Texts
Return to list | edit | delete | Create a new | Statistics | ? Help
Irina Sotnikova. Praznikkoncert kerazi sebranikoid
Irina Sotnikova
Praznikkoncert kerazi sebranikoid
Veps
New written Veps
Šokšun školan
istorii zavodihe vodel 1805.Neniš voziš škol pästi läz 10 sugupol’ved .Äjil pästnikoil škol voib ülendadas .Nügüd’ školas opendase 80 openikad i radab 19 opendajad .Nina Koren’kovan tarkal ohjandusel škol kehitoitase i sab hüvid satusid jo 10 vot .
– Meiden openikad päzuba korktoihe openduzerištoihe , pördase tagaze radmaha meiden külähä . Meil om aktivine škol , naprim ühtneda kaikihe azjtegoihe , ühthižvenälaižihe da rahvahidenkeskeižihe forumoihe , – sanui školan pämez’ .
Kacmata igäha škol om nügüd’aigaline , se kingitab noriden opendajiden homaičust .Hö toba školha uzid idejoid , nügüdläižid openduzmetodikoid , ut energijad .Kaik nece hüvin kožuse školan vanhoidenke tradicijoidenke .
Školas kaitas ezitatoiden kel’t , tradicijoid da kul’turad i anttas niid norile sugupol’vile .Openikad aktivižesti ühtneba erazvuiččihe regionoidenkeskeižihe konkursoihe , festivalihe , konferencijoihe , surel tahtol jagase tedoil ičeze rahvahas i tetabiš vepsän man ristituiš , ozutaba vepsän kelen tedoid .
Vepsän kelen opendai Gleb Fomin mahtab mel’dütoitta lapsid vepsän kelen urokoil .Hän kävutab nügüdläižid tehnologijoid , interaktivižid programmoid da vändoid vepsän kelel .Lapsed navediba hänen urokoid .
– Minun täht škol znamoičeb lujas äjan , škol om minun südäimes . Om hüvä , miše täs mäneb sur’ rad vepsän rahvahan istorijan , kul’turan da kelen kaičendan täht .Mö lapsidenke tegem äi melentartuižid projektoid , kävutam nügüdläižid tehnologijoid , muga lapsile om melentartuižemb i kebnemb opeta kodikel’t , – sanub Gleb Fomin .
Tal’vkun 5. päiväl školas mäni praznikkoncert .Praznikale kerazihe valdmehed , školan pästnikad , veteranad , opendajad , adivod susedkülišpäi da Petroskoišpäi .Školan kollektivale sanutihe äi lämid da hüvid sanoid .A opendajad ühtes openikoidenke vaumištiba adivoiden täht čoman programman .Hö eziniba ühtel scenal – vaumištiba karguid , pajoid , runoid da ihastoitiba adivoid teatrozutelusil .
– Mö tulim adivoihe ozatelmaha meiden sebranikoid čoman jubilejanke . Sanum sur’ spasib , miše jo äi vot mö sebrastam , abutam toine toižele .Opendajile da openikoile mö toivotam äi uzid , melentartuižid azjoid , hüvid tedoid , tervhut , ozad da armastust !– sanui Kalagen školan pämez’ Svetlana Gotič .
"Kodima "-lehtesen radnikad toivotaba školale uzid satusekahid projektoid , sädajid openikoid , satusid vepsän kelen da kul’turan kaičendas !
Praznikkoncert kerazi sebranikoid
Veps
New written Veps