Texts
Return to list | edit | delete | Create a new | Statistics | ? Help
Ol’ga Ogneva. Kummua näemmö jo 20 vuottu
Ol’ga Ogneva
Kummua näemmö jo 20 vuottu
Livvi
New written Livvic
Tämän
teatrupruazniekan keksi vuvvennu 2006 Veškelyksen kyläkirjaston ruadai L’ubov Prisoškova .Häigi pani nimen festivualile – "Kukastu kummua ".
Veškelyksen lapsien päivykoin kazvatit oldih kaikis nuorimat artistat .Yhtes omien kazvattajien kel hyö ozutettih ven’an rahvahan Kirjavu kanaine -suarnan karjalan kielel .Lapsittah ei ole ni yhty Kukastu kummua -festivualii , sildy gu veškel’čät tahtotah , ku oma karjalan kieli eläs ielleh .
– Myö kolmanden kluasan lapsienke varustimmo suarnan "Meijän kukkine ei laula ".
Minä opastan karjalan kieldy , urokat ollah , da vie tahtommo kunnetahto mennä , ozuttua , midä myö maltammo , sanelou Veškelyksen keskiškolan karjalan kielen opastai Oksana Serebr’annikova .
Lapset toven hyvin paistih karjalakse , mi äijäl lämmitti rahvahan mieldy .
Eri vuozin Kukastu kummua -festivualih käydih teatrujoukot toizis kylispäi .Tänä vuon omii neroloi ozutettih vai veškel’čät .Rahvas nagrettih vačat kibiekse .Sergei da Marina Čaikinat yhtytäh festivualih joga vuottu .Heijän ozutukset ainos ollah aijanmugazet , ozutetah nygösty kylän elostu .Täl kerdua ozutettih , kui kylän rahvas ostetah tavarua internetlaukois
– Kyläläzil midä pidäy – halguo , höštötty , kartohkua .Net kai panin ozutukseh , sanou Sergei Čaikin .
Valentina Popova on luadinuh Mittumat kalat , moine kylygi -spektaklin .Sit mužikku lähtöy ongele , da käsköy akale lämmittiä tulendakse kylyn .Yhtelläh mies harpuau susiedah da vereksen kalan tilas tuou kuivua .Akku tazuau ukole .
– Täs minä olen kyläs jo 10 vuottu , ku tulin linnaspäi mamalluo . Ezmäine minun noumer oli ven’akse .Toizen kerran jo annettih karjalazet sanat .Sit mugai lähti .Kymmene vuottu olen täs – kymmene noumerua "Kukastu kummua " ozutin , muheloittau Valentina Popova .
Maguajale kažile hiiri suuh ei tule – veškel’čät iče keksitäh mielužua aijanviettuo .Kukastu kummua -festivuali keriäy rahvastu yhteh da auttau pidiä hengis karjalan kieldy .
Kummua näemmö jo 20 vuottu
Livvi
New written Livvic
–