Texts
Return to list | edit | delete | Create a new | history | Statistics | ? Help
Jelena Ruppijeva. Borrin kalarokku
Jelena Ruppijeva
Borrin kalarokku
Livvi
New written Livvic
Ongiruagu
rodih hyvä , mietti Borri-brihačču , da kolme kerdua sylgi kočkazes rippujah sangieh čyöttöh .Häi kačahtih joven virdah da laski kubloin lähembi randua .Kočkaine oli suurettavu , ga tostu tuatan vehkehis ei löydynyh .Tuatto sidä nimittäy peremjotakse .Van'a-diädö sidä sanou prodolniekakse , no Borrin mieles enzi nimi on čomembi .Pitkäh nuorah on sivottu mondu langastu , kudamih on kriepitty äijy kočkastu .Kai tämä on levitetty puuhizeh juaššiekkazeh .Jiaššiekan bokis on pilattu ragozet , kudamis ozutetahes kočkazet .Tänäpäi yksi niilöis oli katkattu nuoren kalaniekan väil omah ongiruagazeh näh .Van'a-diädö opasti sidomah kočkazii kaheksakerdazel solmul .Kubloin Borri luadi viinupullon probkas .Nuaglazel kaivoi sih loukkozen , laski siiman da krieppi kai varoin höyhenel - mitus čoma rodih !
-Nikitič , läkkä teriäm , päiväine jo laskehes , a meile vie liemi pidäy keittiä .Van'a-diädö pani veneheh jiaššiekat uistimienke da soudajen airoloin vuoh pidi venehty rannan luo .
- Tulen , minä täs suurembat kalat suolain , a kiiškois liemen meile halvan suvaiččii keittäy , kuuletgo Borri .
- Kuulen , kuulen , vastai Borri , da hänen hengele rodih atkal .
Kaksi nedälii tagaperin hyö Vas'kanke , kaheksavuodehizen brihačunke seizottih kylälaukas da kačeltih , kui laukan myöjy Anna Pavlovna ravieh pyörittäy bumuagukulii da täyttäy niilöi suurimal , makaronal da zuaharil .
-Bor'a , kačo , mitus hyvä bankaine , parahite kočkazih näh pädis .Vas'ka ozutti sormel madalah pyöryžäh bankazeh , kudaman kannes muhizi ruskeirožaine t'outa , da reunua myö oli kirjutettu suuril kirjaimil "Halva ".Mi se on halva , lapset ei tietty , a vot hinnan nähtyy pahelzuttih .Kus suaha sih jengat ?
Sil aigua myöndystolalluo tuli Makariha-buabo , kudai voinan aigua sai kontuuzien .Sit aijas naine paistes plikutti silmil da taputti jallal .
- Anna Pavlovna , anna minule leibiä , suolua da ... buabo taputti jallal da plikutti silmäl , čäkkiine .
Brihačut hihittäjen eistyttih laukan čuppuh .Makariha sil aigua nosti myöndystolale omas vahnas kirzusumkaspäi tyhjät pullot , pluuššužilietän kormanispäi sai nen'apaikkah punotut jengat .
Brihačut kačahtettihes toine toizeh da juostozil laukaspäi pihal .Čuasus hyö kačeltih kai kylän kohtat eččijen tyhjii pulloloi .Kai , midä hyö suadih , tuodih laukkah .Ei täydynyh vai kolmattu pulluo .Väzyksis da pahas mieles Borri lähti kodih murginale .Pordahielluo tuatto sidoi aidazeh Tiähtiine-nimisty hebokuluu .Delegäs brezentan ual nävyttih ravval nagloitetuttuloin jiaššiekoin n’okat da toizet laukkah viettävät tavarat .
- Borri , kačo hebuo , kuni minä jen'gah kävyn . Vaiku tuatan peräh salbavui veräi , Borri otti jiaššiekaspäi kolme pulluo , avai probkat , kuadoi viinat šiiloižikkoh da juostojallal pättäviä bankua ostamah .Nimi magiembua halvua omas kaheksavuodehizes elaijas hyö Vas'kanke ei syödy .Da i bankas täs sai pidiä hos midä .Yksi dielo vai huovutti Borrii , huomatannehgo , mi on kavonnuh .Illal kodih tulduu häi kerras ellendi , ku huomattih .Tuatto seizoi pertih keskilattiel , yhtel käil pidi štaniloi , toizes oli remeni .
- Kuibo nygöi liemen keität ? Terväh mužikat tullah järvelpäi , a minul vie nimidä ei ole varustettu .Borri mietti da opitteli käil tagapuoldu , tuatan opastus andoi vie omat tiijot .Laskiettuu rannale häi sai suureh kalastajien kattilah vetty , riputti sen suureh nogehizeh raudah tulirobl'on piäl .Konzu vezi rubei kiehumah , ližäin sih kymmeniezen palua kartohkua da puolen rengii kiiškoidu .Voinnus kuorittua kartohkat da kalat , no kiiškoit oldih moizet libiet da pystäjät , ga niidy iäres jo nikui et suas .Vältäy mugagi , ližiän suolua , pippurii , lavrulehtie .Toinah ei tostavuta .Järvelpäi kuului venehen kridžineh , tuatan rygemine da Van'a-diädän iäni .
- Nikitič , vala vetty hangoin piäle , kačo milleh kridistäh . A rannaspäi mil tullou , žiivatoilgo juomistu ken keitti vai mi happani ?
- Da minä Van'a jo sen ellendin .
Mattähis Borri nägi , kui veneh tuli randah , kui tuatto kandoi sen loitombi meččäh da kui kuadoi keitetyn liemen ,|mittumal koval iänel nagroi rannal Van'a-diadö da terväzeh puhkai kaksi haugii .Yhtes keitti liemen , toizen kalan pastoi tuhkas .Konzu kyynälet silmis Borri tuli tulirobl'olluo , tuatto ei čakannuh händy , a vai lujah sebäi da ukkai tuules kovennuzil huulil piämal'l'uškah .
Borrin kalarokku
Livvi
New written Livvic