Texts
Return to list | edit | delete | Create a new | Statistics | ? Help
Irina Sotnikova. Vändod da bobaižed ühtel scenal
Irina Sotnikova
Vändod da bobaižed ühtel scenal
Veps
New written Veps
Piterin
agjan Vidl-küläs mäni Regionoidenkeskeine "Vepsläižed lapsed " -konkurs .Azjtego pidetihe Vepsän fol’klorkeskuses jo videnden kerdan .Konkursaha ozutamha vepsän kelen tedoid tuli 15 lapsiden fol’klorkollektivad Karjalaspäi , Piterin da Vologdan agjoišpäi .
Konkursal oli kaks’ nominacijad ."Vändoihe väta – mel’t sada " -nominacijas kollektivoile pidi ozutada rahvahan vänd , mitte om tipiline heiden eländtahole . Toižen nominacijan nimi oli "Čudokaz bobaine ".Sid’ lapsile pidi valita mitte-se vanh bobaine , tehta sen polhe starin , pajatada pajo vai ozutada teatrozuteluz .
Scenal oli ezitadud äi melentartuižid vändoid , niiden keskes "Kaži i hir’ ", "Top-toptoputamei ", "Kanaine astui ", "Oravad pul ", "Hul kürzaine " i toižid .Lapsed ei vaiše ozutiba , kut pidab oikti väta sihe vai toižehe vändoho , no kucuiba vändmaha kacujid-ki .Vessel oli kaikile – lapsile i aigvoččile .
Ende bobaižid tehtihe savespäi , tohespäi , puspäi , kanghaspäi .Nenid bobaižid ezitiba-ki lapsed kacujile .Kaikutte kollektiv eziti ičeze vändon da bobaižen .
"Kelen da tradicijoiden kaičijad " -lapsiden kollektiv Vidlaspäi ozuti konkursal "Kaži i hir’ " - vändon i starinoiči tätüižen polhe .
– Lapsed lugiba : "Üks’ , kaks’ , koume , nel’l’ , viž , kuz’ – kaži uz’ ". I kaži taboiteli hiren .Sergei Abramov konz-se vändi garmonjal muzikan , i mö otim sen .Lapsed joksenziba hotkašti i vändiba diki veslašti .Nece vänd kaikile tuli mel’he .Toižes nominacijas mö ozutim tätüižid .Meiden školan pästnik Viktor Trifojev kirjuti kaks’ runod vepsläižiden tätüižiden polhe .Prihaine da neičukaine lugiba ned runod .Sil aigal vändi čoma muzik i kului vepsläine pajo , a lapsed läksliba scenale tätüižidenke i vähäižen sanuiba kaikuččen polhe , – sanui "Kelen da tradicijoiden kaičijad " -kollektivan ohjandai Gul’a Polivanova Vidlaspäi .
Om hüvä , miše lapsed ei vaiše opendaba kodikel’t – hö ühtneba mastar’-klassoihe , miččil opendasoiš vaumičemha vepsläšt paštatest , tehmaha tätuižid-kaičijoid , tundištasoiš vepsän rahvahan tradicijoidenke , veroidenke , istorijanke da vepsän man melentartuižidenke ristituidenke .
– Om mel’he , miše lapsil om taht opeta vepsän kel’t . Kaik ozutiba hüvid kodikelen paginmahtoid , oli äi melentartuižid nomeroid .Lapsiden kollektivad ozutiba äi rahvahan vändoid , vändiba kacujidenke , toižed vediba horovodoid , pajatiba pajoid , lugiba runoid , – sanui konkursan vedäi Ol’ga Spirkova .
Konkursan programman ližaks kaikutte fol’klorkollektiv vaumišti muziknomeran , tuli čoma koncert , mitte ihastoiti kaikid tulijoid .Azjtego ühtenzoiti erazvuiččid sugupol’vid , nece om hüvä voimuz popul’arizoitta vepsän rahvahan tradicijoid , veroid , kel’t .
Konkurs mäni Piterin agjan sijaližen ičeohjandusen komitetan tugel .
Vändod da bobaižed ühtel scenal
Veps
New written Veps