Texts
Return to list | edit | delete | Create a new | history | Statistics | ? Help
L’ubov’ Baltazar. ”Odin” Pavlovič
L’ubov’ Baltazar
”Odin” Pavlovič
Livvi
New written Livvic
Vikse
karjalazil lapsil nimi Vadim oli tundematoi eigo hyö voidu harjavuo sidä sanomah .Ga tovengi , kyläs häi oli yksi moine !
Omii školavuozii mustelles vaste nygöi tulou mieleh , mittumat erilaizet oldih kai meijän opastajat .Enimät oldih omat kyläläzet , erähät linnaspäi da toizis lähikylispäi .Ga oli mostugi , ket oldih ihan ven’alazet da tuldih ruadoh meijän školah muijalpäi .Yksi hejis oli Vadim Pavlovič Negin , muuzikan opastai .
Vadim Pavlovič soitti lapsil Videlen Jovensuun päivykois , kus lapset sanottih händy "Odin " Pavlovič .Vikse karjalazil lapsil nimi Vadim oli liijakse tundematoi eigo hyö voidu harjavuo sidä sanomah .Ga tovengi , kyläs häi oli yksi moine !
V .P . Negin opasti muuzikkua Videlen školas dai pidi školan lapsien horan harjaituksii dai soitti tanssijoukol .Mi pidi olla tirpandua soittajal , konzu tanssijat lapset hairotah da öntästytäh , konzu ohjuaju kymmenii kerdoi azettau da käsköy ruveta uvvessah .Ga yksikai , voitimmo rajonan kilvois dai ajelimmo tazavallan konkursoih .Vadim Pavlovič opasti meile muuzikan algutiedoloi , opasti pajattamah yksin dai horas .Ezmäi häi iče pajatti meile pajon , sit saneli sen sanat da myö kirjutimmo net , sit rubeimmo harjaittelemah .Konzu pajo oli "valmis ", yksitellen kučui kluasan edeh , soitti johgahizel da pani arvosanan .Kymmenii pajoloi nenga opastuimmo hänen avul .Enimät oldih pioneroin pajot , ga oligi rahvahan pajoloi , kudamis pidi pajattua eri iänil .
Sit häi riädylöi myö jagoi kluasan eri iänih da opasti meile partiet ,ozutti , mil eroau yksi toizes da erikseh opasti jogahizen .Nenga myö tiijustimmo horan pajattamizen algutiedoloi , mi hyvin pädi elokses niile , ket suvaittih pajattua .
V .P . Negin oli tulluh meile ruadoh Kurskan linnaspäi .Sehäi kuuluigi silloi hänen paginas !Hos emmo putilleh tiedänyh ven’an kieldy , ga korval sai kuulta , ku hänen pagin eroau toizien ven’alazien pagintavas .
Muuzikkuopiston Vadim Pavlovič loppi "ruskien " diplomanke .Häi olis voinnuh jiähä opastajakse omah muuzikkuopistoh .Ga yhtes muamamke tuli Karjalah , Videleh .Kylän rahvas , ket oldih yhty igiä hänenke , mustellah , mittuine Vadim oli vähäsanaine , rauhalline , hyvätabaine da hieno mies .Ainos oli valgei paidu dai jallačit läpetettih ...Häi oli moine n’erokas muzikantu ga maltoi soittua kaikkii instrumentoi , mit vai sai kädeh .Vadim oli ylen hyvä valokuvuaju dai maltoi kohendua tele - da radioapparaturua .Voibi sanuo – Vadim Pavlovič Negin oli sen aijan n’erokkahembii nuorii miehii .
Hänen muamo Tamara Jakovlevna Kulakova oli liikundukul’tuuran opastai . Elaijas hänel puutui ruadua eri aloil .Meijän kluubas häi pidi horeografien harjaituksii .Videlen tanssijoukko tanssi rahvahan dai toizii tanssiloi dai oli ylen hyväl luvul rajonas .Vadim Pavlovičan tytär videleläine Margarita Jefimova mustelles omua buabua ihailou , mittuine häi oli n’erokas da hieno naine .Ihan tottu , piäh tulou mieli , ku V .P . Negin da hänen muamo T .J . Kulakova ei oldu muite vai linnalazii , hyö oldih korgiembua roduu .Äijäh mih suau opastuo , ga on olemas muudu , alguperästy hengen puhtahuttu , mih nikus ei opasteta , ga min voibi ičel kazvattua omas ičes .
V .P . Neginan mučoi Galina Varfolomejevna ruadoi 30 vuottu Videles lapsien kazvattajannu .Sidä ruaduo jatkau tytär Margarita .Englannin kielen opastajannu ruadau Tatjana , Margaritan tytär , V .P . Neginan bunukku ....
Voibi sanuo – tämä on yksi Videlen opastajien da kazvattajien dinastii !Hyvä on , ku Videlen školan muzei keriäy valokuvii da kaikkii tiedoloi da rahvahan mustelemizii oman kylän rahvahis .
”Odin” Pavlovič
Livvi
New written Livvic