Error:
Недостаточно прав на выполнение этой операции
Texts
Return to list | edit | delete | Create a new | Statistics | ? Help
Ol’ga Dubitskaja. Suuri pido Karjalan Kielen Kois
Ol’ga Dubitskaja
Suuri pido Karjalan Kielen Kois
Livvi
New written Livvic
Petroskoin
Kanzallizien kul’tuuroin keskukses jo mondu vuottu kuuluu karjalan pagin kielikursiloil .Tänä vuon oli kai kolme vuozikursii .
Karjalan kieldy rakkahal
Petroskois ligakuus sulakuuh suate pietäh karjalan kielen kursiloi , kudamis opastetah karjalan kielen kahtu murrehtu – vienankarjalua da liygii .Vienan murrehtu kolmel vuozikursil opasti Jevgenii Karakin .A liygiläzil oli kolme opastajua – enzimästy vuozikursii opasti vaste yliopiston loppenuh Anastasija Afanasjeva .Tostu da kolmattu vuozikursii opastettih Tatjana Baranova da Ol’ga Ogneva .
Vuvven aloh kursuniekat opastuttih karjalan kieldy , paistih , pajatettih , käydih spektakliloile da kižattih .Yhten kursuniekoin joukon ruavon tuloksennu rodih retseptukniigaine , kuduah kerättih opastujien retseptat .Toine kursuniekoin joukko luadi prezentatsien omas opastundas da ozutti sen kaikile toizile kieldy opastujile .
On hyvä , ku karjalan kielen kursiloile kävväh eri-igähizet rahvas – školaniekat , yliopastujat , keski-igähizet da eläkkeheläzet .
Lopus kiitos vuottau
Suovattan , 14. oraskuudu , Karjalan Kielen Koin emändy Nina Barmina vastai karjalan kielen kursuniekkoi .
Sinä piän Karjalan Kielen Kodih kerävyi vähiä vajai 50 hengie .Niilöin joukos oldih karjalan kielen kursiloil opastujat da opastajat , Paginkanzu-kluubah käyjät da Karjalan Rahvahan Liiton rahvas , Petroskoin valdivonyliopiston enzimäzen vuozikursin opastujat da omamualazet .
Aijoi huondeksel rahvas lähtiettih autobusal Vieljärvele Kanzallizien kul’tuuroin keskuksen pihas .Matku sinne oli vessel – rahvas paistih , musteltih karjalan kielioppii da sanastuo , kuunneltih da kai pajatettih Tatjana Baranovan karjalakse kiännettylöi pajoloi .
Karjalan Kielen Kois gostii vastai Nina Barmina .Koin emändy da hänen abuniekat karjalazen perindön mugah käskiettih gostii stolah , juotettih čuajul da syötettih magieloil piirualoil .Sit kaikin kerävyttih suureh zualah , kus Nina Petrovna kerdoi KKK :n mieldykiinnittäjiä histouriedu ihan allus .Inehmine pagizi karjalakse , erähät kursuniekatgi ruohtittih kyzyö karjalakse sih nähte , mi kiinnitti heijän mieldy .
Sit kursuniekoil da kaikil , ket kerävyttih sinä piän suureh kodih , oli karjalan kielen tutkindo .Karjalan kielen opastajat da Karjalan Rahvahan Liiton piälikkö Natalja Vorobei annettih opastujile omat keksityt harjoitukset ruattavakse .Kaikin huolestuttih , kui školaniekat tovellizes tutkindos .
Koittehen jälles oli pruazniekalline kursiloin lopendan tovestuksien andamine .Opastajat iče javottih tovestuksii omile opastujile .
Sen jälles KKK :n gost’at voidih kaččuo kodii .Enzimäzes kerrokses kai tilat ollah jo valmehet , nygöi pidäy ottavuo ruadoh da suaja kundoh koin toine kerros .
Siä oli hyvä da poudu , sendäh piätettih siirdyö pihale .Pihal suomelas-ugrilazien filolougien ozaston enzimäzel vuozikursil opastujat tytöt Aleksandra Solovjova da Jana Lorvi pajatettih da pläšittih .Sit čomih karjalazih ruuttih šuorivunnuot tytöt opastettih kaikkii tansimah kadrielii da muudu vesseliä tansii .
Tämän vesselän päivän lopus kaikin kerävyttih Karjalan Kielen Koin edeh , luajittih yhtehine fotokuva mustokse da hyväl mielel lähtiettih järilleh Petroskoih .
On hyvä mieles tiediä , ku rahvas rakkahal tahtotah opastuo karjalan kieldy , tahtotah tiediä omien ezi-ižien kieldy .Tulien vuon Karjalan Rahvahan Liitto uvvessah rubieu pidämäh karjalan kielen kursiloi .Tulgua terveh opastumah karjalan kieldy !
Suuri pido Karjalan Kielen Kois
Livvi
New written Livvic