Texts
Return to list | edit | delete | Create a new | history | Statistics | ? Help
Natalja Antonova. Kodi varustuu talven ruandoih
Natalja Antonova
Kodi varustuu talven ruandoih
Livvi
New written Livvic
Vieljärven
kyläs toimii Karjalan Kielen Kodi -yhtevys pidi halličuksen istundon ligakuun allus .Karjalan kielen da kul’tuuran hyväkse ruadai liitto varustuu talven da tulien vuvven ruandoih .
Mennyön kezän suurimat ruavot oldih matkuniekoin vastahotandu .Rahvahalline yhtevys on kehittämäs turistoin palveluloi iellehgipäi , ynnä pyzyö jalloil da jatkua toimindua .Syömizien da käziruadoloin master-kluasat , gostien syötändät da eländät koin seinis , ekskursiet da karjalan kielen lyhyöt urokat ollah net dielot , kuduat Kodi voibi tarita tulolazile jen’gah .Suavut tulot pannah tulieh ruadoh .
— Kezän aigah tuttavumah Koin toimindah da suamah sen palveluloi kävyi piäl kolmensuan hengie . Pošti kai rahvas oldih Ven’an muan kanzalazii , äijy oli käyjiä perehinneh , lapsienke .Ylen äijät turistois mainitah sen , ku ymbäri kävves ei kuulta karjalan kieldy paiči Karjalan Kielen Koin kohtua .Kezän aigah suavut elot ollah yhtevyksen vuozib’udžietan kolmas vuitti , dostalit ollah lahjoitukset da jäzenien avut , sanelou Koin ruadai L’ubov Popova .
Sygyzyn da talven aigah matkuniekkua kävyy harvembah , ga lujembah menöy ruado vieljärveläzien joudavan aijan viettoh .Kymmene kerhuo da kečoidu jatketah omua toimindua : karjalan kielen päivykursat , karjalan kielen internetkursat , kaksi teatrua (ruavahien "Randaine " da lapsien "Täh käine "), Pajokeräine-joukko , Naizien tervehys -niveldyskerho , Emändäine - da Paginkanzu-kluubat , Käziruado-kerho .
Pajokeräine-joukko kezän aigah sai lujah ajella lähikylii myöte karjalakse pajattamas .Oldih pruazniekoil Veškelykses , Kinnermäl , Kindahan kyläs , Kinelahtel , Kolatselläl , Nuožarves da Heččulas .Uuzien pajoloin suandu repertuarah myös on tulien talven pluanois sego kui oman teatran ozutuksien tekstoin painandu kogomuksennu .
Kielipeziä pienih lapsih nähte jo tostu talvie ei rodei .Školaigähizet lapset suahah kävvä jälles urokkoi ildupäivykerhoh , kus heile taritah karjalankielisty aijanviettuo .Karjalan Kielen Kodi , kuigi mennyzien talvien aigah , ielleh rubieu varustamah syömisty kylän vahnuksile da vedämäh sidä kodiloissah .
Koin ruaduo
Karjalan Kielen Kodi -yhtevys algai ruandan vuvvel 2012.Karjalan kielen elätändy da kyläläzien rahvahan elaijan parandamine ollah sen piätavoittehet .Liittoh kuuluu piäl kuvvenkymmenen hengie .Sen paginanvedäjänny on vieljärveläine L’ubov’ Popova .Yhtevyksen hantuzis on kaksikerrokselline puuhine taloi Vieljärven juuri keskučas , viijensuan nellikkömetrin suuri .Halguo päččilöin lämmitändäkse hommattih kezän aigah .
Kodi varustuu talven ruandoih
Livvi
New written Livvic