Texts
Return to list | edit | delete | Create a new | Statistics | ? Help
Ol’ga Dubitskaja. Pohjazentiähti eläy Petroskois
Ol’ga Dubitskaja
Pohjazentiähti eläy Petroskois
Livvi
New written Livvic
Pohjazentähti-kilvas Jekaterina Jevsejeva tiijusti
petties 2015 vuvven lopus da työndi sih omua runuo , tahtoi oppie oman ičen vägie da n’eruo ."Pohjazentiähti " on vuvves 2009 piettävy Sever-žurnualan literatuurukilbu . "Sever " on kogo Ven’al kuulužu yhteiskunnallispoliittine da literatuurutaidolline julgavo . Tämän kilvan piätavoittehennu on nuorien – 15 – 37-vuodehizien – kirjuttajien eččimine da niilöin tevoksien arvostamine , ku jällespäi parahimat niilöis tevoksis vois painua Sever-žurnualah .Paiči sidä kilbuniekat voijah yhtyö Moskovas olijan Gor’koin nimizen literatuuruinstituutan seminuaroih da jogavuodehizeh Lipki-linnas piettäväh nuorien kirjuttajien fourumah .
Pohjazentiähti-kilbu
Ei muga ammui loppih vuvven 2015 kilbu , kuduas oli kuuzi voittajua – kolme runoiliinominatsies : piiterču Denis Balin , moskovalaine Aleksei Gušan da Jekaterina Jevsejeva Petroskoispäi da kolme prouzan kirjuttai -nominatsies : kondupohjalaine Anna Sosnova , Aleksandr Tihonov Omskan alovehel da Jelena Tuluševa Moskovaspäi .Heijän tevoksii ruvetah painamah lugiettavakse Sever-žurnualas vuvvennu 2016.
Omas kirjuttamizes
Nygöi Petroskois eläi neidine on rodužin Sortavalaspäi .Sie Jekaterina algoigi kirjuttua runuo .Jekaterina jo ennepäi oli erähien lapsien da nuorižon literatuurukilvoin voittajannu .Pohjazentiähti-kilvas Jekaterina tiijusti petties 2015 vuvven lopus da työndi sih omua runuo , tahtoi oppie oman ičen vägie da n’eruo .
Kat’a ei voi mustoittua , konzu häi rubei kirjuttamah runuo , vaigu voittajan diplomat autetah juohattua , ku jo vuvvennu 2000 Jekaterina yhtyi kirjutuskilboih .Sil aigua oli keksitty äijy runuo , ga ei kai oldu kirjutettu .Monet runot ei olla mieldy myöte , sendäh Kat’a ei kirjuta niidy bumuagale , toiči kai ponnistelehes unohtua erähät runot .
"Igävyön runoilemine "
Konzu kyzyin , mittumih tiemoih sinä kirjutat , Jekaterina vastai , ku kirjuttau enimyölleh suvaičukses da ristikanzoin välilöis , luondoh nähte hänel on ylen vähä runuo . Kaikis enimäl suvaittavua aihiedu Katerinal ei ole .Suurin oza Jekaterinan runolois on igävät sendäh , ku rahvas enimyölleh kirjutetah igäväs , atkalas .
Kyzymykseh tahtozitgo kirjuttua mistahto vesseläs , ilos , Kat’a sanoi : "Tilavuksen mugah en kirjuta .Muga oli vaiku kaksi kerdua da nimidä hyviä sit ei roinnuh ."
Katerinan sanoin mugah ei ainos runolois kuvastu ristikanzan sydämen olo .Toiči Kat’a kirjuttau runuo vierahien , vakkinazien ristittyzien tundolois .
Nygöi Katerinan lembiruno , kuduan häi iče kirjutti , on "Streletskije žonki ".Tämä runo kerdou tietys istourien tapahtumas – piššalimiehien tapandas .Sie oldihgi tundemattomat da unohtetut personuažat , kudualois niken nimidä ei tiijä .Hyö elettih , a mi rodih heil ukkoloin surmattuu , niken ei tiijä .
Lembirunoilijas da kirjutusviritekses
– Iče minä suvaičen "hobjazen aijan " runoilijoi – Nikolai Gumil’evua , Anna Ahmatovua , Marina Tsvetajevua , Osip Mandel’štamua .Suvaičen klassikkua – Mihail Lermontovua , mieleh on Nevvostoliiton aigaine runoilii Iosif Brodskii , sanou Katerina .
– Kirjutusviritesty löydyy ei muga puaksuh . Olettelou , ku nimidä en kirjuta , olettelou , ku kirjutan kerras äijän , jatkau neidine .
Runot da muuzu
Omua runuo Jekaterina ei suvaiče ozuttua .Omile da dovarišoile häi nikonzu ei luve omii runoloi .Häi voi ozuttua omii tevoksii vaigu silloi , konzu ei näi rahvahien reaksiedu libo konzu ei tiija ristikanzua , kuduale lugou omua runuo .Sendäh Katerinal kebjei on työndiä omua runuo kilbah .
Muuzua Kat’al ei ole .Häi duumaiččou , ku olis olemas kaikkeh pättävy kirjutusvirites , vois kirjuttua hos sada runuo päiväs .
Löydiä kirjutusvirites da kirjuttua runo on vaigu puoli ruaduo .Sit pidäy äijän kerdua kohendua sidä , mi on kirjutettu .
Katerina on ylen huijustelii ristikanzu , sendäh äijät hänen dovarišat ei tietä , ku häi kirjuttau runuo .Nygöi heil on mahto tiijustua , ku heijän rinnal eläy runoniekku .
Pohjazentiähti eläy Petroskois
Livvi
New written Livvic
–
Dubitskaya, Olga
Северная звезда живёт в Петрозаводске
Russian
–