Texts
Return to list | edit | delete | Create a new | Statistics | ? Help
Valentina Libertsova. Luadogan puolististandu
Valentina Libertsova
Luadogan puolististandu
Livvi
New written Livvic
Alavozen kulʹtuurutalois 14. ligakuudu
piettih Alavozen kyläläzien kerähmö , kuduas šeikuittih Luadogan tuliedu ozua .
Luadogu on kaikis suurembii , puhtahii da kuulužii Venʹan järvilöi .Sen čomuttu ihasteltih äijät runoilijat dai taidoilijat .Sen rannoile tullah huogavumah monii ristittyzii ei vai yhtes Alavozen kyläs da Anuksen piirispäi – sih tavoitellah azuo omat huogavopaikat suurien linnoin yrittäjät .
Syyskuun lopul Alavozen kyläkunnan haldivoh tuli Karjalan Luonnonvaroin da ekolougien ministerstvaspäi tiijoneččokirjaine sit , mittumat Luadogan rannikon paikat ollah kyzyttävät paikallizien eläjien keskes , ku suas ottua sen huomavoh muapaloin hol'otandukauppoi pidäjes .Alavozen kyläkunnan haldivon piälikkö Irina Filina piätti avata tämän informatsien rahvahale , kehoitti andua Luadogan rannikole erikseh vardoittavan alovehen stuatusan da kyzyö rahvan mielii .Kaikin hyväl sydämel otettih se vastah .Jo ennepäi iäneständäh sotsialiverkos yhtyi 2492 hengie .Jänestännyzis 93,86% ei suostuttu vierahih käzih muapaloin annandah .
Kyläläzien kerähmöh 14. ligakuudu kerdyi täyzi zualu rahvastu .Irina Filina ylen hyvin varustui paginanpiendäh , tarkah sellitti , midä suau da midä ei sua ruadua erikseh vardoittavil alovehil .Sanommo , vierahile voibi andua vuograh (ei myvvä !) muapalat suuris maksolois da vuogrates pidäy noudua kovii siändölöi .Ezimerkikse , vuograil ei sua panna aidoi , salvata läbimenoloi järveh päi , kuadua puuloi .Jiäy mahto kaikil tulla huogavumah , keriämäh muarjua da gribua , ongittamah vahnoi dorogoi myö .Rahvas kyzyttih , kui sit ielleh roih puhtastandan da toppien kabrastandan kel .Irina Filina vastai , gu sidä tarkastua sežo roih helpombi , da vie voijah tulla abuh meččänvardoiččijat .Häi ozutti kartal kaiken Luadogan rannikon , sen myödäh on jo nelli rauhoitettuu alovehtu , niilöi tarkastau valdivo .Dostalit "valgiet kohtat " Pitkänrannan piirin rajassah da toizes puoles Andrusovassah , kudai kuuluu Pižin rauhoitettuh aloveheh , voibi azuo erikseh vardoittavan alovehen stuatusan vuoh Anuksen piirin tazol .
On vie yksi viga , kuduah niškoi eriže sanoi Irina Filina , mindäh ei sua Luadogan randoi andua yksittäzeh ižändöiččemizeh .Täs Suuren Ižänmuallizen voinan aigah mendih suuret torat , niilöin jället ei olla loppussah kabrastettu , ei vie tässäh joga kohtu ole piästetty miinois , vie tuhanzii saldattoin da tehniekan jiänoksii virutah muas da suolois vien ual .Ečindy da kaivandu , niilöin muah panedu da omahizien eččoruavot mennäh alalleh , ga ei vie terväh loppevuta .
Rahvas , kuduat tuldih kerähmöh , yksimielizesti annettih omat iänet armahan Luadogan vardoičendah da säilytändäh niškoi .Nägyy , gu korgiet gostʹat da Videlen čupun eläjät ollah yksii mielii Alavozenke .
Anna iellehgi neče ruado menöy selgieh da lykykkähäh .Vägie da keständiä oigies ruavos .
Luadogan puolististandu
Livvi
New written Livvic