Texts
Return to list | edit | delete | Create a new | history | Statistics | ? Help
Darja Hil’. Piteriš mäni “Hobedaine nabornik” -festival’
Darja Hil’
Piteriš mäni “Hobedaine nabornik” -festival’
Veps
New written Veps
12. da
13. sügüz’kud Piter čukalzihe Venäman Öbokan tradicijoiden , muzikan i rahvahaližiden radmahtoiden mujukahaze miruhu . Jelaginsarel Kul’turan da lebun keskuzpuištos S . M . Kirovan nimel mäni V festival’ "Hobedaine nabornik ".Se oli tehtud XI Rahvahidenkeskeižen ühtenzoittud kul’turiden foruman aigan .
Sur’ homaičuz oli anttud rahvahiden sebrudele da kul’turkosketusile .Festivalin laval ezini enamba 1000 sädandkollektivoiden ühtnikad Venäman Öbokan regionoišpäi , a mugažo Belorussiaspäi da Kaliningrad - i Mariupol’-lidnoišpäi – adivod nägištiba rahvahiden kul’turiden bohatust da erigoičust .
Tahtnikoiden täht oli tehtud rahvahaližiden radmahtoiden mastar’klassad , kus voi nagištada , kut tehtas erazvuiččid kaluid , a mugažo rata vahnoiš tehnikoiš ičeze käzil .
Karjalan Valdkundad festivalil ezitiba delegacii Rahvahan sädandradon da kul’turižiden iniciativoiden keskusespäi i pajokollektivad .Karjalaižiden radonmahtoidenke praznikan adivoid tundištoitiba mastarid Natalja Kuz’mina , Irina Il’ina , Irina Tikkujeva da keskusen specialistad Viktoria Dragun i Natalja Igrakova .
Festivalin kul’turprogramman čomenzoitiba Vepsän rahvahan horan da "Pitarici " -venälaižen pajon horan ezitused .
– Necile festivalile mö horanke tulim ezmäižen kerdan , meid oli 12 mest . Pajatim vepsän kelel , no kaiken aigan starinoičim ristituile , miš oli pajo : adivoile nece oli melentartušt .Eraz naine , kudamb om Vepsän rahvahan horan sur’ navedii , ajeli kogonaižen Piterin kal’t , miše nägištada meiden ezitust – naku oli ihastuz !Azjtegon lopus kaikuččele ühtnikale anttihe hobedaižen hel’men , i ühtes kaik hel’med kuti keradasoiš ühthe surehe nabornikaha – mitte čoma idei !Koncertan jäl’ghe , lebupäivän , ajelim Piterin sijoidme , kus openzihe Vladimir Melentjev , meiden horan ühtnik .Hän vei meid ičeze tropaižidme .Kaikuččel oli lujas hüvä mel’ , säki ihastoiti kaikid , – starinoiči Natalja Anhimova , Vepsän rahvahan horan ühtnik .
Kaikiden muštho jäi Folkartan festival’ , miččehe ühtni enamba 20 norišton kollektivad – nügüdläižed kul’turan kaičijad .Necen festivalin aigan oli vedetud mastar’klassad norišton täht , a mugažo oli tehtud jarmark , kus sobadizainerad da nored mastarid möiba ičeze tehmusid .
Festivalin adivoil oli voimuz ühtneda "Kirjeine saldatale " -akcijaha : kaik tahtnikad voiba kirjutada počtkartaižen specialižen voinoperacijan ühtnikoile i abutada sidoda sur’t maskiruindverkod .Nece verk om vahvan sidon da tugen simvol .Pigai počtkartaižed da maskiruindverk oigetas meiden saldatoile frontale .
Sil vodel "Hobedaine nabornik " -festivalile tuli läz 18 000 ühtnikad da adivod .Praznikan azjtegoid voi kacta Internetaski – onlain-kacujid oli enamb 9000!Festival’ andoi ičeze adivoile čomid lahjoid da lämid tundmusid , se tegihe kut Piterin , muga i Venäman Öbokan kul’turelon sureks aigtegoks .Nece znamoičeb , miše vodespäi vodehe melentartuz rahvahiden kul’turaha vaiše kazvab .
Piteriš mäni “Hobedaine nabornik” -festival’
Veps
New written Veps