Texts
Return to list | edit | delete | Create a new | Statistics | ? Help
Alina Gapejeva. Priäžän lapsien päivykodi täyttäy vuozii
Alina Gapejeva
Priäžän lapsien päivykodi täyttäy vuozii
Livvi
New written Livvic
Lapsele
päivykodi on kogonaine muailmu .Paiči omua kodii da perehty juuri täs lapsi opastuu pagizemah , luadimah čomua omil sormuizil .Lapsien kazvattai , kui muamo , andau lapsile rakkahuttu da lämmiä , opastau uudeh .
"Raduga " rubei ruadamah Priäžäs 7. sulakuudu 1986, sinä piän otettih vastah enzimäzii kazvattiloi . Senaigazennu mustonnu päivykoin seinäs on kivilaudaine , kuduah on kirjutettu : "On nostettu kommunistutalgohruavonnu ".Tänäpäi Raduga-päivykodi on nygyaigaine da suuri laitos , kuduas on yheksä eri-igästy lapsien joukkuo .Lapset on sijoitettu kahteh taloih Melentjevan da Petroskoin uuličoil .
Päivykoin ruadajien joukos erillizel sijal on Galina Jartseva , häi ruadau meedikkualal 58 vuottu .Galina Dmitrijevna mustelou endizii aigoi , konzu jaslit oldih vahnas puutalois :
– Halgopäčit , vezi tuodavannu , käymäl – loukko latties …Mustan , kui astieloi pestih tuazois .
Galina Dmitrijevna ielleh huoliu kazvattiloin tervehytty .Häi valmistau syömislistan , tarkastau puhtahuttu , valvou por’adnua .
Kazvata lapsi kuni on poikki laučas
Raduga-päivykodih otetah vuvven suurii lapsii .Lapset suajah tiä monipuolizii tiedoloi da opastutah eri neroloih : voimistellah , pajatetah da tansitah , piirustetah , opastutah karjalan kieleh , kuunnellah suarnoi karjalakse da valmistetah konsertoi vahnembih niškoi .
– Omas ruavos myö äijän huomivuo kiinnitämmö vahnembihgi . Ku meil olis ylen hyvä väli muamah , kudai tavan mugah enzimäzenny tuou lapsen päivykodih da on huoles lapsen periä .Meil pidäy maltua lauhtuttua vahnembii , lapsetgi sen ellendetäh , sanou vahnin kazvattai Jelena Sokolova , kudai ruadau lapsien kel kolmekymmen vuottu .
Lapsi ainos on silmäl piettävy , häi aivin juoksou kunnetahto da ruadau midägi .Kazvattajalhäi on vaigu kaksi jalgua da kaksi kätty .
Lapsien päivykois ongi oma joukko niilöih lapsih niškoi , kel on heikko tervehys .Net lapset tarvitah erinomastu huomivuo da alallistu huoldu .Lapsien kel pietäh heile pättäviä voimisteluu .Sih ruadoh pidäy tirpandua .Moizet lapset kehitytäh hillembäh , migu heijän kel yhty vuottu olijat tervehet lapset .Ongo hyviä mieldy kazvattajal , konzu lapsi ozuttau , ku maltau toizien jyttyöh šuorivuo , syvvä iče .
Elaijan uuzi porras
"Radugan " vahnimat kazvatit jo täytty vägie valmistutah školah .Hyö opastutah matemaatiekkah , geometrieh da muantiedoh , maltetah ruadua tiedokonehel .Kaikis aktiivizembat lapset yhtytäh kilboih – piiris , Karjalas da Ven’al piettävih .
Priäžän päivykoin ruadajat yhtytäh ammattikilboih omua korgiedu ruadoneruo ozuttajen .Vaste ei ammui Karjalan lapsien kazvattai 2026 -kilvas priäžäläine kazvattai Jekaterina Žitkova ylen hyvin ozutti omua iččie da piäzi toizele sijale .
Setämä vuozi tagaperin paivykoin perustal oli luajittu tansijoukko "Devčata . Ru ", kuduah kuulutah laitoksen ruadajat .Joukon ohjuajakse rodih endine päivykoin johtai Jelena Avdejeva , kudai äijän vuottu ruadoi detsavus .Aktiivizet da nerokkahat naizet löytäh aigua harjoittelemah tansiloi da puaksuh ezitytäh Priäžän piirin kylis .Kaččojat aivin hyvin otetah heidy vastah .
Nellänkymmenen vuvven pitky taival
Priäžän lapsien päivykois ruadau 63 hengie .Piälikönny on Anastasija Hl’amova .Kollektiivas on meedikkualan ruadajua , opastajua da kazvattajua , kuduat elostetah da sebäilläh , ongi paginterapevtua , kuduat opastetah lapsii hyvin da oigieh pagizemah .Keittäjät , kuduat keitetäh syvvä , heijän keitettylöin magieloin syömizien duuhu tunduu päivykoin joga čupus .Ku sydämes da pihal olis mugažu da čoma kaččuo , ruatah pihan kabrastajat da raudusepät .
Nelläskymmenes vuvves lapsien päivykoispäi školah harpai kaksi tuhattu lastu .Tiä mustetah da suvaijah kaikkii omii kazvattiloi .Heijän joukos on tundiettuloi artistoi da Priäžän piirin kuulužii herroi .Ga erinomah hyö mustellah niidy , ken nygöi on omua muadu puolistamas .
– Mustammo jogahizen , ylbeilemmö heijän rohkevuttu da uskommo , ku hyö tullah kodih , sanotah kazvattajat .
Myö kiitämmö kaikkii , ket 40 vuottu astuttih tädä taivaldu – maltajii opastajii , huolehtijoi kazvattajii , vahnembii , kuduat joga huondestu tuodih päivykodih oma rakas lapsi , sanotah Raduga-päivykoin ruadajat .
Anna Raduga-Ukonvemmel iellehgi andau hyviä mieldy da elaigah pättäviä neruo kazvajale polvele .
Priäžän lapsien päivykodi täyttäy vuozii
Livvi
New written Livvic
–
"