Texts
Return to list | edit | delete | Create a new | history | Statistics | ? Help
Aleksandra Lesonen. Ikuset šankarit
Aleksandra Lesonen
Ikuset šankarit
Karelian Proper
New written karelian
Šiirtyjä
Valaamin kuolomatoin rykmentti -ulkoilmanäyttely toimi 10. šyyškuuta Koštamukšešša .
Näyttely esittäy Ontajärveštä kotosin olijan karjalaisen puunveštäjän Ivan Martsen’ukin šuurikokosie puutöitä .Ne on omissettu Šuuren Isänmuallisen šovan veterani-invalidiloilla , kumpaset vietettih elämän viimeset vuuvvet Valaamin šuarella .
Näyttelyn venäläiseššä nimeššä kuolomatoin-šana on kirjutettu beZsmertnii-kirjutuštavašša .Še on näyttelyn tekijän vuatimuš .Ivan Martsen’ukin mukah Šuuren Isänmuallisen šovan šankarien pitäy olla elävinä meijän muississa , toisin šanoin olla "bez smerti " ("ilman kuolomua ").
Valaamin kuolomatoin rykmentti-näyttelyššä on yli 30 puista muotokuvua .Ivan Martsen’uk vešti ne taiteilija Gennadii Dobrovin piiruššukšien pohjalta , kumpani ikuisti vuotena 1974 Valaamin šuaren hoitolaitokšešša eläjie šotainvalidija .Heijän košettajat ta traagiset istorijat voipi lukie muotokuvien viereššä .
Kaikki Dobrovin ta Martsen’ukin kuvat esitetäh tovellisie ihmisie – Šuuren Isänmuallisen šovan šotilahie , kumpaset kavotettih omie käsie , jalkoja , kuuluo tahi näkyö ta vietettih elämän loppuo unohettuina Valaamin šuarella .Ivan Martsen’ukin veššokšet ollah melkein luonnollista kokuo , ta puunvešto antau niillä tilavutta , mi šyventäy kaččojan ymmärtämistä .
Muasteri koroštau :
– Heijän kera kenkänä ei aššu Kuolomattomašša rykmentissä .Šentäh Valaamin kuolomatoin rykmentti kulkou muistomusejon kera .
Ta toveštah – jo monta vuotta tämä kiertonäyttely matkuštau Venäjän kaupunkija pitin muissuttuan niistä , ket jiätih unhol’ah , heijän vammasista ruumehista , šieluista ta kohtaloista .
"Šiirtyjä Valaamin kuolomatoin rykmentti -muistomusejo ei eči kunnivuo – še on šuatu Voitošša . Še ei eči Voittuo – še on makšettu verellä .Še keryäy Muistuo , kulkien Venäjän kylijä ta kaupunkijä myöten ..."
Monien näijen šotilahien nimet on jiäty tuntomattomiksi .Onnakko kaččomatta šiih , hyö šeisotah omašša iänettömäššä ta traagisešša rivissä – omašša "rykmentissä ilman kuolomua ".
Koko päivän näyttelyn veššokšien luona oli rahvašta .Aikuhiset kačottih muotokuvie miettiväšti , luvettih šankariloista , pitälti šeisottih .Näyttely ei jiänyn huomuamatta – še jätti jälen koštamukšelaisien šyväimih ta mielih .
Ikuset šankarit
Karelian Proper
New written karelian
–