Texts
Return to list | edit | delete | Create a new | history | Statistics | ? Help
Irina Sotnikova. Maidjoged, kisel’randad…
Irina Sotnikova
Maidjoged, kisel’randad…
Veps
New written Veps
Kalevalas om
keza .Tuli aig tehta vastoid tal’veks .Paroi noustati ičeze mužikad aigoiš homendesel .Täudub magata !Soudam venehel päliči järves , oliži hüvä pörttas longikš .Kuni hö kobaižiba kebnas karjalaižes venehes – kirvez om naku , noran otim – Kuito-järven sel’ktan pindan päle libui kebn homendezsumeg .Mecrandad segoiba sumegehe .Ka nimidä , matk om tutab , samoiš kut-ni .Sanudes tot , Timoil vozidenke zavodi kibištada jaugad ….Sikš jo viž vot Paroi soudab , a mužik ištub venehen peras .
Kac , sötai ištub venehes i pajatab :
-Ajab Timoi naimatoi !
A ku Timoi naijškab ,
kuna Paroi lähteškab !
"Ka kuna lähted , kuna , hengahti Paroi . – Jo nel’l’kümne vot olem ühtes ... A ku pördutada pol’ sadad vot tagaze , ka meletaižin völ kenen taga mända mehele , sinun vai Semoin taga .Naku mitte om hüvä ižand !Päkaz om mužik !""Ka , sanui Timoi , päkaz . Pä om , da kaks’ korvad .Vaiše mel’t om vähä .Vaiše üks’ elomišt om ozutades kaikile .Oma lehm da hebo .Hebo om nenakaz da tabakaz .Hän iče starinoiči tantoi .
Lemboi vei händast tal’vel susedküläha .Sinna mäni randadme .Tagaze – irdal om pimed , eht tuli – päti lähtta järves päliči hoikad jädme .A hebo ei mäne jädme .Semoi homaičeli völ aigemba-ki , miše hebo vedäb ičtaze čudokahašti , nacein , varaidab pal’had jäd .
Naku ken-se Semoile andoi nevondan : antta heredoitust varaidajale živatale skipidaran abul .Sikš Semoil oli kaiken-se kerdal haižukaz butulkaine skipidarad heinän al .
Kac muga , laskihe hän regespäi , lendi tarkas hebon händan i čorski sinna skipidaral ...Semoi eskai ei ehtind tabatas-ki hebon händas .Hebo lendaškanzi kuti raket !A Semoi tuli küläha vaiše homendesel .Kodinikad habi tüništoitiba hebod .Tuli Semoi kodihe kaik kül’mnu .Naku sinei , mitte om Semoi !Mi om edemba , tegese völ melentartuižembaks .
Keväz’jädme hän laski verkoid järvehe .Ani viž kilometrad randaspäi .A kut verkod otta ,kaloid vedäda ?Naku ladihe Semoi Nikolai-susedanke , miše Nikolai veb händast sinna mopedal .Vaiše kut-se om čudokašti .Sused ajab mopedal , a Semoi om sidotud mopedaha regudel tagana .
Konz minä läksin pertišpäi pordhile , hö läksiba matkaha : vaiše räzäiduz da heikand oma ümbri !Külän motovoibištelii otab pigut jäl , a Semoi habi pidäse kumaitud regudes .Päliči polestošt kilometrad Nikolai kacuhti tagana .Uhoičeb sinun hüvä ižand mopedan taga vauktal pil’vel .Sportmez’ om , pä om da kaks’ korvad !""A midäk ? Sportmez’-ki om , nu , kut se nimitadas – spinningist , da om hüvä ižand !– Paroi polesti külänikad . – Hänen Ol’gal-se om kaikuččen voden verest kalad ! A mö ...Hot’ mitte-ni penikaine kalaine hüppiži iče veheheze ..."Vaiše Timoi oli vaitti ...Järv tegihe tün’ .
"Kacu , Timoi , mitte-se mägi ujub vedes … Jose se om sar’ , i čudokaz pu kazvab sil "."Mitte sar’ om ? Kuverdan muštan ičtain , nikonz ei olend naku ni mäged , ni sar’t .Sinä paremba melada paksumba , a ala kukitelde !""Tüništu , Timoi ! Paroi tarkašti lendi suren melan .– Ken-se ujub edes !"
