Texts
Return to list | edit | delete | Create a new | Statistics | ? Help
Valentina Libertsova. Voinnougo olla ozavannu voinan aigah?
Valentina Libertsova
Voinnougo olla ozavannu voinan aigah?
Livvi
New written Livvic
Rikotutozat
Nikolai Zaitsev kuulluu sih
polveh , kudamal puutui kestiä voinan vaivat .Hänel on äijy omahistu da tuttavua , kuduat mustellah sen pahan aijan elaigua .Nikolai Petrovič maltau kuuneltus vallita omih kerdomuksih niškoi moizet kohtat , kudamien lugies hibjan kauheloittau da kyynälet silmih nostah .Mustoitammo erähät hänen kirjutukset , kudamis on ozutettu eriluaduzet voinan aijan kuvat .
"Velgu " (2008). Vuottamattah keviän huolettomal päivypastopäiväl , konzu pereh oli "kaikes kyllyös ", tiezi "ruavon dai aijan arvon ", jo algaili "unohtua voinua ", sil ozakkahal hetkel tuli kodih "tapahtumus’ , "sattumine ", "pete " – a sanuo oigiembi – "velgu ", "voinan velgu ": tuomen juuris , kattavunnuh mual , virui yksitostu vuottu miinanheittäijen unohtettu snar'uadu , kuduan petties kaivajes lekahutti labjäl kuuzitostuvuodehine brihačču Mišaine .Aino poigaine , čoma , ruadai , ravei , "täyzi briha i opastunnuh ".Suures tirpamattomas gorʹas kuolou Daša-muamo .Oppi tuattah viärittiä iččie lapsen surmas , ga misbo on häi viäry ?Viärittiä pidäy niidy , kel pidäy torat : "Rahvas vie tänäpäi ollah poliitiekoin da bohattoin käzis .Net sytytetäh voinu , kuolemah lähtietäh prostoit da köyhät rahvas ", kuduat ei voija vie pidiä heidy "aižois ".
Voinah niskoi ylen abei on Evakkoh-kerdomus (2008).Sit ollah ozutettu ihan meijän Anuksen čupun rahvahien enzimäzet hirviet voinan päivät .Omamualazet saneltih , kui opittiih pajeta valloittajis Venʹan sydämeh päi – evakkoh , ga eibo olluh sih lepitty ozua da lykkyy – ketgo puututtih nälgäh da atkalah , ketgo tuldih iäres omih kodiloih , kudamis jo elettih vihaniekat .
Riähkähizet-kerdomuksen (2015) piähenget Or'hoi nuoremban niistien "koukkujalgu " Vas'a-poijanke jälles voinua tullah omah kyläh , ga puututah elämäh vai kylyh – kodi on murendettu , jiädih voinale vahnembat poijat , harmani piä .Or'hoil "kaiken mielen täytti hengen rajatoi kibu da huigien tusku ".Naine viärittäy iččie , buitegu hänen nuorižon riähkien periä puutui pereh pilloih , ga viizas lugiju yksisama ellendäy – se on jygien aijan viga .
Nägemižeh , Tuulos !(2018)-kerdomus ozuttau abieloi alguvoinan aigoi , myöstyndypäivii , konzu Tuulos-joven rannan kauti piettih puolistustu nuoret brihat .Hyö oldih varuksis torah , gu ei laskie vihaniekkoi omale muale , ga eibo olluh kylläl nigo ammunduvehkehty , nigo syömisty , nimittustu putin abuu komanduičemizes : "näl'gy da väzyndy vaivai ", "kuavuttih miehet suulleh muale , jättäjen elämättäh dostalin eloksen ".
Ozatoi ajgu
Uvvele kirjutuksele , kudai oli vaste vai painettu Oma Mua-lehteh (n :t 17-21), Nikolai Petrovič on pannuh nimen "Ozatoi rakkahus ".Puaksumbah nämii sanoi käytetäh , konzu nuori neičykkäine mieldyy omah opastajah libo ohjuajah , libo nuori köyhy briha mieldyy neidizeh elokkahas da kuulužas perehespäi .Net ollah tuttavat juondehet mieron kaunehliteratuuras , teatras da kinos , kuduat vietäh piähengii toiči pahah tilah (se on sentimentalizmu ), a puaksumbi lykkyh , ozakkahah loppuh (happy end :ah ).
