Texts
Return to list | edit | delete | Create a new | history | Statistics | ? Help
Olʾga Smotrova. Kumardumah saldatoile Valgo-Ven’ale
Olʾga Smotrova
Kumardumah saldatoile Valgo-Ven’ale
Livvi
New written Livvic
Valgo-Ven’al tänäpäigi herkäh
kaitah Suuren Ižänmuallizen voinan histouriedu , bojulois kuadunuzien saldatoin mustuo .
Hirvies voinas kiini olijat kohtat roittihes suurikse turistukohtikse Valgo-Ven’al .Mennyöl kezäl minä enzikerdua olin Valgo-Ven’al .Enzimäine kohtu , kunne azetuimmo , oli Minsk .Toizennu huogavopaikannu oli Brest .
Liikkuo Minskua myöte on hyvä mašinal , ga čukelduaksen Valgo-Ven’an piälinnan elokseh voibi jallai käveltes libo metros ajajes .Minskan metro ei ole syvä , sinne helpoh piäzet , lippu maksau 1 Br . Kuni seizoimmo da šeikuičimmo , mittumah metropoujezdah istavuo , meijän luokse tuli naine da kyzyi , kunnebo meile pidäy .Sanoi : "Läkkiä minun peräh ".Vagonas naine nevvoi : "Vältämättäh käygiä Vasilki-kafeeh da Voiton parkah ".
Voinan elävii jälgilöi Minskas
Muzei-parkukompleksu "Pobeda " – moine virralline nimi on Minskan Voiton parkal .Parku sai allun , konzu Svisloč-jovele nostettih dambu , da rodih Komsomol’skoje-järvi .Järven avajazet tahtottih pidiä kezäkuun 22. päivänny 1941.Ga voinu katkai pruazniekan .Parku avavui kerras voinan jälles vuvvennu 1945.Sit aijas se kehityi da suureni , vedäy omah puoleh minskalazii da turistoi .
Parkan alovehel kalastetah , ajellah laivoil , lapset da vahnembat ajellah polgupyöril da patkulavvoil , on kižuandukohtu pienile lapsile , parkas pietäh konsertoi da eri pidoloi .
Parkan piäkohtannu on Valgo-Ven’an Ižänmuallizen voinan histourien muzei Minskas .Lippu maksau 40 Br , ekskursii pidäy ostua ližäkse .Muzei on mieldykiinnittäi sil , ku sie voibi kaččuo da koskie voinanaigazii mašinoi da toizii voinubrujii .Sie seizotah hyväs kunnos Kat’uša-mašin , gruuzumašinat , minom’outat , tankat , motosiklu , lendomašinoin koupiet da toizet ruado - da voinubrujat .Miehet suurel kiinnostuksel kačeltah mašinoin podveskoi da syväipuoldu , lugietah tiedoloi niilöin vauhtis , painos da m .i . Eräs ven’alaine turistu nägi meigäläzien saldatoin voitonsualehen – nemsoin Stihl-benzopilan , da sanoi koval iänel : "Kaččokkua , mittumat pilat heile oldih !Meijän ga käzipilal maltettih pilata "!
Ekskursii muzeidu myöte loppuu Voiton zualas , kudai on sijoitannuhes st’oklukupolan uale .Sie ei ole nimittumii vehkehii , vai sinizen taivahan ual kuldazil kirjaimil on kirjutettu saldatoin , brigua doin , partizuanujoukkoloin da toizien joukkoloin nimet da moizet tiijot : Valgo-Ven’al mual oli surmattu 2 357 000 sobužua eläjiä da vangie , kaikkiedah voinal kuadui Nevvpostoliiton 26 600 000 ristikanzua .
Brestan linnoitukses kuuluu igävy muuzikku
Brestan linnoituksen-urhoin alovehele tulduu kuulet igävän muuzikan .Enzimäzekse mieldy kiinnittäy kaikis suurin mustopačas "Mužestvo " ("kar . "Miehekkähys ").Sen rinnal on kirjutettu linnoitukses kuadunuzien nimet , kaikkiel on rahvahan tuoduu kukkua .Enne linnoitukseh käyndiä olis hyvä kaččuo vuvvennu 2010 ilmah piästetty Brestskaja krepost’ -fil’mu (16+).Memorealukompleksua myöte olis parembi käveltä ekskursienvedäjän kel , sendäh ku kačelles linnoituksen rakenduksii tulou äijy kyzymysty .Pienien lapsien kel olles ekskursiedu emmo ottanuh , kyzymysty meil rodih äijy .Eräs siiriči astui turistu vahnoi da korgieloi puuloi kaččojes kyzyi giidal , äijygi puudu linnoituksen alovehel on säilynyh voinan aijaspäi , hänel vastattih , ku kolme .
Toine suuri mustopačas on "Žažda " (kar . – "Juotatus ").Histouries tiijämmö , ku vihaniekat katkattih vezibutken , da linnoitukses olijat saldatat jiädih viettäh , joga vezipizar oli kallis .Žažda-mustopačas ozuttau , kui Nevvostoliiton saldattu jälgimäzis vägilöis oijendau kätty , ku ottua kasku da ottua sil vetty .Kaskas oli vetty – valaugo ken vai vihman jälles jäi .Tämän mustopaččahan pohjannu on tovelline histourii da tietty saldattu .
Parku roih mieleh pikkarazil lapsilgi , mua kaikkiel on piällystetty plitkal – voibi ajelta potkulavvoil , suaugi kangiekseh tankoih .Pahakse mieldy , ei puuttunuh kaččuo voinu-histouriellistu rekonstruktsiedu "Voittamatoi linnu ", kudai piettih linnoitukses tossupiän , 24. syvyskuudu .
Valgo-Ven’al on rikas voinuhistourii , kačottavua on ylen äijy , kai histouriellizet objetkat ollah hyväs kunnos da ruokos .I paikallizet rahvas mielihyväl kai saneltah , ozutetah , nevvotah , kunne olis parembi kävvä .
Kumardumah saldatoile Valgo-Ven’ale
Livvi
New written Livvic