Texts
Return to list | edit | delete | Create a new | history | Statistics | ? Help
Valentina Libertsova. Elettyy elaigua mustelles
Valentina Libertsova
Elettyy elaigua mustelles
Livvi
New written Livvic
Elokuun
ehtäine .
Tämä hengelline elokuun ehtäine , konzu unohtuttih toizet ruavot , televiizoru , tiedokoneh .Istuimmo kolmei kodikkahas syöndypertis čuaju - da piiraistolan tagan da pagizimmo livvikse , mustelimmo eletyy elaigua – toiči kyynälienke , toiči muhahtuksenke .Yhteh kerättih meidy – minuu , Tuuksen inehmizien Jekaterina Ivanovna Romanovan da hänen tyttären Antonina Pavlovna Terentjevan – karjalaine kanzalližus , Oma Mua-lehten luvendu , died'oloin kielen suvaičendu da hävinnyös Mačarven hierus puolisadua vuottu tagaperin eländy .Kat’a-t’outan paginas kuuluttih erähät Vieljarven luaduh sanotut sanat .Se ei ole petties – lapsusajal da nuorete puutui eliä sit kajalazes kyläs Priažan čupul .
Ilotoi lapsusaigu .
Rodiihes Ekaterina Markova Šoltjärven kyläs 17. elokuudu 1936.Nygöi , onnuako , kaikin tiijämmö , mittuine surmu da verehine aigu oli Ven’al jälgeh tulii vuozi .Markovan perehes , kui äijis toizis , otettih kiini tuatto .Vai kuvvenkymmenen vuvven peräs puutui arhivan kauti tiijustua , ku Ivan Vasiljevič Markov "troikan käskyl " oli ammuttu kahten kuun peräs , a 1957 vuvvel reabilitieruittu .Tässäh omat ei tietä , kunne pandih muah Ivan Vasiljevič .Kerran petties nähtih yhtes sangies kniigas , rounoku Krasnii Bor-paikas häi sai ilmanigäzen rauhan , ga toven ei sie voidu löydiä .Tiettäväine , naizel kolmen lapsenke silloi eliä oli jygei .
Voinan aigua oldih jo Hiižarves , kudai kuului Vieljärvenkyläh .Kois seinän tagan elettih suomelazet .Muamo heile lämmitti kylyy , pezi sobii da midälienne vie ruadoi , ylen väzyi , ga sit sai hos vähäzen syömisty lapsile .Suomelazet karjalazii vastah otettih hyvin , paistih lapsienke , toiči tarittih midägi syömisty .Čidži , kudai oli kuuttu vuottu vahnembi , kävyi suomen školah , opastui hyvin , puaksuh toi lahjakse sobua libo magiedu .Händy kai tahtottih ottua Suomeh elämäh , ga muamah ei andanuh .Pahat mustot jiädih , konzu lenneltih lendokonehet da pakutettih bombii .Kaunehes järves vezi kiehui , struasti oli kaččuo .Lapset vahnembienke peityttih tahnuoh , kodvan varattih lähtie siepäi .A kerran elostettih tyttözienke nurmel , vai ehtittih juostozil puuttuo kodih , sih kohtah pakui bombu .Rodih mustu haudu , kodiloin ikkunois st’oklat murettih .Yhty tyttösty jälles ei nähty , liennego sih puuttunuh da kuolluh .
Jälles voinua tuli nälgy , ogrodoi azuo vie ei ehtitty , eigo olluh siemendy , eigo ni laukkoi , ni dengua , vaigu lehmy .Sit leibiä pastettih imičys , suoheinäs da pilajauhos .Kerran iškiettih vaivunuh laihu hebo , sit juattih pikoi palazin lihua , ga net näputettih keittämätä .Kaksitostuvuodizennu Kat’a jäi täyzin armoittomakse , gu kuoli armas muamaine .Häi hyvin mustau , kui myöha kuudaman al viettih syvätalvidorogua myöte bol’ničaspäi kodih , ylen äijäl itkiettih .Sit tyttözel pidi eliä miehel olijan čidžin perehes .Sih aigah sizärel ičel jo oldih pienet lapset .
Školah Kat'a kävyi Vieljarveh .hieruloispäi tulluot lapset nedälin elettih internuatas .Toizet toiči pyhinpäivin tuodih tävvet takat kodisyömisty da pastostu ,Kat’a-rukal puaksuh ei olluh nimidä .Kezät dai talvet pidi käveltä yksis huonozis botinkazis da valpasruskies pal’tozes .Sit opastuo sai vai kuuzi kluassua , ielleh pidi mennä Vieljärven souhozah ruadoh .Ku oli čoma da näbei neidine , aijoi puutui miehele da sai hyvän Ton’oi-tyttözen , kudai nygöigi eläy ikkunas nägyjäs kois .Muamo da tytär ainos autetah toine toizele , dai kaikile omile ollah abuniekannu .Antonina Pavlovna eläkkehele lähtendässäh ruadoi algukluasoin opastajannu Tuuksen školas .Paginas se ammatti ainos tunduu .Naine on hyvä emändy , pidäy suurdu ogrodua da eriluaduh navediu fatierua – muaman opastandu da nevvot ei mendy sudre .
Mačarven ozakkahat vuvvet .