Nikolai Petrovič kerras čuglahuttau lugijoi 1942 vuodeh , Anuksen aloveheh , kus "oli hilʹlʹaine aigu ", suomelazet "saldatat da rakendaikompuaniet ruattih kaikenmostu ruaduo – strojittih dorogoi , sildoi , laukkoi " da "joudaval aijal " vähäzin lähettih paikallizien neidizien da naizienke .Midäbo sit ruat – luondo muga vedäy , voinalgi .
Suomelaine saldattu Yrjö Niemi da karjalaine tyttö Antonina Krupina tunnustutah da ielleh vastavutah monii kerdoi , ystävytäh da mielytäh toine toizeh ihan tavallizesti , buitegu ei ni ole voinua , ei olla hyö vastavuzih vihaniekkoin joukkoloih kuulujat .Mollei ollah nuoret , čomat , puttilizet , kunnollizet , sydämellizesti toine tostu arvos pidäjät .Heil on midä paista toine toizenke kogo yöt , eigo hyö kiirehtetä kaikis lähembih välilöih .Ellendetäh toine tostu , gu "kaksi vastavunnutu vastinehtu ".Niemi uskaldau naija da ottua Tonʹua Suomeh , omah pereheh , kus hänen sanoin mugah roijah kai parahat olot eliä yhtes , opastuo , löydiä hyvä ruado , kazvattua lapsii .Mieldynyöt muga eletäh omis mielis , ičentunnustuksis , toivotuksis , ga ni kerdastu heil ei juohtu mieleh , gu menöy voinu , kudai voibi eroittua .
Lugijat mielihyväl tarkaillah tapahtumii da uskotah , gu tulou aigu , konzu piähenget mennäh yhteh da ruvetah ozakkahasti elämäh – nengoine helly suvaičus ei voi loppiehes pahal !A konzu kačahtetahes kerdomuksen nimeh erähäs noumeras , hengästetähes : toinah mittuotgi kebjiet tuskat roijah , kuni voinu ei loppuh tule .
Net mielet keskustutah , konzu nuoret piätetäh mennä Antoninan muamalluo "suaha Sandran da Spuassu Syöttäjän blahoslovenʹnʹan heijän ozale ".Sen sijah pidi kuunella muaman čakkavot .Ylen painokkahil sanoil naine ilmoitti oman kieldävyksen tyttären miehelemenendäs vierahale .Mollei seizotah tabavuonnuon naizen ies "liikkumattah käzitysty ", heitetähes polvilleh , kuni muamo ei riuhtua tytärdy Niemen käis da rubie kyynälsilmis molimahes kiotan ies .Kirjuttai pani ozattoman muaman suuh moizet sanat , kuduat tavallizesti sanotah karjalazet naizet kazvajile da puuttunuzile pahoih tiloih lapsile , buitegu kuundeli rinnal : "Spuassu Syöttäi , midä sinä tyttäreni , täs nygöi pagizet .Pie mieldy , älä heittäi moizekse ...Eigo oma mua sinule ole kallehembi ?Älä tapa minuu täh ".Syväs pahas mieles briha lähtöy iäres .
Vastavukset kodvakse loppevutah , sit Niemi oppi "vie jälgimäzen kerran vastata tyttyö ."Häi keräi syväimeh kaiken nuoren miehen rakkahuon väin da hellyön , gu suaja Antoninan suostumah hänen tahtoh ". Ga tyttö kyynälis läbi kieldävyy armahas , häi ellendi muaman opastandat , tostihes , valličči oman muan : "Kui minä muaman blahoslovenʹnʹattah lähten ?Ei !..Ei muaman kieldo tuo meijän elokseh ozua ..."
Liennego olluh oza ?
Vie loppuu vuottajes oli himo toivottua , gu Niemi da Tonʹa vastavutah kymmenien vuozin peräs parembal aijal meijän mual libo Suomes , mustellah omua nuordu suvaičustu , sanellah , midä da kui kestettih erovuomizen aijan , toinah yhtytähgi varuamattah , ga eibo se olluh lepitty ...
Oldihgo hyö ozavat ?Kuibo ei !Vai kuni ei kačottu ymbäri – vai toine toizeh .Voinu sydihes heijän välih ihan kaikis ozavembal hetkel da sanoi oman kovan sanan , riutai ozan rakkahuos .Ga eigo muga olluh ammuzil aijoilgi ?A nygöi ?Muga roih iellehgi , kuni vai voinien sytytändy ei loppei ...
Voinnougo olla ozavannu voinan aigah?
Livvi
New written Livvic