Texts
Return to list | edit | delete | Create a new | Statistics | ? Help
Galina Baburova. Kodikeliden kaičijoiden praznik
Galina Baburova
Kodikeliden kaičijoiden praznik
Veps
New written Veps
Uhokun
jäl’gmäižel nedalil Petroskoin Suomalaiž-ugrilaižen školan openikad kirjutiba kodikeliden olimpiadad .Parahimad kodikeliden tundijad voibištelihe ičeze kesken , miše valita nenid , ked ühtneba olimpiadan regionoidenkeskeižehe etapha .
Täl vodel lidnan openikad kirjutiba olimpiadad Petroskoin skolas №3, kus anglian , francian da germanian keliden ližaks opetas suomen kel’t-ki .Edel olimpiadan kirjutandad ühtnikoiden täht škol vaumišti lahjan ičeze praznikzalas : "Petroskoi "-kargstudii eziti tulnuzile kaks’ kargud , a 6. klassan openik Polina Mihailova pajati pajon Kodimas .Školan pämez’ Ol’ga Vadimovna Murzina tervehtoiti olimpiadan ühtnikoid , sanui , miše nece om sur’ arvostuz – vastata ičeze školas parahimid kodikelen tundijoid , da toivoti openikoile satusid .Mugažo lapsile johtutadihe , miše 2026. voz’ om Venäman rahvahiden ühtmuden voz’ – se azj jonoštab kodikeliden kaičendan erilišt znamoičendad valdkundan täht .
Necil kerdal olimpiadaha ühtni 69 openikad .Nene oma 8.–11. klassoiden openikad , kudambad opendaba suomen , karjalan da vepsän kelid .Vepsläižišpäi olimpiadan kirjuti 9. klassan openik Ivan Perec .
– Meiden školas mäneb üks’ kodikelen urok nedališ 1. da 9.–11. klassoiš , koume urokad nedališ om 2.–4. klassoiš , kaks’ urokad om 5.–7. klassoiš . Nügüd’ 8., 10. da 11. klassoiš ei ole lapsid , kudambad opendaba vepsän kel’t , sikš olimpiadaha ühtni vaiše üks’ openik , – starinoiči vepsän kelen opendai Nadežda Petrova .
Olimpiadaha mülüi kümne tegendad .Ned kodviba openikan kodikelen grammatikan da vaihišton tedoid , ozutaba , kut hüvin openik el’gendab paginad .Kut sanuiba olimpiadan tegijad , se azjtego ei ole vaiše voibištelendan sija , a mugažo sija , kus kulub , eläb da kehitoitase rahvahan kel’jäl’gestuz .Olimpiadan pähenged oma lapsed , kudambiden täht kodikel’ ei ole vaiše sanad , no om mugažo eläb sido rahvahan kul’turanke da istorijanke .Olimpiad heiden täht om todesine praznik .
Olimpiadan toine , regionoidenkeskeine etap , mäneb sulakus .Sigä vägestuses voibištelesoiš "kaikid vägekahambad vägikahišpäi ".
Kodikeliden kaičijoiden praznik
Veps
New written Veps