Texts
Return to list | edit | delete | Create a new | Statistics | ? Help
Valentina Libertsova. Ruadua oman muan hyväkse
Valentina Libertsova
Ruadua oman muan hyväkse
Livvi
New written Livvic
Anuksen
piirin volont’ouroin keskuksen VK-sivuu kaččojes voibi nähtä , mittuzet suuret jogapäiväzet ruavot ristittyzien da elättilöin hyväkse kiehutah Anuksen mual .Hyväkse mielekse , sivul kirjutetah karjalaksegi .
Anuksen piirin volont’ouroin keskus zavodi ruadua 2019 vuvvel , se kannattau da perustau ekolougien , kul’tuuran , sportan , ižänmuansuvaičuksen da toizien aloin pidoloi da aktsieloi Anuksen lohkol .Mennyzil vuozil on todevutettu suuret projektat : "Menetetyn kiännändy : Mariinskoi kivitie ", "Anuksen muan žemčugurengas ", "Mediatalkot " da muut .Volont’ourat yhtyttih kogo Ven’an da kanzoinvälizih pidoloih , alalleh ajeltah avvuttamah Ruskeala Symphony -festivualih .Tänä vuon Anuksen volont’ouroi sanottih parahinnu Kevät hyvyön -nedälin ruadolois .
Keskuksen johtajannu on Anuksen haldivon ruadai Alla Sidorova , kudai 2023 vuvvel on palkittu Za zaslugi v dobrovol’českoi dejatel’nosti -medalil .A koordinuattorannu da press-menedžerannu on L’udmila Korkačova .VK-sivus nägyy , kui tarkah häi ilmoittau pidolois , kunne kučutah abuh volont’ouroi , keriäy da opastau heidy , työnnyttäy da kannattau nuorii .
Sivun ylen äijäl čomendau piirustettu Veikko-hanhenpoigazen kuva — Anuksen kanzallizen piirin volont’ouroin keskuksen simvolu .Veikon keksii dai alalleh azuu sen uuzii kaunehii kuvii nerokas neičukku Ol’ga Korkačova .Nengoine simvolu ei ole vallittu petties , kaikin tiijämmö , gu meijän Anus on "hanhiloin piälinnu ".
Piirin volont’ouroin keskes on äijy nuordu , kuduat opastutah Kotkatjärven , Alavozen , Riipuškalan , kahtes Anuksen školis , ga , onnuako , kaikis aktiivizimat ollah Mägriän školan opastujat , sentäh , gu heijänke rinnal ollah ylen nerokkahat volont’ourat , heijän opastajat Valerii da Jelena Pogiba .
Volont’ouroin keskus äijän ruadau Vahnemban polven yhtevys -keskuksenke .Volont’ouru Valentina Petraš puolisti oman Hengitysvoimistelendy karjalakse -projektan da voitti Hobjazet kuhkutukset -kilvas .Naine joga nedälii pidäy sidä harjaitustu vahnoin naizienke .Jälgivuozin Marija Ivanovna Tarasova pidi sie karjalan kielen livvin murdehen kursiloi , kudamii anukselazet ylen hyvin otettih vastah .Syvyskuul puutuimmo sinne myögi : Alavoizen taigin -teatrustuudii ozutti omua livvinkielisty Keppizet-spektaklii .
Hyvänny harjaituksennu omatahtozien ruadoh on Veikon jälgii myö -kiža , kuduan joga kuudu luadiu L’udmila Korkačova .Ligakuun aloh meni harjaitus ekovolont’ouroih nähte : pidi opastuo erilazil online-kursiloil da suaha tovestus , istuttua kukku libo mitahto kazvos , kerätä da tuvva kolme kiluo hylgybumuagua da kobraine pädemättömiä batareikkua , kävvä ekokävelyle da kerätä oman matkan myödäh topat , polgie päiväs 10 000 askeldu .Oldihgi jygiembät ruavot : azuo hyllätys vešis uuzi , yhtyö Minun šoupermarafonah , kudai kehoittau käyttiä kangasšalguloi terväh rebijöin da ekolougiedu rikkojien tselofuanas libo bumuagas azuttuloin sijah .
Smietin tavallistu ekovolont’ourua Anuksen čupul liženi da heidy vuotetah uvvet ruavot oman muan hyväkse .
Ruadua oman muan hyväkse
Livvi
New written Livvic