Texts
Return to list | edit | delete | Create a new | Statistics | ? Help
Galina Baburova. Hän oli vepsänkeližen literaturan augonpanijan
Galina Baburova
Hän oli vepsänkeližen literaturan augonpanijan
Veps
New written Veps
Tetab
vepsläine runoilii Nikolai Abramov läksi elospäi 23. vilukud 2016. vodel , päiväs ičeze jubilejahasai .Kaik nene kümne vot Podporožjen keskuzkirjištos tehtas vähäluguižen rahvahan surele runoilijale omištadud festival’ .
Mušttas Nikolajad Karjalas-ki , kus hän eli da radoi äi vozid .Ezmäi hän oli toimitajan "Kodima "-lehteses , jäl’gmäižid vozid radoi Karjalan rahvahaližes kirjištos .
Täl vodel Karjalan rahvahaližes kirjištos tehtihe vastuz , miččel pagištihe Nikolajan sädandrados erazvuiččiš polišpäi .Ved’ Nikolai oli lahjakahan mehen ei vaiše runotuses .
– Jumal andoi hänele voimusen erazvuiččikš ozutada ičeze lahjavut : runotuses , fotokuvadandas , kirjutandas lehtesehe , – sanub Nikolajan ühtesradnik Nina Zaiceva .
Vastusen adivod kacuiba Nikolajan fotoid da kundliba hänen runoid , miččid hän iče ehti kuvata videole ei edahan ičeze surmahasai .
Toižel päiväl jäl’ges necidä vastust Podporožjen kirjištos mäni Nikolai Abramovale omištadud festival’ .Sen programm oli lujas bohat : lekcijad , vastused ristituidenke , kudambad oliba tärktad Nikolajan elos .Kirjišton ezizalas oli riputadud "Abramovan pirdaižid " -konkursan ühtnikoiden fotokuvad .Ristituile oli taritud kodiš lugeda Nikolai Abramovan runoid da tehta fotokuvid , miččed kožuižiba runoiden rivihe .Konkursan ühthevedod mugažo tehtihe necil festivalil .
Johtutesidenke Nikolai Abramovas ezini hänen vanhemb sizar’ Taisia .Hän starinoiči äi melentartušt heiden Nikolajanke laps’aigan polhe .
Taisia da Nikolai ei kävunugoi lapsiden päivkodihe .Heid kazvati kaks’ babad .Hö starinoičiba lapsile sarnoid , a mamoi navedi lugeda runoid .Nikolai aigoiš openzihe lugemaha iče .Laps’aigaspäi hö pagižiba kut vepsäks , muga venäks-ki .
– Elim hüvin . Kazvatajad ostliba meile bobaižid , čomid sädoid , kirjoid .Toskeliba niid Leningradaspäi .Sigä mamal oliba heimolaižed .Meile Kol’anke oli mel’he ezineda seištes ištimel – pajatim pajoid , – johtutab Taisia .– Siloi küläs oli äi lapsid , mö vändim erazvuiččihe vändoihe , kezal kül’bimoiš järves da joges . Konz tegimoiš vanhembikš , kazvatajad otliba meid kerdale heinäntegole .Kaikuččen voden ajelim Lenigradaha pojezdal , kerdal eskai lendimel lendim Vidlaspäi .
Pened Taisia da Nikolai navediba ehtoid , konz mam žari kogonaižen rehtlän semnid , a tatoi avaiži muzikad .Siloi lapsed kundliba sidä venudes päčil .Kut sanui Taisia , hänen vellen armhan pajon oli "Pit’kha nägen Karjalad unes ".Sid’ Karjalan ma tegihe Nikolajan täht tozi toižeks kodimaks .
Laps’aigal Nikolai lujas navedi pirtta i tahtoi tehtas taidehpirdajaks .Augotižškolan hän lopi Ladvas , sid’ nel’l’ vot openzihe Kurbas da kaks’ vot – Vidlas .
