Texts
Return to list | edit | delete | Create a new | history | Statistics | ? Help
Uljana Tikkanen. Kurššien kuuvveš opaššušvuosi jatkuu
Uljana Tikkanen
Kurššien kuuvveš opaššušvuosi jatkuu
Karelian Proper
New written karelian
Opaštujien vaštahotto karjalaisien
, šuomelaisien ta vepšäläisien kieliresurssikeškukšen kurššiloih on loppun .Kaikki ryhmät jatetah ruatuo täyšin joukoin .
Kieliresurssikeškuš toimiu jo šeččemettä vuotta .Tänä šykyšynä keškukšešša alko aikuhisilla tarkotettujen kielikurššien kuuvveš opaššušvuosi ta Kičči-Kočči-lapšien kieliryhmän nelläš opaššušvuosi .
Petroskoilaiset voijah opaštuo karjalan kielen livvin , lyydin ta vienan murrehta šekä vepšän kieltä alku - ta jatkoryhmissä Petroskoissa .Heijän opaštajina ollah Tatjana Baranova , Galina Paršukova , Uljana Tikkanen ta Marija Šašina .Keškukšen toiminnan rajoissa on järješšetty vielä livvin šekä vienan murtehien onlinekurššit .Niijen opaštajina ollah Valerija Grafova ta Marija Mitina .Parentua šuomen kielen taituo voipi pakinakerhošša , kummaista pitäy Tatjana Islamajeva Petroskoissa .
– Joka ryhmäššä on yli kymmenen henkie , eryähissä ni yli 20. Alkukurššiloih tuli äijän nuorie .Monet heistä šuatih tietyä kurššiloista kielikeškukšen šekä Karjalan kanšojen yštävyštalon tilaisukšissa , esimerkiksi , nuorisoforumissa , missä myö joka kerta kerromma Periodika-kuštantamon toiminnašta , šano kieliresurssikeškukšen spesialisti Alina Kartinen .
On tärkie vielä lisätä , jotta opaššuškurššija varoin ei ole valmista opaššušmetodiikkua .Joka opaštaja iče valmistau ta vuosi vuuvvelta parentau šitä .
– Mie yritän luatie meijän tuntija interaktiivisimmiksi . Käytän šitä varoin esittelyjä , valokuvie , piiruššukšie , kyšelyjä .Myö luvemma äijän , opaštujat oikein tykätäh lukie karjalaisien kulttuurista ta tavoista .Erikoista huomijuo annamma Karjalan kirjailijilla ta runoilijilla .Miun ryhmäššä on 25 henkie ta alušša oli oikein vaikie pityä kurššija niin šuurešša ryhmäššä .A šiitä mie rupesin kekšimäh eri tehtävie , kumpaset šovittais šemmosella opaššuškeinolla , šelitti livvin murtehen onlinekurššien opaštaja Valerija Grafova .
Nelläš opaššušvuosi alko Kičči-Kočči-lapšienryhmäššä ta heti oli jo pietty uuvven opaššuškauven enšimmäini esityš .Oppituntija pietäh Marina Tukkija ta Alina Kartinen .Tänä vuotena šuunnitelmissa on tuttavuštua lapšie uuših teemoih šekä ošallistuo konserttiloih ta lapšien festivaliloih , kuin esimerkiksi "Vepšäläini šuarna ".
Opaššušvuuvvekši on äijä mukavie šuunnitelmie , ka kaikki opaštujat ollah valmehet ruatamah ta šuamah uušie tietoja .
Kurššien kuuvveš opaššušvuosi jatkuu
Karelian Proper
New written karelian