Texts
Return to list | edit | delete | Create a new | Statistics | ? Help
Aleksandra Lesonen. Kuitin kala onnistu
Aleksandra Lesonen
Kuitin kala onnistu
Karelian Proper
New written karelian
Vihmasešta ta
tuulisešta šiäštä huolimatta huomenekšella 16 joukkuo eri-ikäsistä kalaštajista läksi Kuittijärven pinnalla , jotta kilpailla parahan kalamiehen nimeštä .
Rannalla heitä vuotettih kyläläiset ta tapahtuman vierahat .
Ennein kilpailun alkuo Valtijollisen pienikokosien laivojen tarkaššušvirašton tarkaštaja piti ošallistujilla ohjuanta jiällä liikkumisešta .Kaikki kilpailijat šuatih muistilaput "Turvallini käyttäytymini vesistöillä ".Tämä on erityisen tärkietä keväisen šiän aikana , konša jiä hoikenou ta šiih ilmeštyy šulaimie .
Joukot kalaššettih kakši tuntie .Jokahisella joukolla oli omat kalaššuštavat ta pienet šalat .Jännitykšen lisyämisekši Kala ja Marjapojat -yrityš laški järveh kymmenen lohta .Kolmella enšimmäisellä kalaštajalla , ket onnissuttais šuaha lohi , yritykšen johtokunta lupasi merkittävät palkinnot – 30 000, 20 000 ta 10 000 rupl’ua .Tänä vuotena "onnenkala " jäi kuitenki pyytämättä .
Kilpailun voitti Tuatot ta lapšet -joukko , min pyyvvyš oli 5 kiluo 440 grammua .Toisella paikalla piäsi Ahven-joukko tulokšella 5 kiluo 400 grammua .Pronššin šai Stepanov ta kumppanit -joukko , min tuloš oli 4 kiluo 530 grammua .Šama joukko šai niise palkinnon šuurimmašta kalašta , min pivuš oli 30 šenttie .A Sever-joukko palkittih pienimmäštä kalašta , min pivuš oli vain 5,7 šenttie .
Tuomaristo erikseh merkičči kilpailun nuorimman ošallistujan , kumpani on jo pari vuotta tullun jiällä vanhempieh kera – kolmevuotisen Sem’on Ševčenkon .
Festivalin vierahat ta kyläläiset šuatih ošallistuo erilaisih karjalaisih kisoih ta perintehellisih huvitukših šekä oštua kalaherkkuja ta piiraita Kala ja Marjapojat -yritykšeltä ta karjalaisen kulttuurin Viena-šeuralta .Juhla loppu perintehellisella Kruukalla .
Kuitin kala -festivalin järještäjinä ollah Sreda-keškuš ta Vuokkiniemen Kylätalo .
Kuitin kala onnistu
Karelian Proper
New written karelian