Školan jäl’ghe Nikolai päzui opendamhas Piterin topografižehe opištoho .Konz hänele oli 19 vot , putui bol’nicaha , kut hän iče saneli – "ozatoman armastusen tagut ".Sikš sid’ kogonaižen elon hän vähäižen rambiči .Siloi Nikolai zavodi-ki kirjutada runoid venäks .
– Hänel oli sur’ armastuz – Nadežda Jakovleva . Kol’a omišti hänele ičeze "Nevozvratnost’ "-runon .Minä kaičen kirjeižid , miččed hö kirjuteliba toine toižele .Toižen Kol’an armastusen oli Bella-neižne Ladvaspäi .Hänele Kol’a kirjuti 40 runod !Ned oma lehtikos , miččes om kirjutadud mugažo "Ku minä kolen , pakičen antta se Bellale ".
Armastuz jäti suren jäl’gen Nikolajan henghe .Kerdan hän sanui , miše runoid voib kirjutada vaiše ristit ranitud hengenke .
Nikolai Abramov tegihe tetabaks Karjalas , no ičeze sädandradon hän zavodi Podporožjes .Vodel 1989 opendusen jäl’ghe hän sai fotokuvadajan kvalifikacijan , 1990.-vozil radoi toimitajan "Svirskije ogni " -lehteses .Nikolai oli heittud radolpäi siš , miše laskendata ajoi varjoičemha Vauktad pertid (Sovetoiden pertid ).Sid’ hän zavodi rata Karjalas ezmäi "Prionežje "-, sid’ "Kodima "-lehteses .
Nina Zaiceva starinoiči , kut hö Zinaida Strogalščikovanke tedištiba , miše om vepsläine mužik , kudamb kirjutab runoid , da tundištihe hänenke .Nikolai ezmäi lujas varaiži kirjutada vepsäks , sanui , miše hänel ei olend mugošt mahtod .Ičeze ezmäižen vepsänkeližen runon – "Uz’ voz’ ", miččes om vaiše nel’l’ rived – Nikolai kirjuti kogonaižen ön !Nina Grigorjevna starinoiči , kut hö kahten kesken keraziba "Kodimad " i händast čudutoiti , kut kebnas Nikolai mahtoi kerata ümbri ičesaze ani erazvuiččid eri-igäižid ristituid .
Festivalil Nikolajas starinoiči hänen sebranik , kino-ohjandai Dmitrii Gridin .Nikolai Abramov oli kuvatud erasiš Gridinan fil’moiš .Üks’ fil’moišpäi – "Moloko ", – miččes Nikolai oli pähengen , oli ozutadud festivalil .Nece fil’m starinoičeb ühtes päiväs vepsläižen lehtezmehen elospäi , hänen armastuses kodimaha , kanzaha .
– Olim adivoiš Kol’an mamanno , hän oli hüvän ristitun . Minei oli mel’he olda heiden kodiš .Maria Aleksejevna lujas armasti ičeze poigad , kaiken varasti händast .Kol’a-ki kaiken rigehti joudajal aigal mamannoks .Tuleskeli Taisia-sizarennoks-ki matkan aigan kodikülähä , – johtuti Dmitrii .
– Kol’al ei olend ičeze kanzad . Hänen kanzan oliba minun lapsed da vunukad .Hän armasti heid , kaiken toskeli tomaižid .Mäni kümne vot hänen surmaspäi , minä lujas tusttun händast , – sanub Taisia .
Nikolai Abramovas sanutas , miše hän oli ühten parahimišpäi Karjalan runoilijoišpäi .Vähäluguižen rahvahan täht Nikolai oli tozi suren runoilijan , kudamb tegihe vepsänkeližen literaturan augonpanijaks .Okha kaičese mušt hänes igän !
Hän oli vepsänkeližen literaturan augonpanijan
Veps
New written Veps