Texts
Return to list | edit | delete | Create a new | history | Statistics | ? Help
Uljana Tikkanen. Festivalista jokahini löysi miellyttävyä
Uljana Tikkanen
Festivalista jokahini löysi miellyttävyä
Karelian Proper
New written karelian
Tykkyätkö šie
kaččuo , kuin kala leikkiy vejen pinnalla ta šiitä vejellä tulou ympyröjä , tahi kuin airolta vesi tippuu ?
Vienankarjalaisen elämyä ei šua kuvitella ilman kalua .Nyt kalaššukšeh on helppo käyvä .Kaupašta voit oštua mitä vain tahot kalan šuamisekši .A mitein ennein ?
Festivalin luaja ohjelma
Vienaetnokulttuurikeškukšen johtaja Julija Filippova yheššä Venehjärven kylän isännän Šanteri Lesosen kera piätettih pityä festivali ta kertuo tarkemmin , mitein kalaššukšeh valmistauvuttih ta käytih ennein .
Festivalin pitämistä varoin oli kirjutettu projekti ta še voitti Pohjosen hyvyš fondin granttien kilpailušša "Alovehien luova ruato " ta šai Severstal’yhtijön kannatušta .Lyhyöššä ajašša onnistu valmistua ohjelma ta kaikki , mitä šitä varoin tarvičči , löytyä volont’orija , kuččuo muasterija ta artistoja .
– Ympyrät vejellä nimen kekši Šanteri Lesonen . Vielä ne ympyrät muissutetah meilä ihmisen elämyä .Kun ihmini šyntyy – še on alkupisteh , šiitä tulou hänen pereh , še on šuurempi ympyrä , a koko šuku on šuurin ympyrä .Šentäh festivalissa lisäkši oli kerrottu , mintäh on tärkietä tutkie omua šukuo .Šiitä vaštasi Tatjana Tupina , kumpani harraštau šukututkimušta , šelitti festivalin järještäjä Julija Filippova .
Festivalin ohjelma oli juattu kolmeh ošah : muasteri-oppiloissa käymini , päivällini ta konserttitanššiloineh .
– Festivalin deviisinä oli "Joka nurkašša löyvät mukavua ", šentäh ni kaikki muasteriopit piettih nurkissa : venehnurkka , verkkonurkka , käprynurkka , šukunurkka , ta šemmoista nurkkua oli kymmenen . Jokahisešša niistä oli muasteri , keltä šai tiijuštua "nurkan " teemašta , ta vehkehie , mitä šai kačella .Vierahilla oli kartta ta joka paikašša hiän šai merkin käynnistä .Ken keräsi kaikki merkit šai pienen lahjan , kerto festivalin järještäjä Anna Martinkijan .
Konsertti ta kruuka
Festivalih tuli yli 200 henkie Karjalan eri paikoista , Piiteristä , Moskovašta , Tveristä ta vielä muista Venäjän kaupunkiloista .Kaikilla riitti makieta vereštä uuhhua , mih oli pantu Venehjärven ahventa ta mujehta šekä vähäsen ruškieta kalua – lohta .Piiraita niise oli riittäväšti .A jotta čäijyö riittäis kaikilla – projektin rajoissa oššettih 30litrani samovuara .Mieli juottua kaikki vierahat riittäväšti šitä pantih kiehuman kolme kertua .
Čäijyn jälkeh časoun’an ieššä alko konsertti .Šiinä esiinnyttih Kataja -, Viena - ta Hete ryhmät Vuokkiniemeštä ta Koštamukšešta .Enšimmäistä kertua pruasniekkah oli kučuttu Si Ma ryhmä Petroskoista .Kolme neičyttä laulau pohjoni etnofolktyylissä omie lauluja , ne annettih kuuntelijilla äijän rauhua .
Artistojen ryhmät vajehettih toini toista ta niijen numerojen välissä jokahini halukaš šai esittyä omua lauluo .Näin ohjelmah piäsi Maksim Kozlov , kumpani heliellä iänellä laulo venäläistä lauluo .
Monet laulut karjalan kielellä ollah tutut kaikilla ta ohjelman lopušša Helky kannel lauluo laulettih yheššä Kataja -, Viena - ta Hete-ryhmät šekä kaččojat , kumpaset niise tiijetäh lempilaulujen šanoja .A laulujen jälkeh alettih tanššit .On mukava , jotta festivali piettih Kanšainvälisenä kantakanšojen päivänä ta perintehen mukah šinä päivänä pietäh Kruuka-aktijuo .Näin Kruukua piettih Veneh-järveššäki , šen vetäjäkši tuli kunnivoitetuin ihmini – kylän isäntä Šanteri Lesonen .
– Lisyän , jotta pruasniekka tuli oikein miellyttäväkši ta mie niän , jotta vierahillaki on mukava . Konša ativot käyväh kentillä , hyö tiijuššetah äijän mukavua perintehistä .On iloista , jotta niin äijä eriikäistä vierašta tuli ta kaikki on järješšetty hyvin .On kellä jatkua perintehie , korošti Aleksandr Lesonen .
Jäi vain lisätä , jotta šinä päivänä šiä niise oli ihana festivalin viettämistä varoin – ei ollun liijan äkie , ka šopivašti lämmin .Festivalin vierahat kiitettih järještäjie pruasniekašta ta toivottih šillä jatkuo enši vuotena .
Festivalista jokahini löysi miellyttävyä
Karelian Proper
New written karelian