Texts
Return to list | edit | delete | Create a new | history | Statistics | ? Help
L’ubov’ Baltazar. Kogo muailmu on teijän jalloin ual
L’ubov’ Baltazar
Kogo muailmu on teijän jalloin ual
Livvi
New written Livvic
Nuori
briha kezäsessien loppiettuu humaldui da puutui ikkunan kauti gostih neidizellyö , kudamua putilleh ni tundenuh ei .Yhteiskoin tarku vardoiččii ei piästänyh brihua veriäh .Tiettäväine , häi oli vähäzel humalas ,ga oli kirmei da nuori .Kangiekseh toizeh kerrokseh – se oli tyhjy dielo häneh niškoi .Ukkailtuuhes da sanottuu neidizele äijän heliedy sanua , häi kiirehti Leninan pihua myöte omah yhteiskodih huolis da hyväs mieles .Kai oli hyvin , ga kujos häi vuottamattah puutui torah toizen brihanke , kudai oli rodužin Kongospäi .Häi ei olluh toračču , vai oppi puolistua tundemattomua neidisty .Toras häi voitti ,Kongon eläi kyzyi prosken’n’ua ven’ua rikkojen , rubei sebäilemähes .Ičehäi peitoči saneli torah nähte KGB :n ruadajile ,kudamat terväh löyttih nuoren karjalazen brihan hänen pertis yhteiskois da viettih händy Komsomol’skoin pihal olijah katalažkah (tyrmäh – toim .).Konzu sellitettih , ku briha muite vai puolisti neidisty , händy piästettih , briha sai jatkua opastustu .Kerras kaikis huolis unohtettuu briha jo ajoi poujezdal oman muaman luo Porajärveh .Ved’ kuni häi oli kutuzkas (tyrmäs – toim .), kus händy da Kongon eläjiä opit-tih suaja sobuh da saneltih jygies kanzoinvälizes tilas , muaman luo tuli poigu Ukrainaspäi .Vellekset ei nähty toine tostu puoldu vuottu , a brihal ozuttihes , ku häi ei nähnyh omua vellie ijän .Heil oli mis sanelta toine toizele .Matkas brihua tuaste otetah kiini , täl kerdua rajanvardoiččijat .Mindählienne heil ozuttihes , ku se briha on ylen varattavu rozvo ...Ga häi muite vai lähti räkes vagonaspäi hengittämäh ilmua piirikeskuksen vokzualan perronale .Lähti harmualois verkopaijois , kudamas läbi nägyi pal’l’as rynnäs , a pindžakon , kudaman kormanis oli pasportu , opastujan lippu da den’gat , jätti vagonah .Hos i mittumat opastujal voidih olla den’gat !Rajanvardoiččijat händy ei kuunneltu , vai ymbäröittih kolmes puoles da vietettih perronua myöte .Hänen piäle ärizöy ovčarka-roduine koiru , moittijen kačotah siiriči astujat .
Sit rajanvardoiččijat sellitettih , ku briha ei olluh nimittumii rozvoloi da piästetäh händy .Sih aigah poujezdu jo ozutti "hännän " da vedi loittozeh Jyškyjärveh pindžakon dokumentoinke da sumkan veššilöinke .Poujezdua pidäy vuottua päivy .Briha läbinägyjis paijois da movvakkahis (muga hänel silloi ozuttihes ) junokkahis kl’oššuštanilois kävelöy perronua myöte .Piäs on vai yksi tavalline kyzymys : midä ruadua ?Rahvas , kudamat käydih vastuamah libo kaimuamah omii perronal , jo ammui lähtiettih iäres .Rajanvardoiččijatgi ajettih iäres .Puuloin tuakse laskih ruskei päiväine .Pidi kuitahto piästä gruuzupoujezdan vagonah , muudu ei jiännyh .Ehtyvilu ni yhty ei pöllätännyh brihua .Häi valličči tyhjän vagonan , kudamas viettih hiildy .Ei varannus briha ajua tävves hiildy vagonasgi , ei olluh aigua valliččemah .Varaitti vai yksi – tuaste on raja-aloveh , tuaste vihandat furažkat .Jälgimäi poujezdu lähti ajamah .Briha rubei juoksendelemah vagonua myöte , pajattamah , viuhkuttamah käzii , hyppäilemäh , kykistelemähes – häi luadi kaikkie , ku olis lämmin da vessel .Vagonas nossuon hiilen pölyn vallas häi rodih voitetun kongolazen brihan vellekse .Olis hänel zirkaloine , ga nagras kylläkse oman ičen piäl .Vuottamattah poujezdu rubei azettumah .Eigo händy ečitä ?Raudutiedy pitkin astutah rahvas .Čakoin pärizendäs on jygiettävy ellendiä , mis hyö paistah .Briha rounoku raudazeh kodah ajettu zvieri istuu hil’l’azeh vagonan čupus .Valgei yö on vilu .
