Texts
Return to list | edit | delete | Create a new | Statistics | ? Help
Alina Gapejeva. Lapsetoi taloi da linnutoi pezä
Alina Gapejeva
Lapsetoi taloi da linnutoi pezä
Livvi
New written Livvic
Vieljärveläzien
L’udmila da Ivan Filippovien talois ainos kuuluu lapsien helezii iänii .Oppikkua vai duumaija , molodoloil kazvatettavannu on yksitostu lastu .Darja , Marija , Pavel , Mirra , Jefim , Alevtina , Aleksandr , Ivanna , Jelena , David da Tatjana – jogahizel on oma taba da omat nerot .
Perehen ižändy Ivan Vladimirovič on kazvanuh lapsekkahas perehes .Vie lapsennu olles häi piirusti oman tulien akan portrietan .Häi kuvitteli omis mielis omua tuliedu andilastu čomannu , hyvätabazennu , kädevänny da rahmannoinnu emändänny .
Oman kodvan vuotettavan ozan Ivan vastai vuvvennu 1997.L’udmila tuli Vieljärveh opastundan jälles .
Nuoret mendih kirjoih .Jo lapsusaijas L’udmilas ymbäri ainos oli lastu .Hänel oli äijy rodn’ua , dai häi mielihyväl kačoi heijän lapsii .Sendäh L’udmila hyvin tiezi , kui pidäy olla lapsien kel .
Enzimäzen Darja-tyttären suaduu L’udmila jo maltoi hoidua händy , ei pidänyh opastuo sih .Neidine oli hyväs mieles , ku rodih muamakse .Sit Dašal rodivui Maša-sizär .
TULI HÄDÄ
Taloih tuli vuottamatoi hädä .Puolitostuvuodine Maša voimatui .Voimatus oli ylen jygei .Lapsi oli bol’ničas läs kahtu kuudu , sen jälles pidi ičeväil paranduo .Vahnembat uvvessah opastettih tytärdy syömäh , pidämäh käzis bobazii , luadimah askelii .
Tämän ližäkse rodih vie yksi hädä : perehen ižändäh imihes kägöintäi .Intsifaliittu tartui mieheh .
L’udmilal liženi ruaduo sendäh .Konzu L’udmila tiijusti , ku häi on tuaste kohtuine , molodoloi varaitti : roinnougo kolmas lapsi vägie myöte ?
Pašan suaduu kai varavot unohtuttih .Tyttölöil oli hyviä mieldy vellen suaduu : hyö kaikelleh opittih ukata lapsen piälakkua , kačeltih hänen pikoi-pienii käzizii da jalgazii , äbäzöittih omua nuorembua vellie .
Toinah suurin oza joga tuattah da muamah niškoi – nähtä , kui kazvetah heijän lapset .
Ga ei vie gor’at loputtu .Nelläs lapsi sežo ylen äijäl voimatui .Uvvessah pidi vägie , tirpandua .Ga yhtes hyö uvvessah piästih kaikis vaigevuksis läbi .Lapsi jäi hengih .
HOMMAT DA ILOT
Nygöi Ivan da L’udmila ollah nellän poijan da seiččemen tyttären ozakkahat vahnembat .
Vahnimal tyttärel on jo 22 vuottu .Häi on miehel , opastuu feršalikse da nygöi on lapsensuandulomal .Nuorin tytär on vajai kahtu vuottu .
Joga päiviä Filippovil on yllinkyllin kaikenmostu ruaduo : joga lastu pidäy pestä , sellittiä , syöttiä , uinottua .Maša nygöi on piälimäine abuniekku muamal .Häi kaččou sizärii da vellilöi , maltau keittiä magiedu suuppua , pastua tortoi .
Nuorembatgi lapset mielihyväl avvutetah kodiruadolois .Hyö pestäh astieloi , pietäh kodii puhtahuos .Lapset suvaijah lugie runoloi , pajattua , piirustua , ezitytäh školakonsertois .
ELETÄH , EI PRÄHKETÄ
Lapset ei olla takannu , konzu uskot vai omih vägilöih da Jumalan abuh .Perehen kukkaro ei ole sangei , ga tulipalon ozaston ruadajan palkah da valdivon den’guabuh eliä voibi .Vie oma muapala syöttäygi .
Filippovat iče kazvatetah kartohkua , morkouhkua , sv’oklua , ogurčua , tomuattua , eri heinii .Talvekse ainos varustetah gribua da muarjua .A kalastamine – on paras aijanvietto kaikkih niškoi , kai iškietäh kihloi : ken suau suuremban kalan .
– Meil on kaheksa kanua da yksi iänekäs kukki , sanou Ivan . – Talvel hyvin munittih . Toinah lehmängi ostammo , maiduohäi meil pidäy äijy .Ku ostanemmo sen , ga vaiku koin nostettuu .Filippovil pluanois on koin nostamine .Vahnu kodi ei ole suuri , eigo ole kunnostettu , se jäi omahizis .Yhtelläh täsgi kois lapsil on oma opastusčuppuine , kižuandukohtu , syöndyperti da magavoperti , kuduas ollah kaksikerdazet magavosijat .
Olla lapsekkahannu ristikauzannu on Jumalan lepitty oza .Lapsekkahas perehes on muga äijy hommua , ku ruadua pidäy suutkat läbi .Anna sanotah , ku lapsekkahat ristittyöt ainos nävytäh väzynyönny .Filippovis muga et sano .Ongo midä parembua migu sidä tunduo , konzu sinuu sebäilläh omien monien lapsien käit .
Filippovien pereh iellehgi kazvau .L’udmilal da Ivanal nygöi on kaksi bunukkua – tyttö da brihačču .Ičehäi hyö vuotetah kaheksattu tytärdy .
Lapsetoi taloi da linnutoi pezä
Livvi
New written Livvic