Texts
Return to list | edit | delete | Create a new | Statistics | ? Help
Paušin Šan’uu. Lapsennu opastettu – ku kiveh kirjutettu
Paušin Šan’uu
Lapsennu opastettu – ku kiveh kirjutettu
Ludian
New written Ludian
Tuhukuun
21. päivän muailmas pidetäh Rahvahidenkeskehište muamankielen päiväd .Täl vuodel puutuui pruaznuita tädä pruaznikkad omas kodoilas – Priäžäs , gu minud kučuttih pidämäh lugendad Priäžän etnokul’tuurankeskuččah .Suobattoin sinne kerävytäh paginklubah .Tälgi päiväl kerävyi läs 20 mieste .Ende lugendad minä hyväl mielel andoi Kielen , literatuuran da hištorijan instituutan kiitandkird’aižen , kudai sai Tatjana Korz’uk .Häi otti vuitin Hengen vägi muaman kieles –marafonah i työndi instituutah kird’aižed , kudambad oldih kird’utettu kard’alan kielel .Nämäd kird’aižed kird’utti muamaleh hänen diäd’ – Andrei Dolgojev .
Omas lugendas sanelin omamualaižile omas ičes , lyydiläižis , omas tutkindas , omas ruados , i tiettav VepKar -korpusas .Moned ei tiedäny , gu nygyy VepKar on rouno gu elektronnuoi bibliotek , kus saua löytä kard’alan - da vepsänkieližed teksad monil dialektoil , a nel’l’ vuotte tagaperin VepKar-korpussah oli azuttu Iänenkorpus .Kai tekstad , kudambad siga korpusas oldah kiändetty i ned suau kuundelta .Myö yhtes kuundelimme ozuteksed Priäžän da Honganualan paginluadul .Zualas ištui yhten informantan heimolaine , i konz häi kuuli oman t’outoin paginad , kyynäled tuldih hänen silmih , gu t’outoih ei ole d’o elos , no hänen iän’ nygyy suau kuulta .
Žiälikš , ga kard’alankielte pagižijoin miär hubenou vuodes vuodeh : tämä vahnembi polvi , ken pagiži muamankielel lapsenaigaspiäi , hävidäy .Omas lugendas äi kierdad sanoin kaikiile , gu meile , kard’alaižile , pidäy el’getä , gu eläiš kard’alan kieli libo ei kai rippuu vaigu meis .Meile pidäy nygyy vard’oita , midä suaimme ezi-ižoil i sid andada meiden tiedod dälgeläižile , i gu opastamme omid lapsid kieleh , sid kieli rubedau elämäh .
Sil päiväl Priäžäh oli tulnu vie Inga Nikolajevna Gurilova , kudai saneli kuulužan kard’alankieližen runonikan Vladimir Brendojevan luadindois .Myö voimme kuundelta hänen iänte , čomal kard’alan kielel kird’utetud runod .Lugendan aigal minägi lugin muanmiehile omid runoid lyydikš .A zualus oli Aleksandr Saveljev , kudai mugažo lugi kaikile omid runoid livvikse .Oma muamankiel’ kuului sil päiväl monil paginluaduil .
Lugendan dälges sanelin kaikile "Lapsennu opastettu – ku kiveh kirjutettu " -marafonas , kudai pidetäh meiden instituutas täl vuodel .Minä taričin kaikiile sanelta minule muamankielel lyhydän starinan omas lapsuzaigas , libo midätaht omas elaigas .I ozaks , kuuz’ naiste tuldih pagizuttamah !D’ogahine pagiži omal paginluadul , minä kuudelin i ihaštuin , kui čomasti hyö pagištah , kui hyvin muštetah midä oli amu , kui armastetah omid d’uurid da omad kielte .Tahtoh kiitädä heid omis starinois muamankielel .Teravas nämäd kieliozuteksed mugažo oldah VepKar –korpusas .
Lapsennu opastettu – ku kiveh kirjutettu
Ludian
New written Ludian