Čakat purtah brihua verkopaijan loukkolois .Vagonan seinän tagua kuului nuoren puaran mielettömii suvaičussanoi da ukkailendoi .Briha jo rubei nagramah omua ičcie – pidihäi moizeh bekettih puuttuo !Nagroigi omii ajatuksii : a ku hypätä vagonaspäi , anna pöllästytäh , libo iškie kulakal seiniä vaste , libo kirraldua midägi hirviel iänel ...Silkeskie poujezdu lähti ajamah ielleh .Päiväzen nouzendua vaste jo tovelline "mavru " hyppäi täytty vauhtii ajajes puojezdaspäi .Briha kiändi mukkii čuurumual .Pölypilven huomannuh poujezdanajai varaitti brihua kulakal ikkunazespäi .Ozakas briha vai tehvehtäjen viuhkutti hänele käil da nel’l’oi kodih päi ...siiriči salvatus stansies da vaihtoruadajan kovas .Kois velli da muamo jo ammui vuotettih händy .Jälgimäi vellekset annettih toine toizele kätty , sebäiltähes .
– Kuspäibo olet kirvonnuh ?
Briha saneli omis šeikkailulois .Ei kaikis !Kaikis muaman aigah ei sua sanelta .
– Kusbo ollah vešit ?
Nagretah .Muamo ukkaili omua poigua .Häi moittijen lekutti omua harmuajua piädy kummeksi valgiel yöl tulluttu mustuhibjastu gost’ua .Jällespäi vellekset lähtiettih kezoile .Vezi oli lämmin ku vastelypsetty maido .Muamo sil aigua katoi stolan .Huondesvero omien keskes ei ole ku yhteiskoin syöndypertis .Briha söi tävven vačan ,unettoman yön da kezoin jälles ylen äijäl himoitti syvvä .
Huondesvalgiedu hyö vellenke vastatah venehes olles .Venehes tulou nenäh magiel terval , se ylen kebjieh da iänettäh ajau Sunan hobjastu pindua myöte .Soudau velli .Häi oli ylen äijäl igävöinnyh karjalastu eloksentabua .Velleksien ies avavui suuri jogi , kuduas rouno höyhenet , kuvastuttih pilvet , sinine taivas , kuudamazen odva nägyi čirpi , kougelolois rannois kazvajat ruskiet pedäjät , suuret kivet , päiväzel avavujat valgiet liiliet da keldazet čuloit .Erähis kohtis vie nägyy yön udu .Vies läykkyjäh kalah kaččojes vellekset jo kuvitellah ,kui hyö ruvetah kalastamah Čudjärvel .Päiväine lämmittäy velleksien selgii ,vie ei ole räkkii nigo puarmoi .Luonnolline hil’l’ažus on heijän sydämis .Nygöi poujezdah jiännyöt vešit jo ei makseta nimidä .Net lövvytäh ,Karjalashäi on vähä varrastajua .Muga duumaiččou briha .Tärgiembi on se , ku häi on terveh da ozakas , i hänen omatgi ollah moizet .Ozutahes ...ei , ei ozutahes , ku täl hetkel kai muailmu on heijän jalloin ual .
Kogo muailmu on teijän jalloin ual
Livvi
New written Livvic
Karpin, Nikolai
Мир у ваших ног
Russian
-