Texts
Return to list | edit | delete | Create a new | Statistics | ? Help
Kožičendu
Kožičendu
Livvi
Kotkozero
Kozitah
syvysarres , pyhäkeskes dai kevätarres .Poigu pidäy soviettua naimižeh niškoin vanhembien kele .Enzimäžikse kumardah tuatale jalgah i sanou : "Rubiežin naimah ".Ollou tuatale mieli naittua , ga sanou : "Iččes mieli , himoittau , ga nai , kyzy muamalles ".A gu ei olle , vastuau : "Nimituštu naimištu ".Puaksuh vanhembat iče poijale sanotah : "Menet tuane (sanotah taloin nimi i tytön ) ehtäl sulhažikse ".Ongo se poijale mieldy myö vai ei ole , sidä ongeh ei oteta .
Puaksuh on , što i tyttyö annetah vägehyžin mielipuolehižele .Tyttö itket kylly kyynälet da menet .Moine oza oli sille .Vägehyžin andajen harvah konzu svuad’bu kummata proidii .Oli moštugi , gu tyttö hypyl pageni koiš brihalluo , a venčaittiheze sit jällespäi (Tädä sanottih "päčile meni ".Meil tiä "mendih päčile " L’okan Marinoi , Farafuntovan Tan’a ).Kyzymäh libo koziččemah mennäh pimies , štobi ei rahvas nähtäš , no yksikai staraijah rahvas novvattua ženihiä .Kaiče annetah "pullo ", ga sit huigiedu kylläl näit briha .Mikin Pet’ka sai kaheksatoštu "pulluo "; Iivin Iivan tože menetiijä min sai otkuazua ).Brihan vanhembat kučutah ristižä libo susiedu oma , kudai maltaš paišta .Tuatto-muamo blahoslovitah poigua ozavah čuassuh i lähtiäh koziččemah .
Tullah tytön taloih , avaitetah .Kodvažes tuači veräi avatah i "šittunenät " (nenga sanottih svuattuloi ) mennäh pertih .Ristitäh silmät i sanotah : "Terveh teile "! i azetutah uksičuppuh orren alle .Vanhembi svuattu zavodiu : "Sanotah teile on lähtemäine , a meil oliš häkkiine . Eigo suaš kauppua pidiä "?
Kaikin ollah vaikkani , niekoindellaheze , a siten tuattah libo muamah vastuau : "Aigahko vie lastu kyläh andua , ga pidäy ičelleh kyzyö ".
Kučutah tytär paginale , a häi vanhembile jalgah kumardeleheze : "En vie ole valmiš , tuatoini-muamoini , anduat vuazut rungua lujendua , käzii kovendua , mielii tazavuttua ".
Vanhembat kačotah vie sidä puoldu : andua pidäy , liigu luzikku stolas puolenou .Sit i sanotah : "On d’o nuorehko , ga ei ni taloi ole pahahko , astuat lauččah kauppua sobimah ".
Sulhaine ištuheze tytön rinnale , tuatto ristižän rinnale , a muamo samvuarua panemah , keitinpiirualoi keittelemäh .Stolale puoliško pannah .Sen jäl’geh stolan tagua paginua liženöy .Yksi kiittäy sulhaštu , toine andilaštu .Huondeksessah paginat jatkutah i lähtijes valkat pakitah .
A oli silloi vie i muga : konzu andilas levittäy svuad’ban – menöy toižele , valkat sinne propaditah , a konzu ženihy lykkiäy andilahan , valkat tagažin työndäy .Luajitaheze , konzu sil’mänristindy azuo .Toššupäivän jo kai hieru tiedäy kožičendan .
Konzu gu tyttö "pullon " andau , sit se briha omas hierus ei voi naija , menöy andilastu lappieh eččimäh , eiga i muga naimata d’iäy , toižeh argessah .
Konzu tullah koziččemah , kaikkineh brihan taloin elostu kiitetäh , ei ole sit ni vigua ni viärytty .Mučoi rubieu parčoi myöte kävelemäh , ikkunpieles ištumah , muatkoinke i buat’koinke čuajuu juomah .Ruadajua talois on kylläl : kaksi vellie , kolme sizärdy – kaikin kodii kazakoijah .Priduanois paginua ei ole : se sil’mien ristijes paištaheze .A on i muga : konzu ei tahtota tyttyö andua vakkinažele miehele , ga sanotah : "Tundematoi-tiedämätöi loitos kuuluu , a lähenöy dai rämevyy .Ei ole tytär valmištettu vie , lapsennu piemmö (a tyttärele on vuottu 23-24), rungu lujenou , perze levenöy , jallat sangetah da kieli terenöy .Vierahas talois varaten pidäy palaine syvvä , yhty lahkuo myöte kävellä .Voitto mennä eččimäh tyttyö vanhembua da kormanii sangiembua ".Sen kele koziččijat "pullon kele " kodih tullah .
Puaksuh oli i muga : tullah koziččemah vanhembua tytärdy , a briha mieldyy nuorembah sizäreh , ga vanhembat ei perečitä , sit kai priduanoi vanhemban tyttären annetah nuorembale ,a vanhembi sizär d’iäy ijäkse itkemäh , kivikaššalii kandamah .
Kozites ženihän vanhembile pidi luja kodikuharku , kudaigu ehtiš kahtu ruaduo kerras ruadua , ennen päiväšty nosta , kuldamažen kele muata viertä .Sidä myöte i poigu työttih koziččemah .
Tytön vanhembat kačottih : suurigo on pereh , äijygo on vellesty , midä vävvyle roihes javos , konzu jagamaheze ruvetah .
Konzugu kai paginat on paištu , i briha i neidiine luajitaheze mennä yhteh , tytön vanhembat varustetaheze sil’mienristindypäiväh .Briha kodih tulduu valkat andau muamalleh kabrastua .Valkua pakitah enämbäine , varatah eigu andilas muanita .Hyväs mieles briha astuu suuren uzlan kele kodihpäi , piä ylähän , joga taloin ikkunoih kaččou .
Kožičendu
Livvi
Kotkozero