A silloi , konzu tuatto kuoli , muutettih hyö Mačarveh , tuldih uudeh pereheh .Uuttu tuattua da ukkuo – Jevgenii Romanovua mollei naizet mustellah hyvänny da suvaiččijanny .Toiči tytärdimiä otteli yskäh , toi Ylä-Anukses ruavospäi lahjua – elostustu libo magiedu .Romanovat elettih enne pienes ostetus kodizes muatkoinke , kudai ottihes kaččomah lapsii , a Kat’al pidi mennä hänen sijah ruadamah podsobnoih .Ruavot oldih naizil jygiet – kodih dai podsobnoin žiivatoile heiniä azuttih pikkarazis paikkazis mečän keskes .Net vie siepäi pidi suattua heboloil hieruh .Talvel suomittih dorogoi , viettih peldoloile höstötty – löydyi konzu midägi .Puuttui naizel nuorennu kodvaine ruaduagi oksien karzijannu – lumes ryndähässäh .Yksisama eliä Mačarves oli mieldy myö , ku oli rinnal čoma järvi da äijy lambii , sai kalastua , kerätä marjua , pidiä žiivattua , oli laukku , alguškola , kluubu , raadivo , kerran nedälis ozutettih kinuo .Joga ruadopäiviä kävyi avtobuussu ottamah da tuomah iäres lesopunktan ruadajii .Sil sai puuttuoYlä-Anukseh vračoilluo dai laukkoih , dai ielleh Anukseh libo Petroskoile ."Kai igä meni immin-kummin , sanelou Ekaterina Ivanovna . – Vai ehtimmö azuo uvven suuren koin da kylyn Mačarveh , kui hieru rubei häviemäh… ".
Ahker ruadai .
Romanovat muutettih , kui äijät hierulazet , Tuuksele .Sie oli ruaduo souhozas , kunne mollei ukonke kerras mendihgi .Kodvazen oli peldoruadolois , a sit ku kehoitettih maidofermale lypsäjäkse , ei kieldävynnyh – puutui vazoinsuanduozastoh ."Kolmen aigah jo pidi nosta , kaččuo da syöttiä omat žiivatat , varustua huondesvero mužikale da lapsile , viijele ehtie ruadoh . A fermat oldih loitton joven tagan kylän agjal .Suvaičin jättiä kai juodazet dai rengizet puhtahannu da pertit kabrastetut .Lypsändöin keskes kaksi kerdua päiväs vie juoksendelin , a kezäl ajelin pyöräl kodih , midägi ehtie ruadua da syvvä .Toiči ku rubieu lehmy suamah myöhä , ruadoajgu jatkuu yhtehtostu čuasussah .Kois muatkoi vie kurkettau , lapsii en vihjua .En tiijä , kuigi opastuttih da kazvettih .Vikse , kuilienne Jumal kačoi , vardoičči da autti ", ajattelou naine .Jälles tytärdy Romanovis vie rodiihes kolme brihaččuu .Mugai kazvettih , suadih ammatit , ruattih omas piiris , naittih , suadih lastu .Nygöi Kat’a-buabo lugi jo viizi vunukkua da kuuzi pravovunukkua .Kaikin rudajat , kui vahnembatgi .
Ekaterina Ivanovnal täytyi 22 vuottu ruattuu vai yhtes Tuuksen souhozas , a kirjutukset ruadokniigazes zavoditahes 1956 vuvvel Mačarves , jälles puolinellätty endisty stuažuvuottu .Sit kaikkiedah ruattuu on läs 50 vuottu .Joga vuottu ei yhty kerdua hyväs ruavos annettih kunnivokirjastu , lahjua , palkinduo .On suadu Udarnik kommunističeskogo truda-merki , enzimäine žiivatankazvatandumuasterin kategourii .
Hyväle inehmizele – hyviä ozua .
Nengomien suurien ruadoloinke da suuren perehenke Ekaterina Ivanovna ehti vie kävvä kul’tuurutaloih , yhtyi ozutelmoih , lugi runoloi , pajatti častuškoi , 29 vuottu kävyi Kiuruine-horah karjalakse pajattamah ."Minä nygöi olen sie kaikis vahnim , kai yhtenigäzet heitettih käyndän . Dai Mačarves eläjis jo kaikis vahnim olen , sie kai kuoltih ", sanoi gu löyhki .
Himo on vastаta , ku vie ylen näbienny da čomannu ozutahes , kaunehesti pagizou muamankielel dai ven’akse , äijän mustau dai tiedäy , nerokahasti pastau da keittäy , piday hyväs kunnos pertit .Vai myöhembä , jo kodih tulduu tädä vastavustu mustoitelles , tuli piäh mieli : tämä ei ole vie vahnus , tämä on Ekaterina Ivanovna Romanovan elokuun ehtäine , konzu voibi yhteh vediä elon tulokset dai kaimavot , eliä da ihastellakseh sil , midä andau Jumal , kestiä lapsih da bunukkoih nähte .Voibi tilata "Oma Mua "-lehtie da lugie omal kielel , vastavuo hyvien tuttavienke , kuččuo stolah omii da lähäzii 17. elokuudu 80-merkipäiväle .
Minä hyvittelen armastu Ekaterina Ivanovnua nengozen pruazniekanke da toivotan pitkijä igiä , tervehytty , poudua sygyzyy , elokastu elaigua !Olen ylbei , gu meijän Mačarven ristittyöt joga kohtas kuulutah parembien joukkoh .
Elettyy elaigua mustelles
Livvi
New written Livvic