Texts
Return to list | edit | delete | Create a new | history | Statistics | ? Help
Minä sanon sinuu zor’aizekse
Minä sanon sinuu zor’aizekse
Livvi
New written Livvic
Tämän
ven’ankielizen pajon sanoi kuultih onnuako kaikin Petrovskoin (myöhembi – Kondupohjan ) da Suojärven piirin eläjät 1960- vuozinnu .Kusbo kuultih ?Sil aigua linnan da kylän välis kävyi avtoubussu .Se kävyi alalleh , joga päiviä , tarkah aigulistan mugah .Illal , onnuako viijen čuasun aigua se lähti Petroskoispäi da oli Soudjärven kyläs kymmenen čuasun aigua .Šouferit oldih yödy fatierois .Huondeksel avtoubussu tuaste lähti linnah .Avtoubussu azetui joga kyläs , kyliä oli äijy , äijygi oli rahvastu , kudamat tahtottih piästä linnah sellittämäh omii dieloloi libo muite gostih .Oma mašin harvah kel oli , enimät ajeltih motosikloil .Lähikyläh vie voibi motosiklal ajua , linnahhäi , kahtensuan kilometrin piäs da vie kandamizienke , oli jygei ajua .Huondeksel matkustajat jo aijemba tuldih avtoubusan azetuskohtale .Erähät jo illal vastattih avtoubussua da ennepäi sanottih šouferile omas lähtendäs .Ga tottu sanuo , hyö enämbän tahtottih tiijustua , kudai šouferi rodieu huomei …Täs algavuu kaikis paras histourii .Šouferii oli kolme .Tabua myöte hyö oldih eriluaduzet .Yksi oli moine buuriško da vähäsanaine ,kyzyi midägi konzu vai pidi .Toine oli muite hyväsanaine .Kolmashäi oli ristikanzu-legendu !Slavka .Muga händy kaikin sanottihgi ,ei vaiku hänen aigah , ga keskenäh .Häi oli čoma da vägevy kudžerpiä mies .Häi ravieh hyppäi omah kabinah , avtoubussua vedi rouno kižah kižai , ga ei sendäh kaikin , nuoret dai vahnat , suvaittih händy .Slavka pajatti .Vedi avtoubussua da pajatti ,ei hinhetännyh , vai pajatti !Pajuo häi tiezi äijän , niidy täydyi kogo matkakse .Erähii pajoloi häi pajatti kaksin kerroin , konzu rahvas kyzyttih .Konzu häi pajatti , kaikin oldih hil’l’ah , ei taratettu uudizii (kyläläzet sih niškoi tuldih aijemba azetuskohtale ), lapset ei itkietty .Slavkan iäni oli kova , loitoskuului .Häi pajatti muga , ku kai tagarivilöis istujat rahvas kuultih .Vaiku yhty pajuo häi pajatti toizeh luaduh , helläh .Často sižu ja i dumaju (Puaksuh minä istun da duumaičen ) -pajo rouno ku vezi valui ,joga naine sih aigah tundui omua iččie kaksikymmenvuodizennu neidizenny , hos pasportan mugah oligi jo nelli -, viizi , -libo kuuzikymmen vuottu .Ja nazovu teb’a solniškom ... (Minä sanon sinuu päiväzekse… )…joga naizel ozuttihes , ku šouferi juuri hänes muga pajatti .Aijakse unohtuttih kai hommat ."Ja nozovu teb’a radostju… " ("Minä sanon sinuu ihalmokse… ") – loppi šouferin oman pajon , i vot täs oli jo kenenlienne azetuskohtu , ga lähtie iäres avtoubusaspäi niken ei tahtonuh . Konzubo sinuu tuliel kerdua sanotah juguizekse , ukonkuarekse , zor’aizekse ?Toinah matkas järilleh ?A ku muu šouferi roinnou , paha dielo !Avtoubussu lähti matkah ielleh da Slavka jo zavodi : "Kalina krasnaja , kalina vizrela " ("Kalin ruskei , kalin kypseni ").Pädi niilöil , ket ajettih linnassah .Hyö kuultih : "Stojat devčonki " ("Seizotah neidizet "), "Kakim ti bil ", ("Mittumannu sinä olit ") da "Odinokaja garmon’ " ("Yksinäine soitto ").Minul ozutahes , ku enämbi toizii rahvas suvaittih juuri sidä pajuo , kudai helläh kuului rounoku šouferin sydämespäi .Slavkah miellyttih kai yksinäzet neidizet .Slavka ei olluh muite šouferi , häi oli ristikanzu , kudai ylen äijäl suvaičči omua ruaduo .Myöhembi minä tiijustin , ku tämä šouferi oli Maksimov V’ačeslav , vaiku ižännimie ei vuidinuh tiijustua .Kyzykkiä nygöi ristittyzii , kudamat hos sen-tämän kerran ajeltih linnah avtoubusal , kudamua šouferii hyö mustetah .Puolet sanotah : "Slavkua ", toizet sanotah : "Slava-diädiä ".Olis hyvä kiändyö lapsusaigah , istavuo sih avtoubussah , ajua hyvin tundiettuu tiedy myöte Slavkanke !Hyvän muston sinä jätit omas ičes , Maksimov V’ačeslav !
Minä sanon sinuu zor’aizekse
Livvi
New written Livvic