Texts
Return to list | edit | delete | Create a new | history | Statistics | ? Help
Ol’ga Petrovna
Ol’ga Petrovna
Livvi
New written Livvic
Soudjärven eläjien
keskes vedeli vaiku Ol’ga Petrovnua – hänen tuattah jäi hengih voinal olles da tuli järilleh kodih .Enzimäi pereh eli muapertizes .Sit tuatto nosti koin omah kyläh .Endizen koin poltettih ven’alazet saldatat , konzu heile pidi myöstyö .Ga Lena-buaban da hänen tyttären Ol’ga Petrovnan oza terväh katkei – tuatto lähti elämäh Fen’a-susieduakalluo .Voinan jälles miesty kyläs oli vähä , monet jo vuvvennu 1937 otettih kiini da viettih tielöile tiedämättömile .Lesket ičeväil elätettih perehii .Äijis kodilois kazvettih poijat , kuduat 13-15 -vuodizinnu paimendettih žiivattua da avvutettih muamoloi heinarren aigua .Pienembät brihačut käydih viele da hommattih halguo , talven aigua luajittih avanduo .Lena-buabo da Ol’ga Petrovna kai ruavot luajittih yhtes .Heiniä hyö niitettih järven tagan Mavonmäillyö .Lena-buabo haravoiččou heiniä , Ol’ga Petrovna vedelöy heinii pienel venehel omah randah .Sit tullah järilleh kodih ,syötetäh lehmiä .Salvatah lambahat liäväh , syvväh da mennäh panemah verkoloi .Ähkitäh piendy venehty da pannah verkuo , äijygo kalua pidäy kahtele ...Valentina-tyttären suaduu Ol’ga Petrovna opasti händygi pidämäh talovuttu .Muga hyö elettihgi kolmei .Ol’ga Petrovnan tytär opastui voimatomanhoidajakse da piäzi ruadamah lapsien juaslih lähikyläh .Ga rodih hädä .Heinarren aigua Valentina-tytär tabai umbišuolentulehtuksen .Heinargi on kiirehaigu , Valentina ei kerras sanonuh muamale , kodvan kesti kibuu .Linnalazet liäkärit ei voidu avvuttua neidisty .Ol’ga Petrovna pani muah oman muaman da sit tyttärengi da jäi yksinäh .Val’al vie ei olluh lastu , neidine kuoli ihan nuorennu .Joga keziä Ol’ga Petrovnalluo tuli omahistu linnaspäi .Sygyzys kezässäh naine kai ruavot luadi iče , endizelleh pidi lehmiä da lambahii .Yksin pani verkot , suovattoin lämmitti kylyy , kui toizetgi kyläläzet .Ol’ga Petrovna da susiedat roittih dovarišoikse , käydih toine toizen luo gostih čuajuu juomah , käydihgi meččäh , a sit ruvettih vuorokkai lämmittämäh kylyy .Pyhänpiän Ol’ga pastoi piiraidu , havvotti maiduo päčis , kudoi hurstiloi .Kirikköpruazniekoin aigua naizet yhtes käydih kalmoile , kumardettihes kuolluzile .Torielkazih pandih midätahto syömisty , kenele – piiraidu , kenele – riäpöidy .Kalmoilpäi tulduu tavan mugah naizet juodih čuajuu Marija Petrovnan luo ,kudai oli ylen rahmannoi emändy .Naine pani stolale samvuaran da kaikkie syömisty , midä oli vai kois .Naizet juodih čuajuu , musteltih mennytty aigua da sit lähtiettih kodih televiizorua kaččomah .Silloi televiizoras ozutettih brazilielazii da meksiekkalazii serialoi .Meijän buabat suvaittih niilöi sinnesäh , kai fil’moin personuažoi piettih omahizinnu .Mostu ei olluh , ku kenlienne naizis jättäs seerien kaččomattah .Aijoi huondeksel , kuni ajettih lehmii niityle , naizet šeikuittih fil’man tapahtumii muga tarkah , buite se oli egläi omas kyläs .Muga eligi Ol’ga Petrovna .Lehmän da lambahat häi andoi tuttavile .Ga oman elaijan loppussah häi kazvatti kartohkua , morkouhkua da laukkua .Meččäh häi enämbiä ei käynnyh .Mustan , ku elokuus annoin hänele bitonazen must’oidu , ku häi syös muarjua .A häi huondestu myö vedi minule must’oipiiraidu ."Ol’a-t’outa ! Kuibo muga !Oletgo hos iče syönnyh muarjua ?".Tossupiän Ol’ga Petrovna uvvessah toi tuomastu .Sinä annat hänele rubl’an , häi sinule – kaksi .Ozutahes , ku häi on kovasydämelline ,ei muheloita , ga mittuine pehmei syväin hänel oli !Aigu meni .Ol’ga Petrovna valmistui kuolemah . Varusti muahpanendusovat .Kuibo toizin ?Kaikin nenga ruattih .Ol’ga Petrovna luajitutti mustopaččahangi .Naine valličči fotokuvangi , sie hänel piäl on čoma pal’to karvukagluksenke .Mondu vuottu mustopačas seizoi sarual ilmai roindu - da kuolendupäiviä .Nygöi se mustopačas on Ol’ga Petrovnan kalmal , tiijämmö , konzu häi kuoli , a konzu oli roinnuhes emmo tiijä .Mostu elaijantaibalehtu , kui oli Ol’ga Petrovnal , minä en ni tiijä .En tiijä , ristikanzoi , kudualoil olis moine syväin da taba .Ol’ga Petrovna , olet minule ezikuvannu .Vaiku Jumal tiedäy , kui sinul oli igävy eliä yksinäh omas mielužas kois , kui jygei oli kandua omua "ristua ".Igähine musto sinule , armas rist’oi !
Ol’ga Petrovna
Livvi
New written Livvic