Texts
Return to review | Return to list
Sodderan rahvas yhteh hiileh puhutah
history
October 15, 2025 in 12:34 Нина Шибанова
- created the text
- created the text: Sodderan eläjät yhtes opitah panna kundoh rakendus, ku vastavuo sie da pidiä eri pidoloi. Ruadoloi pietäh paikallizen vallan kannatuksel. Rakendus on jiännyh eläjile “perindökse” Šujales-laitokses. Petroskois Sodderassah on 80 kilometrii. Kylä on nuori, läs 70 vuottu igiä. Lespromhozan ruadajih niškoi nostetut barakat seizotah nygöigi, ga tottu sanuo, monet niilöis jo muututtih lahoparzitukkuloikse, kudamat ollah kui hirviet pihat. Vie pystyi seizojis barakois eletäh paikallizet rahvas – läs sadua hengie. Kylä hil’l’akkazin kuolou: kul’tuurutaloi on salvattu, lapsienpäivykodi ei rua, mečänvarustandukantor sežo jo ei rua, kirjasto on palanuh. Vie ei ammui paikallizet eläjät pruazniekkupidoloih kerävyttih školah, kudai oli kyläs kul’tuurukeskuksennu. Paikallizet rahvas kerryttih školah pruazniekkoih da konsertoih, kadamii järjestettih paikallizet artistat, školas sai nähtä toine tostu, paista. Ga škola jo mondu vuottu ei rua, školakirjasto, kuduas “hengellisty suurustu” suadih kaikin kyläläzet, sežo on hävitetty. Sodderan školan vilus rakendukses nygöi on hil’l’u. Muga kyläs kul’tuuru pandih lukkuh. Sodderan eläjien hyväkse mielekse mečänvarustandulaitos “Šujales” on andanuh ilmai rahvahan käyttöh puuhizen rakenduksen jogirannal. Se nygöi rubieu toimimah kluuban sijas. Pidäy mainita, ku kylän jogahine eläi ylen hyväl mielel otti vastah tämän lahjan da luadi oman panoksen kul’tuurukeskuksen perustamizeh. Aktivistat luajittih tilan mielužakse, sie on säilynyh päčči da oli ennepäi luajittu remontu. Truba on vaiku huonottavas kunnos da ei ole pertilomuu. Jo tämän vuvven sygyzykse rahvas pandih truvan kundoh, tuodih stolat, stuulat, astiet, azetettih uvven uksen. Jessoilan kyläkundu avvuttau sähkön puoles. Ei ammui piettih uvven kul’tuurukeskuksen avajazet, sille pandih nimi “Domik u reki”. Iel kylän aktivistoil on äijy pluanua muuttua kyläläzien elos parembah puoleh. – Täs eläy aktiivine naine Marina Mihailovna Savastjanova, händy avvutau samanmielizien aktiivizien ristittyzien joukko. Suaja subsiidii alovehellizes b’udžietaspäi pihatulien azettamizeh — kebjieh! Kyzyö administratsiel kunnostua tie da ičel lähtie kabrastamah kivilöi tielpäi? Helpo ruado! Äijy vuottu pidiä mieles, ku kyläs pidäy olla mielužu kohtu vastavuksih da piirihalličuksen kannatuksel suaja lahjakse Šujales-laitokselpäi Šuojun joven rannal kodine? Rouno ku fantastiekku, ga dielo todevui, sanoi Jessoilan kyläkunnan piälikkö Lidija Pajusova. Pienis kyläzis elos ei sammu vaiku oman kylän suvaiččijoin ristittyzien hyvyös.