Texts
Return to list | edit | delete | Create a new | history | Statistics | ? Help
Nina Zaiceva. Sit' - sarnaline jogi
Nina Zaiceva
Sit' - sarnaline jogi
Veps
New written Veps
Kaks’
časud ištui Vas’ka Hanh’ kirjutades kirješt Šumilinan Tan’aižele – nece oli ezmäine hänen elos kirjeine .Midä kirjutada , siš hän meleti völ radon aigan , no konz ehtlongin jäl’ghe ištuihe kirjutamha , kaik sanad lendliba päspäi , vai oliba , hänen melen mödhe , mugoižed tarbhatomad ...Hän tahtoi kirjutada , kut hän palahtelihe , konz tedišti , miše Tan’aine ajoi lidnha , kut hänele oli žal’ , miše hän abidi Tan’ašt jäl’gmäižen kerdan , konz brigadir hödhüvin rikoi Kaizeran .Hän tahtoi bumagale panda nenid rižoid , miččid oli hänen südäimes .Päs nece oli kaik čomin , a konz oli pandud bumagale , läksi ani toine .Lopuks kirjeine oli vaumiž :
"Tervhen , Tan’aine !
Minei om ani žal’ , miše sinä ajoid lidnaha .Minä nügüd’ mugažo radan – kohendam kombainad ühtes Ivan Prokatovanke .Pigai tuleb rahnmine .Minei om ani žal’ , miše minä kidastin sinun päle siloi . Prosti mindai .Kut nece om tehnus , iče-ki en teda .Pühäpäivän olim Sit’-jogel : minä , Sergei , Tol’ka , Vit’ka .Kalad saim vähän , da völ ken-se möst rebiti verkon .Vit’ka sanub , miše nece ei ole haug’ , a ken om , em tekoi .Sinä johtuid minei sigä mel’he .Minä kävelin sen pedajannoks , kus sinä seižuid .Ala meleta , miše minä unohtin kaiken .Minä muštan kaiken .Völ prosti mindai , miše minä kaiken aigan johtutan sinei necidä L’oškad .Enambad en johtuta nikonz , sikš ku minä sindai a ...
Varastan vastust .
Gusevan Vas’aine ."
Hän saupsi kirjeižen , peitten mamalpäi läksi i pani kirjeižen počtjaščikaha .Homen kirjeine linneb jo lidnas .A homnenjäl’ghe Tan’aine sab kirjeižen .Se znamoičeb , miše vastuz voib tulda sobatan .
Sanudes Tan’aižele ičeze armastuses , olgha nece sana oli anttud-ki vaiše ühtel kirjamel kirjeižes , hän meleti , miše nügüd’ hänen elo om sidotud Tan’aižen elonke kaikeks igäks .Hän , voib olda , ei kirjuta-ki hänele , nece linneb hänen täht ani karged , no nece jo nimidä ei vajehta hänen , Hanhen , elos .Hän kaiken-se meletaškandeb Tan’aižes ...
Sobatan rad sirdihe ani hondoin .Vas’ka segoiti gaikoid i avadimid , kumarzi vädran benzinanke , kus oli pandud henoid detalid .Sen ližaks hän kaiken aigan küzeli Ivanal , äjak aigad om .
– Midä sinei tämbei tegihe ? Rigehtid-ik kuna-se ? Vai keda-se varastad ? – küzui Prokatov .
– Ka ei , muite midä-se ... – sanui Vas’ka .
– Ku tarbiž kuna-se mända , ka mäne . Ved’ minä-ki , konz tarbiž , kävelen ičeiž azjoid .
– Ei , ei tarbiž nikuna !
Vas’ka pöl’gästui , miše Ivan kaiken el’gendab .Päilongile läksiba čas päiväd .Vas’ka joksten tuli kodihe .Verajas oli lukkol .Nece om hüvä , ika Tan’aižen kirjeine voiži putta maman käzihe .Nügüd’ se , tedan , om verajan taga .Počtradnik pästi sen piluižehe verajan päl .
Vas’ka avaiži verajan , kacui kaiktäna tarkas ,no kirješt nikus ei olend .
"Voib olda , mama kodiš oli jo ... – vil’skahti päs , i hän rigol tuli pert’he . Stolal kirješt ei olend , iknoil mugažo .Hän kacuhti eskai škapas , zirklon taga , kus oli äi erazvuiččid bumagoid .
"A ku mama vei kirjeižen , miše lugeda sidä nitul akoidenke ". – Neciš melespäi eskai higoho taci . "Ei , necidä ei voi olda ". Hänen muštho tuli , kut žal’ mamale oli , konz Tan’aine tahtoi prostidas Vas’kanke , a händast ei olend kodiš .Ei , mamoi ei voind tehta muga pahoin .Voib olda , počtradnik ei tond völ kirješt .Sid’ hänele tuli mel’he , kut hän iče kirjuti kirješt kaks’ ehtad .Tedan , vastuz tuleb homen .
No pühäpäivän-ki kirješt ei olend .Ka toižel nedalil-ki se ei tulend .Vaiše sid’ Vas’kale iški pähä – kirješt ei linne .Tan’aine abidihe hänen päle igäks .Hän ajoi lidnha , miše unohtada händast , Vas’kad .Ka olgha !Vas’ka kaiken-se meletab hänes i ei unohta .Necišpäi Tan’aine ei voi kel’ta .
Sil aigal zavodihe jo rahnmine .Sä-ki hüvä oli , kuiv i päipaštokaz .Homendesel , vaiše kuivab kaste , Prokatovan kombain om jo pöudos .Mašinan judu , räk , äi holid – kaik nece oli uz’ , ka eskai päiväl ei olend aigad-ki meletada ni-miš , vaiše rados .
Tan’aižes , siš , miše kirješt muga ei olend-ki , hänele tuleskeli mel’he vaiše ehtal , ehtlongin aigan .No konz hänen pä oli pölusel , hän jo magazi ,a homendesel – uded radholed .Erašti eskai söda pidi pöudos .Ezmäižen paukan-ki hän sai kombainanno .Koumekümne seičeme rublad !Nece oli mugoine ogibal summa Vas’kan mödhe , ka hän ei tedand , kuna panda nene dengad , miččid hänel nikonz ei olend .Voiži ostta oružj , pit’käd sapkad , vedenaluine snar’aženii .No necidä kaiked heiden laukas ei olend .Hän päti dengad kaičemha oružjan täht .
Prokatov hänele sanui :
– Osta ičeleiž kost’um !Oled jo sur’ , pigai tancuile lähted ...Ei voi kost’umata .
Vas’ka ei sanund neche nimidä .Ka i min täht hänele nece kost’um , ku Tan’ašt ei ole , hän eskai kirjutada kirješt hänele ei tahtoi
Sit' - sarnaline jogi
Veps
New written Veps
"
–
Anatolii Petuhov
Сить - таинственная река
Russian
"