Čududeluspäi sömäitadud ukon da akan edes ozutihe järven keskel ujujan hirben sarvikaz pä ."Mitte om sur’-se , sarvikaz ! Ujub toižele randale ...A midäk , ak , sanui Timoi , anda minä händast išken kirvhel sarviden keskhe .Linnem lihanke !""Midä sinä , vanh , oled lähtnu meliš ? Ken-žo hirbed randannoks vedäškandeb ?Zavodid-ik sinä likutada sapkoil pohjadme ?""A ku ...ku sarved sille noroida noral vahvas , miše ei päzuiži , i iškta ocadme randanno "
"Sinei vaiše kaiken iškta ! Naku pidab meletada ...""Midä täs meletada , Timoi zavodi tozišti noroida oksikahan hirben koronan , – kundlii živat ... Tedad-ik , äjak se vedäb ?Lihad täudub kogonaižeks kanzaks !L’ubale da Tol’ale andam jaugoin .Glašale vävunke andam polen jaugad .F’oklale ...
"Sinä , Timoi , muga jagaškanded hüvin kaiken , miše mö jäm vaiše händanke ". "Nu , jäm händanke vai händata , a studnid linneb kaikeks tal’veks . Miččehe radho tartun , ka kaiken-se tegen lophusai .Ved’ minä olen mugoine sinai !Lenda meloid veneheze , ak , nece sarvikaz lehm iče tob meid , kuna tarbiž .Kacu , kut ujub čomašti , om pä da kaks’ korvad !Mugoižen azjan täht ei ole grähkäd avaita butulkašt-ki .Guleim , Paroi !"
Kundeltes mužikan bahvalsanoid Paroi kacui holiš nägujihe sumegrandoihe ...Äkkid ozutihe rand .Unekahaspäi maidsumegespäi kebn venehut putui surile kivile .Paroi Timoinke habi ehtiba tabatas venehen laidoiš .Rižades mad sarvikaz hirbj libui suril hüpkil randale .Käskmaline tirpand kazvoi käredaks londuzvägeks ."Avoi , Timoi ! Čapa nor !"A mil čapta-se ?Habi heng hibjas pidäse .Ümbri oli oksid , barboid , penzhid , kandoid …Hirb vedi ukod akanke kividme , sagedan kuzišton kal’t , kuni veneh ei putund kahten suren pedajan keskhe .Hirb päzui valdale naku ühtes ratkeitud renghanke da noranke .
Paroi ujui kadagpenzhiden tagapäi , pudištihe : aniku om eläb .Puikoišpäi , miččed jäiba enččes venehespäi , Paroi sai mužikan šapkan : "Timoi , Timoi !Kus sinä oled , Timoihut ?""Ka naku minä olen ei edahan sinuspäi ".
Libudes kombuilpäi Paroi kosketi sel’gäl ripujid il’mas sapkoid .Mužik ripui abutomašti tabanus fufaikal pedajan oksaha metras maspäi .Paroi tabazi mužikad jaugoiš , vedäškanzi i – ühtes kodvas kaburzi händast .Eläb !Vaiše modpolišk da sel’g oma künzäidusiš .Sinižmaid da kuhmuid voib ei lugeda-ki .Kodiš lugeškandem ...
Uk da ak läksiba voivotaden da ohkitaden kodihe ."Paroi , a midä venehele-se tehta ?" "Ka midä venehele-se tehta ? Sinä midäk , ed-ik zavodi kerata puikoid ehtahasai ?Löuzid kirvhen-se ?Sinei pidaiži antta pädme , a ei hirbele , ajai !""Paroi , ka minä tegen uden venehen , völ paremban , mi oli kulu . Mitričale , opendajale , butulkan andan , ka hän abutab minei venehen tehtes .Minä sinei tegen kogonaižen laivan .Minun käziš , Paroi , lähteba kaik sijad !Mugoine minä olen !"Ku minä tezižin , miše sinä oled mugoine , ka en oliži lähtnu mehele sinun taga ... Midä tegid : hirbed veneheze val’l’astid !Hot’ oliži telegaha .Ka konz sinä koskid jäl’gmäižen kerdan telegad ?Sanu-ške ?Hän tegeb minei laivan .Mäne jo !..Ajelim mö sinunke , Timoi , vastoid tehmaha .Täudub paginoid elon lophusai .Ei ole lihad , ei ole veneht-ki .Vaiše väzuim käveltes mecadme .Kac , kut päiväine om korktas !Konz völ putum kodihe notktoidme kisel’randoidme ..."Pestud maidsumeges Kuito-järven päl seižui sel’ged heinkun päiv .
Maidjoged, kisel’randad…
Veps
New written Veps
"