Šambinoin syöndypertin ikkunas kylä nägyy hyvin .Suuren lumenpanon jälles kylän ainavo uuličču uppoi lumeh .Nägyy , loitton kenlienne ravieh suomiu lundu .Se on Vladimir Kuz’mič Amosov .Omamualazet sanotah miesty muite Kuz’mičakse .Häi tuli elämäh Korbiselläle oman akanke 1990-vuozil .Mies vastai gostii hyväl mielel .
– Lapsusaijas minunigäzet kučuttih minuu Timohpielan Vovakse .. Enne oldih huutorat ,a sit net yhtistettih da rodih yksi Korbiselgy .Huutoroin erähis kodilois vie aluskivet jiädih , sanelou Kuz’mič .
Omamualazet pietäh Kuz’mičua erinomazennu .Rahvahan mieles mies ei kieldävy :
– Minun buabo Jevdokija Kondratjevna oli kuulužannu heinil parandajannu , eli Mikkilis .Rahvas händy tundiettih , häi piästi ristittyzii eri taudilois .Konzu buabo oli kuolemas , häi andoi minule kai omat tiijot heinih nähte da vie yhten neron – minä näen ristikanzan hengellizet da fiizizet kivut , sellitti Vladimir .Enne suamah abuu paikallizeh parandajah käydih omat da vierahat rahvas .Mies avvutti kaikile ,nygöihäi jo ei paranda .Häi saneli oman piettomielen : ristikanzat , kudamat suututtih hänen piäle , puututtih hädäh .
Tottu sanuo , Kuz’mič on ystävälline , pagizii da rahmannoi mies .Kylän vahnimannu olles häi tuttavutti gostii Korbiselgäh .Kyläs yhtes agjaspäi toizeh piäzet viijes minuutas .Lyhyöl ekskursiel häi saneli kylän eläjis , musteli endisty aigua .Enimite Kuz’mič ylbeilöy omua järvie :
– Vezi meijän järves on vilu kezälgi . Sit on äijy silmykaivuo .Järveh ei virdua ni yhty ojua , a järvespäi virduau yksi ojaine .
Korbiselgy on kylä!
Livvi
New written Livvic