Texts
Return to list | edit | delete | Create a new | history | Statistics | ? Help
Galina Baburova. Lämäd muštlotesed Rürik Loninan polhe
Galina Baburova
Lämäd muštlotesed Rürik Loninan polhe
Veps
New written Veps
Täl
vodel tetabale vepsän fol’kloran keradajale , kodi-istorijan tundijale , Šoutjärven vepsläižen etnografižen muzejan augunpanijale Rürik Petrovič Loninale täuduiži 95 vot .Vepsläižed igän oma muštnuded necen mehen , kudamb om muga znamasine heiden rahvahan istorijan täht .
– Kaikuččen voden Rürik Loninan sündundpäivän meiden školas mäneba "Loninan urokad ". Niil mö johtutam Rürik Petrovičad , pagižem hänes , kacum hänen kirjoid .Täl-ki vodel minä vedin mugoižen urokan nelländen da videnden klassoiden täht .Videnden klassanke mö mugažo kävuim muzejaha , – starinoiči Šoutjärven školan opendai Anastasia Jevtušenko .
Täl vodel necen päivän ühten surembišpäi azjtegoišpäi oli "Meiden südäimiden muštlotesed " -paginištund , mitte mäni Šoutjärven vepsläižes etnografižes muzejas .Sijaližiden eläjiden da Rürik Loninan heimolaižiden ližaks paginištundale tuliba adivod Petroskoišpäi : tedomehed , muzejan radnikad , kundaližiden sebroiden ezitajad .Ezmäi heiden täht muzejan pämez’ Natalja Anhimova vedi ekskursijan ut ozutelustme , miččen nimi om "Rürik Petrovič Lonin – vepsän rahvahan geroi ".Ozuteluz starinoičeb melentartuižiš faktoiš necen čudokahan mehen elospäi .
Dokladad vaumištiba paginištundan ühtnikad-ki .Karjalan Rahvahaližen muzejan pämez’ Mihail Gol’denberg pagiži Rürik Petrovičan tabas , siš , kut nece mez’ pani äi vägid , miše küläs olnuiži vepsän rahvahan kul’turan muzei .
Zinaida Strogalščikovan ezitusen nimi oli "Tedištam tundmatont männut aigad ".Hän starinoiči tedomehiš , kudambad tugeziba Rürik Petrovičan idejad tehta muzejan vepsän mal .
– Kaikile lujas tuli mel’he kodi-istorijan tundijan Natalja Kercovan ezituz . Sades erazvuiččid tedoid heimolaižilpäi da rates arhivižidenke azjbumagoidenke hän vaumišti Rürik Petrovič Loninan sugulugetišen 1730.-vodehesai .Natalja Vladimirovna tegi Anna Mihailovna Lisicinan-ki sugulugetišen da lahjoiči sen muzejale , mitte ei muga amu avaitihe Kalages , – starinoiči vastusen ühtnik Ales’a Anušenkova .
"Vepsän kul’tursebran " pämez’ Larisa Čirkova starinoiči siš , kut nügüd’ ristitud jatktaba Rürik Petrovičal zavodidud radod , kut projektoiden abul vepsän kul’turan kaičendaha mel’dütoittas lapsid .
Necil lämäl , kodikahal vastusel Rürik Petrovičan poig Viktor lugi än’heze runon tatan muštoks .Vastusen lopus kaik tulnuded ristitud kacuiba "Sana Rürik Petrovič Loninan polhe " -fil’man , miččen nügüd’ kaikutte tahtnik voib löuta internetas Šoutjärven da Karjalan Rahvahaližen muzejiden VKontakte-gruppiš .
Lämäd muštlotesed Rürik Loninan polhe
Veps
New written Veps