Texts
Return to review | Return to list
Vepsläine spektakl’ ozutadihe Krimas
history
August 20, 2025 in 16:27 Нина Шибанова
- created the text
- created the text: 1.–3.^ elokud Krimas mäni “Tavrida.ART” -norišton taidehfestival’. “Tavrida.ART” om üks’ kaikid popul’arižembiš Venäman kezafestivališpäi. Nece om sija, kus keradasoiš nored arhitektorad, kirjutajad, puvestajad, dizainerad, muzikmehed, taidehkuvadajad, teatrohjandajad. Sädainorišt vajehtase mahtištol da diskutiruib uziš ühthižiš projektoiš. Täl vodel festivalin programmas om ühesa teatrozutust erazvuiččiš Venäman agjoišpäi. Festivalihe ühtni Karjalan-ki Rahvahaline teatr “Vepsläine neižne” -spektakl’anke. “Vepsläine neižne” om monospektakl’, mitte oli pandud scenale vodel 2023 Karjalan da vepsän kirjutezkelenpäiväks. Spektakl’an ohjandai da artist om Aleksandra Aniskina. Spektakl’ starinoičeb Sovetskijan Sojuzan Gerojas, vepsläižes neiččes Anna Lisicinas. – Nece oli s’urpriz minun täht, konz teatraha tuli kirjeinesiš, miše “Vepsläine neižne”-spektakl’ kuctas “Tavridale”. Olin ihastusiš, ved’ sinna tuleb äi Venäman teatroid. Meiden spektakl’an täht nece oli ezmäine ajeluz, kacmata ozutandoid Änižröunas, – sanui Aleksandra. Muga tegihe, miše “Vepsläine neižne” -spektakl’, mitte starinoičeb Sovetskijan Sojuzan Gerojas Anna Lisicinas, mäni hänen surmpäivän – 3.^ elokud. Aleksandra Aniskina sanub, miše ozutuz oli ani erižen, ved’ sigälaižed kacujad ei tednugoi noren neiččen Anna Lisicinan istorijad. – Spektakl’ mäni lujas hüvin! Om äi čomid arvostelusid kacujilpäi. Mindai ihastoiti se azj, miše harjoitelusen aigan minunnoks tuli festivalin prod’user da sanui, miše hän kacui äi spektaklid, no valiči niiden keskes meiden, – ližazi Aleksandra. Artistan sanoiden mödhe, spektakl’an ozutandan jäl’ghe kacujad libuiba ičeze sijoilpäi da aplodiruiba seišti, a nece znamoičeb, miše vepsläižen neiččen istorii koski heiden südäimid.