Texts
Return to list | edit | delete | Create a new | Statistics | ? Help
Valentina Libertsova. Saše karjalakse
Valentina Libertsova
Saše karjalakse
Livvi
New written Livvic
Toiči
vilul pimiel talviyöl vuottamattah tulou mittuinegi kivistys – hambahien , vačan , sivun , polven …Et tiijä , midä ruadua : ei ainos satu pädeviä rohtuo , et kuvittele , kui tirpua huondeksessah …On ihan prostoi , ilmaine keino , kuduan jogahine voibi azuo kezäl iče .
Saše , libo sašet frantsien kielen mugah , kuspäi se on laihinoittu , on huavoine libo pieluksut kaikenjyttyzil hyväle tulijoil ainehil täytetty .Sidä potakoijah panna sobih , magavosijoih , pieluksen alle libo rinnal , gu olis hajužu duuhu da hyvä , huoletoi uni .Niidy puaksuh myvväh suvimualois , kus kazvau mostu hajužua heiniä da kukkua .Jälgiaijal , konzu Krimas dai toizis Venʹan suvičuppulois ruvettih kazvattamah lavandua peldoloin verran , moizii huavozii myöjät ruvettih nevvomah gu kivistyksis piästäjii keinoloi .Tiettäväine , hindugi kazvoi suurembakse , rohtoloin verrale .Ostetah pohjazis mualois eläjät ristittyöt da ni smietitä ei , vikse , gu meilgi kazvau mostu kibielöis piästäjiä heiniä .
En tiijä , kus da keslienne mama-rukku tiijysti tämän mielen , nygöi jo et kyzy , ga jätti ilmanigäzen luotettavan abuniekan , kuduah ylen mielyin dai kuduadu kehoitan toizile .Se on gu toven saše , vai täytetty joga meijän mečäs kazvajal štanajalguheinäl .Venʹakse se on paporotniekku , dai Venʹal sidä ečittih Iivananpäivän yöl kukkijannu , uskottih , gu sit ozuttau uardehen kohtan libo tuou ozua neidizile .
Karjalazil moizii uskoloi ei olluh .Buabo niityl lykii varboi bokkah heinispäi , kurketti : lehmät ei syvvä , kargiet ollah , puuttunou petties , sit maijot kargiet roijah .Grigorii Makarovan sanakniigas lövvin virkehen : štanajalgua kannoimmo leviteksekse .Sie lövvin vie toizen nimen – kukinbarbu .Nygöi gu emmo pie žiivattua , sit leviteksekse niidy ei pie .Erähät naizet istutetah štanajalguheinät tuhjozilleh kodiloin pihoih kukkien keskeh , se toven čomendau ymbäristön .Sašen karjalakse azuttavakse mečäs štanajalgua löydiä voibi .
Ei maksa mennä ottamah piädykauti .Konzu täytättö rengit da komšat marjal da grival , kačahtuattokseh ymbäri .Uskon , kerras näettö vihandat , madalazet tuhjozet čomien lehtienke .Riutokkua da keräkkiä yskäh , vediä dai kandua ei roija jygiet .Etto tahtone revustuo mustah , keräkkiä kezän aloh , älgiä jätäkkiä syysaigah .
Kodih tulduu levitäkkiä pilvežäh kohtah avvonazel ilmal , kus vähäzel tuulou .Sit štanajalguheinät kuivetah teriämbi , nedälizen aloh , da ei muga terväh mureta pieluksen sydämes .Gu terävät varvat muates ei satatettas , parembi roih hilʹlʹakkazin kiškuo tuorehis libo kuivattulois heinis lehtet da vai net panna pieluspiälizen sydämeh .A kovat varvat voibi lykätä libo poltua .
Pieluspiälysty parembi on ommelta kaksi : sydämeh kovembas , plotnois materjulas , sih ei maksa vallita čomua da uuttu .Heinät pidäy tungie näbieh , hyvin ommelta rago .A sit vaste panna piäliči kaunis , hyvä pieluspiäline .Oppikkuattos nʹuustua !Ei verdailei nimittuzen lavandanke , kuduas pidäy maksua , kudai pidäy tuvva loittozes muaspäi , kudual on vieras duuhu !
A yöl tulluzis kivistyksis toven avvutau , jo en yhty kerdua piässyh .Puaksuh huondeksel jo ei jiä ni jälgie niis pahois .Pangua vai kunnegi magavosijan rinnal , gu voizitto pimies tavata da painua kivistäjäh kohtah .Sit kaksi vuottu voitto eliä suremata .Älgiä varakkua , gu pielus laihtuu , hienozekse murennuot lehtyöt ei kaimata parandamizen ominažuksii .Lujua tervehytty kaikile !
Saše karjalakse
Livvi
New written Livvic