Texts
Return to review | Return to list
Kaikin yheššä voittuo kohti
history
August 20, 2025 in 13:00 Нина Шибанова
- created the text
- created the text: Jo puoli vuotta Kalevalašša toimiu Vera-volont’oriliikeh. Liiton nimi simvolisoiččou uškuo yhtevyöh, meijän Venäjäh ta meijän armeijah. Erikoisen šotaoperatijon alušta Kalevalan eläjät voimien mukah autettih rintamua. Še on ainani ruato, ka valitettavašti ennein ei ollun yhtä keškušta, kumpani ois šovitellun kaikkien volont’orien toimintua. Tavallisešti kalevalalaiset kiännyttih Kalevalatalo-etnokulttuurikeškukšen puoleh ta tuotih meijän šotilahilla tarvittavie tavaroja, juhlalahjoja. Šiitä laitokšešta monta kertua lähetettih humanitarista apuo. Tuli šelväkši, jotta Kalevala tarviččou volont’orikeškušta, kumpani yhistäis kaikkie eläjie, ketä huoliu muan kohtalo. Etnokulttuurikeškukšen johtajan Nadežda Vasiljevan voimakkahan luonnon anšijošta piirin hallinto anto volont’oriloilla tyhjän rakennukšen, mih lähettih volont’orit. Hyö iče šiivottih huonehie, kunnoššettih niitä. Huoleštunuot ihmiset annettih stolie, stuulie ta toisie tarvittavie laittehie. Paikallini yrittäjä Aleksandr Jer’omin valmisti konehie maskirointiverkkojen kutomista varoin. Muasteri Aleksandr Kukelev luati toisen konehen, kumpasen avulla voipi leikata kankašta. Lyhyöšti šanuon ruato alko kiehuo. Kalevalan volont’orit ollah eri-ikäset, heilä on eri ammattija. Piäasiešša hyö ollah eläkeläiset. Esimerkiksi, Tatjana Loboda on entini liäkäri. Jelena Kukeleva ruato rakentajana, Jelena Tuomi – yhteyšhenkilönä. Tatjana T’uleneva ta Natalja Paršina oltih opaštajina, a Zinaida Filippova – kirjanpitäjänä. Ijäkkähin volont’ori Tamara Grakova on täyttän 86 vuotta. Hiän aina ruatau Vera-liikkeheššä, taitajašti tikuttau maskirointipiäkappalehie. Naisen huolehtijat kiät on jo tikutettu muutomie kymmenie lämpimie šukkaparija rintaman šotilahilla. Joka päivä Kalevalan volont’orit kiirehitäh keškukšeh, missä voipi tavata ta keškuššella. Naiset tullah šiih: erähät kuvotah maskirointiverkkoja, toiset – piäkappalehie, kolmannet valmissetah purkkija ta katetah ampumahautatuohukšie parafiinilla. Ruatuo löytyy jokahisella, ta šen aikana naiset kerrotah uutisisista, omašta elämäštä. Šyntyy lämmin ta kojikaš ilmapiiri, mih himottau tulla uuvveštah. “Vera” toimiu Karjalan 10.^ aloveh -volont’oriliikkehen šuojašša. Še auttau ta antau materialija tarvittavien tavarojen valmistamista varoin. Šamoin šiih ošallissutah paikalliset apulaiset. Paikallisen kasnanhoitotoimiston ošašton, šisäaseijen ošašton ta Kalevalan piirin kuluttajašeuran ruatajat monta kertua annettih korvuamatointa apuo. Šamoin volont’orija kannatetah huoleštunuot paikallisen eläjät. Täh aikah Kalevalan volont’orit on työnnetty rintamalla 32 maskirointiverkkuo, 80 maskirointipiäkappalehta, noin 500 turvallisušrannehrenkašta ta kymmenie ampumahautatuohukšie. Kalevalan naisilla ruato jatkuu. Hyö tiijetäh, jotta še ei mäne tyhjäh. Šamoin hyö oikein iloššutah, konša šuahah rintamalta hyvie viestijä, kumpasissa heijän muanmiehet kiitetäh heitä maskirointiverkoista ta toisista tarvittavista tavaroista, kumpaset autetah lähentyä Voittuo.