Texts
Return to list | edit | delete | Create a new | Statistics | ? Help
Natalja Antonova. Muhistes rupitgi oijetah
Natalja Antonova
Muhistes rupitgi oijetah
Livvi
New written Livvic
Sen
tietäh Anuksen kanzallizen muzein Eloksen ratas -teatrujoukkolazet .Ozutuszuakkunat tullah tovekse , a artistat ozutetah oigiedu elaigua da oigeihengiristittyzii .
Kylmykuun lopul Anuksenlinnan karjalankieline teatrujoukko ajeli Vieljärveh Karjalan Kielen Kodih ozuttamah uuttu spektaklii .Elettih-oldih -kolmevuitilline ozutus on täl vuvvel lavale pandu da on viijes teatrujoukon repertuaras .Ajelendu da ezitändy karjalazis kylis on Eloksen rattahan suurembii tavoittehii .
Veres ozuttelu on pandu laval Komin tazavallan kirjuttajan Aleksei Popovan lyhyččäzien kerdomuksien mugah da kiännetty iče artistoin kielineron vuoh .
– Iče artistat kai omat roulit kiännettihgi , muudu kieliabuu meil ei ni ole , sanelou ohjuaju , Karjalan tazavallan kul’tuurualan arvostettu ruadai Natalja Romanova . Joukkoh häi maltoi kerätä viizitostu karjalastu , kudamis nelli hengie on miesty – ani harvu kerdu rahvahan teatrois .Kai joukkolazet ollah penzielolijat rahvas da teatrah käyndy jogahizele on joudavan aijan vietto .Nygöi kai hyö ollah Anuksen linnan eläjät , roindu - da kazvandukohtikse mainittih Kapšoilan , Tahtahalan , Immalan , Jeroilan , Uutjärven .
Juumorine ozutus "Eletteih-oldih " 6+ jagavuu kolmeh : "On igävy akata ", "Suvel ", "Muhahtus ".Kai kuulutah kyläzuakkunoih , kudamat stuanivuttas kui Karjalas , mugai Komin mual .Akat soimatah ukkoloi , čakatah da sučitetah heidy , ga yksikai suvaijah , ominnu pietäh da žiälöijäh .Kyläs kaikin tietäh toine toizen elaijas , pietäh sidä kielen n’okal , ga midä pahua rodinou , hedi abuh tullah .Eräs sie mies lugi žurnualas , ku muhistes rupit rožil oijetah da rubei ainos muhizemah , ku akku ei sanos hänen rožii "adral kynnettylöikse da astaval astavoittuloikse ".Nagramah ruvettih kaikin yhtes ozutuksen kaččojienke , hyvä nevvo pädi elaigah .
– Vieljärveh da Karjalan Kielen Kodih pädöy tulla . Kerras nägyy , kaččomah tullah karjalazet , kuduat hyvin maltetah karjalua .Tänäpäigi rahvas nagrettih meijänke , autettih meidy , kommentiiruittih .Anuksen čupun karjalazet sežo ylen äijäl suvaijah meijän spektakliloi , ga sanon kohti , ku enimät kaččojat ollah jo ruavahat , ijäkkähät rahvas , sanelou ohjuaju Natalja Romanova .Toimindan jygevin puoli on mašinan suandu ajelendah nähte , teatran toimindua ei kannateta jen’gahuzin vallan puoles .Suuri vaigevus on karjalankielizen materjualan suandugi , karjalankielizii dramaturgoi meil ei ole .Sendäh enimät ozutukset ollah kiännetyt .
Muhistes rupitgi oijetah
Livvi
New written Livvic