Texts
Return to list | edit | delete | Create a new | Statistics | ? Help
Olʾga Smotrova. Geolougii kuvis lapsih niškoi
Olʾga Smotrova
Geolougii kuvis lapsih niškoi
Livvi
New written Livvic
Geolougu
Sergei Svetov da taidoilii Anna Danilova ielleh tuttavutetah školaniekkoi Karjalan geolougieh .
Vuvven 2025 lopus on piässyh ilmah Karjalazien elättilöin tiijolline matku -komiksoin toine kniigu ven’an kielel .
Ven’an tiedoakadeemien Karjalan tiedokeskuksen geolougien instituutan piälikkö Sergei Svetov sanoi , ku mieli luadie moine kniigu rodih sen jälles , konzu instituutan ruadajat piästettih ilmoih tiedokniigan-matkuoppahan aiguhizih niškoi : "Karjalan geolougine perindö ", i se kniigu rodih Karjalan tazavallan Vuvven kniigakse Tiijon valgei -nominatsies .
– Matkuoppahan kauti myö opimmo prostoih tabah sellittiä ruavahale rahvahale mieldykiinnittäjii geolougizii maršruuttoi . Piätavoittehennu oli se , ku Karjalan geolougies tiijustas enämbi rahvastu .Minä ellendin , ku pidäy ruveta sanelemah geolougies lapsilegi .Materjualu pidäy olla ellendettävy , lyhyt da mieldykiinnittäi , sanou Sergei Svetov .
Täs uvves kniigas on tieduo Vuottovuaras , Kehnon stuulas , Girvas-tulimäis , Martsial’nois vezilöis , Jalomäis , Valgei Mägi - da Šun’ga-kylis .Komiksoin enzimäzes kniigas , kudai piäzi ilmah vuvvennu 2022, oli tieduo stromatolitois , järviruvas , Kivač-koskes , Uuksun kiviruoppahas , Ruskeala-mägipuustos da Petroskois .Ezimerkikse , nenga paistah komiksoin personuažat Šun’ga-kyläs olles :
Igor’ok-joža : Hiili !
Mit’a-kondii : Ei , se on šungit .Se ei pala , a sen läpetyksen tazo rippuu sih kuulujan uglerodan miäräs .
Komiksoin prezentatsii piettih Käytöllizien ekolougiellizien tutkimuksien muzeis , kuundelijoikse oli kučuttu školaniekat .Lapset mielihyväl vastattih Sergei Svetovan kyzymyksih .
– Oligo kaksi miljardua vuottu tagaperin kaloi vezistölöis ?
– Oli , vastattih kai lapset .
– Ei olluh ! Kalat roittihes täl ilmal vaiku 300 miljounua vuottu tagaperin ! vastai Sergei .
Joga lapsi sai lahjakse komiksoin mollembat kniigat .Uvven julgavon luadimistu on kannatannuh Karjalan piämiehen grantufondu Karjalan kivine aigukirju : geolougizen , kaivos - da tevolližuon perindön popul’arizatsii -projektan mugah .
Geolougii kuvis lapsih niškoi
Livvi
New written Livvic