Texts
Return to list | edit | delete | Create a new | Statistics | ? Help
Uljana Tikkanen. Karjalan piämieš palkičči Karjalan viestimien ruatajie
Uljana Tikkanen
Karjalan piämieš palkičči Karjalan viestimien ruatajie
Karelian Proper
New written karelian
Venäjän
lehistöpäivänä Karjalan piämieš Artur Parfenčikov piti perintehellisen vaštautumisen lehtimiehien kera .Joukkoviestimien ruatajat šuatih palkintoja , niijen luvušša on ni Periodikakuštantamon toimittajie .
Venäjän lehistöpäivyä vietetäh 13. pakkaiskuuta .Šinä päivänä Artur Parfenčikov palkičči Karjalan joukkoviestimien ruatajie ta hyvitteli heitä ammattipruasniekalla .Vaštautumini piettih Karjalan tašavallan kanšojen yštävyön talošša .
Pruasniekkatilaisuošša Artur Parfenčikov piti pakinua ta korošti , kuin tärkie on kehittyä joukkoviestimie nykyaikana .Median toimittajat , ohjuajat , kuvuajat – kaikin , ket ruatah viestimissä – autetah Karjalan eläjie tiijuštamah tašavallan piätapahtumista .
– Ruvekka panomah voimie juuri kulttuurin kehittämiseh , urheiluh , opaššukšeh ta tietyšti šuurta huomijuo antamah joukkoviestimillä , kumpaset nyt kehitytäh internetissä . Niijen avulla mie niise šuan tietyä lisyä , mitä tašavallašša tapahtuu ta voin ruttoh ratkaissa proplemoja .Viestimissä šuurimpua huomijuo aina šuahah kriminaliset teemat ta ušeičči niistä kirjutetah niin , jotta veri kylmenöy .A meijän pitäy ruatua äijän , jotta ne teemat šynnytettäis enemmän ošanottuo ta myötätuntuo .Jotta viestimissä olis enämpi hyvie uutisie ta kulttuuriteemoja , korošti hyvittelyšanoissa Artur Parfenčikov .
Lisäksi piämieš muissutti , jotta tämä vuosi on Kanšojen yhtevyön vuosi ta vuotena 2027 on karjalaisien rissinnän 800-juhlavuosi , ta toivo kaikilla hyvie materialija näistä teemoista .
Korkiešta ammattitaijošta ta panokšešta tašavallan viestimien kehittämiseh Karjalan tašavallan anšijoitunut lehtimieš -arvonimi šuatih GTRK "Karelia " -TVta ratijoyhtivön kakši toimittajua – ratijolähetykšen palvelun piälikkö Marjana Aleksandrova ta kanšallisen toimitukšen ruataja Julija Petunova šekä Belomorskin Belomorskaja tribuna -piirilehen piätoimittaja Natalja Otčenaš .
– Kiitän kaikkie , ket ehotettih ta ket hyväkšyttih miut tämän korkien nimen šuatavakši . Mie piäsin ammattih , ratijotoimitukšeh , šattumalta yliopiston viijennellä kurššilla opaštuos’s’a .Nyt ruan televisijotoimitukšešša ta toičči ikävöičen ratijuo .Tahon panna merkillä , jotta još miun ruato oli korkiešti arvoššettu , ni še on merkki , jotta koko toimitukšen ruato oli niise merkitty .Meijän toimitukšešša ruatah korkietašoset spesialistit , hyö ollah kielitietäjät ta niise šananmuasterit .Yheššä myö luajimma kunnon materialija kaččojie varoin , kumpaset ollah meijän apulaisie ta arvoštelijie , šano Julija Petunova .
Šuurista šuavutukšista Karjalan tašavallan ieššä metalilla oli palkittu Sever-lehti , mi on šuuri palkinto kirjallisušlehen 85-juhlavuotena .
Periodika-kuštantamon ruatajat niise ollah palkinnon šuajien joukošša .Karjalan piämiehen kunnivomerkillä oli palkittu Oma Mua -lehen toimittaja Marija Remšujeva , Oma media -portalin vaštuullini šihteeri ta Karjalan Sanomat -lehen toimittaja Margarita Pehkonen šekä Karjalan Sanomat -lehen toimittaja Anna Sidorova .
Kiitoškirjaset šuatih Kipinä-lehen toimitukšen ruatajat : piätoimittaja Jana Filimonkova , toimittaja Galina Baburova ta taiteilija Margarita Jufa .
Artur Parfenčikov kiitti kaikkie toimittajie ta toivotti uušie šuavutukšie ta mukavie materialija .
Karjalan piämieš palkičči Karjalan viestimien ruatajie
Karelian Proper
New written karelian