Texts
Return to list | edit | delete | Create a new | history | Statistics | ? Help
Anna Anhimova. Vepsläižed da seto: ühthine istorii
Anna Anhimova
Vepsläižed da seto: ühthine istorii
Veps
New written Veps
"Kiži "-muzeikaičuztaho ühtni
"Üks’ ma – ühthine istorii " -tedokonferencijaha , mitte mäni "Izborsk "- muzejas-kaičuztahos . Pätem , mitte letihe , koski igähižen vähäluguižen seton rahvahan kul’turjäl’gestusen kaičendad .Voden 2021 Ühthižvenälaižen rahvahan kirjutamižen mödhe Venämal om 234 seton rahvahan ezitajad .Meiden mas hö eläba Pskovan oblastiš da Krasnojarskan agjas .
"Kiži " -muzejan radnik , vepsläižiden ezitai Anna Anhimova ezini konferencijal "Vepsän ma – sugupol’viden dialog " -dokladanke . Hän jagoihe ičeze mahtištol , starinoiči , kut projektoiden abul voib mel’dütoitta lapsid da aigvoččid vepsän rahvahan tradicijoiden i kelen opendamižehe .Kundlijoile tuli mel’he vepsläižen sektoran prezentacii "Kiži "-sarel .
– "Kiži "-muzejas om ezitadud koume igähišt rahvast . Venälaine sektor om päekspozicii , mittušt tuleskeleba kacmaha kaik turistad .Karjalaižes sektoras oma pert’ Präžan rajonaspäi , kül’bet’ , ait , rih’ da časoun’ .Vepsläižes sektoras oma kül’bet’ da ait .Nügüd’ muzei osti Larionovoiden pertin Vehkojas , – sel’genzoitab Anna Anhimova .
Mugažo tärktan ozutesen rahvazkundan ühtenzoitusen täht oli Blagoveščenskijan Iono-Jašjärvelaižen mužikmonastirin udessündutand .Se sijadase läz vepsläšt Šokš-küläd .
Konferencijal kului äi melentartuižid dokladoid , miččidenke eziniba Venäman etnografižen muzejan , Venäman tedoakademijan Piterin Federaližen oppindkeskusen , "Izborsk "-muzejan , Pskovan kul’tur - da openduzorganizacijoiden radnikad .
Konferencijan ühtnikad oleskeliba seton rahvahan muzejas-pertiš , mitte om Sigovo-küläs .Seton emägad – Helju Majak i Malle Bogačova – adivoičetiba kaikid tradicionaližil sömižil da lahjoičiba "Külaotsan baboin keitändlad " -receptoiden kirjan .
– Vepsän da seton rahvahiden ezitajid om vähä , no heil om bohat kul’tur . Meil oma ühthižed tegendad da ühtejiččed problemad .Seton kel’ kadob , nored pagižeba venän kelel .Aktivižid ristituid om vähä , no hö oma ühtes i tugedaba toine tošt .Pskovan mal pidetas festival’ – "Setomaa ".Minei om mel’he seton rahvahan sädo , sil om äi hobedaižid elementoid .Kuni neižne ei lähtend mehele , sädos om äi monetoid , miččed čomenzoitaba sädod , sikš sijaližed eläjad sanuba : "Ezmäi sinä kuled seton neidišt , a vaiše jäl’ges – näged ".Seton rahvaz om lujas adivoičetai .Meile ozastui mujada lukpirgad , tikvkampotad , sagut tminanke , seton keitost , salatad da kislid kerthudenke , – sanui Anna Anhimova .
Karjalan vepsän rahvahan da Pskovan agjan seton rahvahan ezinikad radaba ühtes jo äi vot .Konferencijan sädajad meletaba , miše nügüd’ kosketused muzejiden keskes tegesoiš vahvembikš .
Vodel 2026 Venäman päiväl "Kiži "-sarel tehtas "Vepsläine kožmuz " -festival’ , miččen ižandoin linneba vepsläižed , a päadivoin – seton rahvahan ezitajad .
Vepsläižed da seto: ühthine istorii
Veps
New written Veps