Texts
Return to review | Return to list
Čoma jubilei: Jurii Mugačevale – 90!
history
August 20, 2025 in 16:59 Нина Шибанова
- created the text
- created the text: Elokun 24.^ päiväl ičeze jubilejad praznuičeb “Vepsän kul’tursebran” ühtnik, aktivine Šokšun eläi Jurii Mihailovič Mugačev. Jurii Mihailovič om sündunu Änižröunan Šokš-küläs. Mamal Anna Sem’onovnal i tatal Mihail Petrovičal oli koume last. Jurii Mihailovič oli vanhemban poigan perehes, a kaks’ sizart – Ton’a i Val’a – oliba norembad. Tatad ottihe voinale. Anna Sem’onovnad lapsidenke vanhembad kucuiba elämaha ičezennoks. Tatoi ei pördnus kodihe – händast riktihe voinal. Baboi da dedoi abutiba kazvatada vunukoid. Laps’aigaspäi hö openziba lapsid tehmaha erazvuiččid radoid, abutamha vanhembile. Muga mäni Jurijan laps’aig da školvoded. Konz Jurii kazvoi, hän läksi kiviradtahoze Kvarcitnii-külähä. Šokšus hän vastsi ičeze tulijad akad – Tamara Timofejevnad. Händast oigetihe tänna radole feršalan. Hö eliba armastuses da kožmuses enamba 60 vot. Heil oma sündnuded kaks’ poigad – Mihail da Leonid. Nügüd’ Jurii Mihailovač om dedoi da eskai pradedoi: hänel om koume vunukad. A möhemba – pradedoikš-ki. Konz lapsed tegihe vanhembikš, Mugačevoiden pereh päti lähtta elämaha lidnaha – Petroskoihe. Pensijahasai Jurii Mugačev radoi kranal da elektrikan. Hänen ak radoi poliklinikas № 3. Eskai elädes lidnas Jurii Mihailovič nikonz ei unohtand ičeze kodimad – Šokšud. Kaikuččen kezan hän tuleskeleb külähä, kosketase eläjidenke. Vepsläižidenke pagižeb vaiše vepsäks. Äi vot tagaze Šokšus Jurii Mugačev ühtes Jevgenii Markovanke sädi “Keradam i kaičem” -fol’klorgruppan. Hö pajatiba pajoid vepsän kelel, tekstoid keraziba rauhil ristituil. Konz keza-aig lopihe, Jurii Mihailovič pördihe lidnaha. Äi vot Jurii Mihailovič oli “Randaine”-fol’klorgruppan ohjandajan. Hän om aktivine “Vepsän kul’tursebran” ühtnik. Joga voden hän kirjutab diktantad vepsän kelel, kaikuččen nedalin kävub “Vepsläižed besedad” -paginklubha. Joga voden ühtneb “Pühä päiväine” -praznikaha Šokšus. Hän hüvin vändab bajanal da kantelel, stringkartaižel, navedib pajatada. Tedab äi pajoid vepsän kelel, iče kirjutab muzikad da tekstoid. Jurii Mugačev om hüväsüdäimeline, adivoičetai, lujas tark ristit, kaiken om vaumiž tulda abuhu. Hän äjan tegeb, miše vepsän rahvahan kel’ da tradicijad eläižiba. Toivotam hänele vahvad tervhut, hengen rehedut, lapsiden da vunukoiden armastust. Ole mugoižen-žo aktivižen, elonnavedijan ristitun!