Texts
Return to list | edit | delete | Create a new | history | Statistics | ? Help
Marjumaido – tervehyökse da hyväkse mielekse
Marjumaido – tervehyökse da hyväkse mielekse
Livvi
New written Livvic
Mustan
, konzu olin lapsennu , buabo ainos andoi minule marjua maijon kel .
Kaikis enimäl minä suvaičin vagoidu da must’oidu maijon kel .Marjah käimmö buaban kel kahtei , emmogo varannuh kondiedu , emmogo maduo .Vagoižikkuo Heččulas ymbäri oli sih aigah menetiijämi , must’oidugi loitomba kyläs sai kerätä .Huondekses lähtimmö , kuni ei ole räkki da syöjät ei muga tungevuta rožih .Murginakse jo kois olimmo .
Marjat sellitämmö , juodaizeh panemmo , maiduo kuammo da vai mummuommo-syömmö .
Karjalazet tiettih , ku maido da marju hyvin yhteh sovitah .Marjas on vitamiinua , maijos – kal’tsiedu .Nygözet dijetolougat sanotah , ku maiduo vältämättäh pidäy juvva-syvvä , ku hambahat , kynnet , tukat da luut oldas lujat .Marjumaijos ristikanzu suau vitamiinua da minerualua , kuduat hyvin vaikutetah kogo rungan tervehyöh .
Dijetolougat nevvotah , ku marjua pidäy ottua saman verran kui maiduo – yksi yhtekse .Voibi marjua ottua kahteh kerdah enämbi maidoloi .Vai ei pie ližätä zuaharipeskuu .Liäkärilöin sanoin mugah marjumaido on hyvä huondesvero dai ildaizekse syvvä .
Vagoi on hyvä verenvähytty parandajes , se nostau gemoglobinan .Paiči sidä se alendau verenpainon da kebjendäy hermotaudiloi .Vagois olijat fitontsidat ollah hyvät sienivoimattomuksii vastah .
Must’oi eistäy vahnuttu , sendäh ku sit marjas on antotsianua .Must’oi on hyvä silmile da mustole , aivoloile da šuolistole .Must’ois on C , K da B-joukon vitamiinua , sego kremniedu , margantsua da raudua .
Maido on hyvä niilöile , kel uni ei tule libo piädy kivistäy , kel on syväimenkačkeroitus .
A mittuzet magiet ollah vagoi - da must’oivaren’nat muite syvvä dai leivän piäle panna .Mittuine duuhu oli pertis , konzu niilöi keitettih halgoplital .Kui hyvä oli voidua Jessoilas pastetun valgien leivän viiboile varen’n’ua da juvva maijon libo čuajun kel .Pastetannehgo nygöi mostu pehmiedy nižustu leibiä Jessoilas ?Minä nygöigi rakkahal syön marjumaiduo , kui buabo opasti , omii lapsiigi sih harjaitin .
Kuni vie on mečäs must’oidu da vaigoidu , käygiä keriämäh .
Minule marjumaido da meččymarjois keitetty varen’n’nu mustoietah sidä hyviä lapsusaigua , konzu ei olluh ruavahan hommii da tuskii , konzu kai omat oldih nuoret da tervehen , oldih hengis da rinnal .
Marjumaido – tervehyökse da hyväkse mielekse
Livvi
New written Livvic