Texts
Return to list | edit | delete | Create a new | Statistics | ? Help
Uljana Tikkanen. Antilaš, mitä šilma vuottau?
Uljana Tikkanen
Antilaš, mitä šilma vuottau?
Karelian Proper
New written karelian
Karjalaisen
antilahan piäaikua – jiähyvyämisie vanhempien kojin kera ta šiirtuo uuteh taloh näytettih lyhyöššä Antilaš-filmissä .Šen enši-ilta piettih Petroskoissa pakkaiskuušša .
Filmin valmistaja-ryhmä on Filippovien ta Varlamovien perehet .Etno-projektien johtaja Julija Filippova kehotti omua perehtä kuvaukših , hänen vävy F’odor Varlamov tuli kuvuajakši ta ohjuajakši , nuorempi Anni-tytär – antilahakši , vanhempi tyttö Kristina – antilahan čikokši , a iče Julijašta tuli antilahan muamo .
Perehen yštävät tultih avukši ta niise ošallissuttih kuvaukših .Kuvaukšet oli šuunniteltu ruttoh ryhmän omin voimin .
– Milma varoin še on tärkie tapahtuma , šentäh kun jo moničči annoin granttianomukšie . Viimeseššä granttikilpailušša projektilla ei riittän vain yhtä pistehtä , jotta alottua projekti filmin kuvuamiselta ta jatkua šitä kirjan luatimisella , šano Julija Filippova .
– Julija kyšy ošallistuo filmin valmistamiseh ta mie kirjutin käsikirjutukšen , kuvasin ta valmissin videoistorijan šemmosella tavalla , kuin iče ymmärrin kirjojen ta L’udmila Tihonovan kertomukšien mukah . Mie näytin tapahtumie ennein häitä , mitä oli antilahan kera .Myö kuot’t’elima näyttyä šuurimman ošan ritualiloista , ka onnistu näyttyä vain pieni oša niistä , šelitti F’odor Varlamov .
Valmissušruato kuvaukših ta kuvaukšetki piettih Vuokkiniemeššä .Filippovien šuurešša talošša luovan ruavon aikana ei issuttu kiät rississä : piti valmistua pukuja , opaštuo šanoja karjalakši , valita paikkoja kuvaukših .Kallehie n’euvoja anto perintehien tietäjä ta kotišeutututkija L’udmila Tihonova .
– Myö pakasima F’odorin kera ta mie ymmärrin , mitä hiän vuottau miulta . Oli mukava , jotta myö näkimä käsikirjutušta , ka kuvaukšien aikana emmä malttan , mitä tulou ielläh ta missä filmin kohašša tämä oša lienöy .Emmä ymmärtän , mi yhtehini tuloš näistä pätkistä tulou , kertou Anni .
Lyhyt filmi keštäy yhekšän minuuttie ta näyttäy , jotta hiät karjalaisilla ei ole pruasniekka , a ritualini šiirto omašta pereheštä miehen pereheh .
– Piätavoiteh oli antua kaččojilla ymmärtyä , mitä antilaš tuntou , kuin hänen kera pietäh ritualija tuaton koista pois lähtiessä ta nyt hiän on tuntomattomuon kynnykšellä , šanelou filmin ohjuaja F’odor Varlamov .
– Anni oli antilahan roolissa . Hiän šai näyttyä kaččojilla oman šankarin tuntehie ta huolija .On tärkie , jotta myö näyttimä ritualija , kumpasie himottau kaččuo uuvveštah , jotta ymmärtyä , mintäh juuri šiih oli annettu huomijuo .Yhekšän minuuttie , kumpaset opaššetah kaččojie uuteh , lisyäy Julija .
Filmin enši-ilta oli pietty pakkaiskuušša Petroskoissa .Oli näytetty filmi ta šiitä oli pakina luovan ryhmän kera .Kaččojat lämpimäšti otettih vaštah filmie ta kannatettih šen luatijie hyvillä šanoilla , toivotettih uušie projektija ta festivalija .
– Tuli oikein totini filmi etnografiselta puolelta ta vielä ni psihologiselta . Filmin jälkeh joka kohta oli šelitetty .Šankarit paissah filmissä karjalakši , on venäjänkielini tekstityš .Mie yritin lukie šitä , ka ruttoh lopetin , tahoin kiinittyä huomijuo filmin ilmapiirih .Kun filmi pannah internettih , kačon šitä vielä monta kertua , kirjutti omalla VK-šivulla Irina Rinkevič .
Tuiskukuun 13. päivänä filmi esitetäh Koštamukšen Sreda-keškukšešša ta 14. tuiskukuuta šuunnitellah panna filmi internettih , jotta joka kaččoja šais nähä šitä .
Luovalla ryhmällä on äijän ajatukšie ta idejoja , kuin kehittyä filmien kuvaukšie , jotta näyttyä perintehie šelväšti kaččojilla .Filmin luatijat ollah varmat , jotta tulovaisuošša luova ryhmä vielä kašvau ta ajatukšien toteuttamiseh tulou enämpi mahollisukšie .
Antilaš, mitä šilma vuottau?
Karelian Proper
New written karelian