Texts
Return to list | edit | delete | Create a new | Statistics | ? Help
Uljana Tikkanen. Šukupuu, kumpani yhisti kakši perehtä
Uljana Tikkanen
Šukupuu, kumpani yhisti kakši perehtä
Karelian Proper
New written karelian
Pakkaiskuun 31. päivänä
mie juhlin elämän yhtä tärkeimmistä pruasniekoista – häitä .
Valmmissuš juhlah alko yli puoli vuotta takaperin .Myö šulhasen kera halusima luatie lämpimän ta šuuren pruasniekan , mi koroštais , kuin tärkietä ta kallista on kaikkina aikoina muistua omašta šuvušta , pityä huolta pereheštä ta elyä rakkahuošša .Šitä varoin piti olla minih alkupisteh , mistä šais alottua koko tapahtuman istorijua .
Mie en muissa , kuin tuli piäh ajatuš valmistua šukupuu .Šitä varoin oli hyvä pohja – miun pereheššä on äijän vanhoja valokuvie .Vanhemmat šäilytetäh tietuo šuvušta , a šulhasen šuvušta himotti šuaha tietyä enämpi .
Muissan , kun Ympyrät vejellä -festivalissa milma šyväšti vaikutti tunneh , puitto Venehjärven entiset eläjät kačotah pruasniekkah valokuvista , kumpaset riputtih mäntyjen välillä .Šiitä piäh šynty ajatuš , jotta meijän kantatuatot oltais varmašti ilosina , kun šuatais tietyä jälkiläisien onnellisešta tapahtumašta – yhtehmänöštä .
Kešän viimesenä päivänä myö läksimä meččäh – eččimäh šopivua puuta .Kotvan piäštä löyty kuatunut mänty ta šen latva oli ihan šopiva , jotta yhteh puoleh panna miun šuvun valokuvie ta toiseh šulhasen perehen kuvie .
Toini homma oli tuuvva latva kaupunkih ta panna kuivumah autotallih .Koko šykyšy puu šeiso tallissa ta konša še oli kuiva myö šahasima pois liijat okšat ta koristima puun hienosella valoket’ulla .
Tuli aika valita valokuvie ta še oli kallehin aika .Myö äijän pakasima muamon , tuaton ta šukulaisien kera .Pakinoissa avauvuttih perehistorijat , äšen löyvyttih uuvvet šukulaiset-vepšäläiset .
Talvikuun alušša mie olin pakauttelušša Valentina Kertsovan ta hänen Nataljamuamon kera .Hyvä lukija , šie varmašti muissat tekstie vepšäläisistä kalitoista (nro 49, 2025).Pakinašša Natalja kerto oman šuvun tutkimukšešta ta korošti , jotta kaikki , kellä on šukunimi P’antukov tahi Pentukov ollah šamua šukuo .
Konša mie valičin valokuvie puuta varoin , mie kyšyin tuattuo kirjuttua kaikki tiijot šukulaisista .Varmašti voitta kuvitella , kuin šuuri oli miun ihaššuš , konša mie nävin , jotta tuaton ämmön , miun pravoämmön šukunimi on Pentukova .Näin mie šain tietyä uušista šukulaisista ta tiijuššin , mistä tullah miun vepšäläisetki juuret .
Šulhasen Maksimovien ta Mošnikovien šuvut ollah Aunukšen Karjalašta – Kotkatjärveštä .Myö kävimä šinne häijen kynnykšellä : pakasima šukulaisien kera , keräsimä valokuvie , tiijuštima mimmosina ihmisinä oltih ämmöt ta ukot , mimmoni kohtalo heilä oli .Meijän eteh nousi kyšymykšie , kumpasih nyt pitäy eččie vaštaukšie .
Juhlaseremonijašša puu šeiso šalin kešeššä , še veti huomijuo ta nošti monilla vierahilla haluo niise tutkie omua šukuo , vet’ ymmärtämini , ken šie olet omašša šuvušša ta täššä muailmašša antau lisyä tukie elämäššä ta šuurta elämäntarkotušta !
Šukupuu, kumpani yhisti kakši perehtä
Karelian Proper
New written karelian