Texts
Return to list | edit | delete | Create a new | Statistics | ? Help
Remšueva Nina . Muamon kylyä ei enyä ole
Remšueva Nina
Muamon kylyä ei enyä ole
Karelian Proper
New written karelian
Pohjoni Šuurijärvi -kylä
šijottu Karjalan Louhen piirissä nykysen Sosnovii-kylän pohjoispuolella .Še oli kaitasella kannakšella kahen järven – Kuušijärven ta Pohjosen Šuurenjärven – välissä .Šemmosie paikkoja šanotah uročišče-nimellä (elämätöin aloveh tahi entini elinpaikka ).
Kylän elämä ennein šotua
Kylän peruštamisajankohtua ei tiijetä tarkašti , ka miun muamon Anastasija Pakkasen šukulaiset elettih šielä jo 1800-luvun alušta lähtien .Hiän iče šynty täššä kyläššä Petrovien pereheh – tuatto P’otr Mefondjevič ta muamo Fedora Anufrijevna .
Kylän eläjät paistih karjalan kieltä .Nuapurikylih kulettih heposilla , talvella niise šukšilla .Kyläššä oli taloušrakennukšie ta leipomo , missä paissettih hyvyä leipyä , ka kauppua ei ollun – oššokšilla käytih monen kilometrin piäh niin šanotulla "34. kilometrillä ", mi šijottu nykysen Sosnovin paikalla .Šielä elettih meččätöissä ruatajat ihmiset ta toimi meččätaloušyksikkö (lestranshoz ).
Šamoin elinpaikašša toimi klubi , missä järješšettih konserttija ta tanššija , kumpasie tykättih kaikin – kuin nuoret , niin ni aikuhiset .
Vuotena 1932 kyläh peruššettih Krasnaja Zvezda (Ruškie Tähti ) -kolhosi .Kyläläiset elettih melko hyvin .Välttyäkšeh kulakiksi leimuamista hyö luovutettih kolhosih omaisuttah : lehmie , lampahie , aittoja , riihijä ta niittyjä .Kaikin ruattih kolhosissa eikä köyhyttä nähty .Eri aikoina piämiehinä toimittih Arhip Mihailovič Stepanov ta Vasilii Jeremovič Smolennikov .
Šuureh Isänmualliseh šotah šuate heposien kaččojana oli Fedora Anufrijevna Petrova , Anastasija Petrovnan muamo .Šovan jälkeh heposien kaččojana ruato Jakov Stepanov .Šuutariloina ta šatulašeppinä oltih Petrovit P’otr Mefondjevič , Anastasija Petrovnan tuatto , ta Timofei Mefondjevič , P’otrin veikko .
Talot ta niijen omistajat
Ennein Šuurta Isänmuallista šotua kyläššä oli 17 taluo .6. elokuuta 1941 koko väještö evakoitih Arhankelin alovehella . Šovan jälkeh kyläštä melkein mitänä ei jiänyn – Kiestinkin šuunnalla oli ankarie taisteluja .
Pohjosen Šuurenjärven kaikki talot šijotuttih tien varrella .Kylän ajotiellä oli leviet portahat , kumpaset piti avata ta panna kiini peräššä , jotta lehmät ei piäštäis kyläh talluamah vil’l’oja ta kašviksie .Karjalla oli oma aijattu kulkureitti .Lehmie paimenti kylän paimen .
Talot nimitettih omistajan mukah .Täššä on kylän talojen luvettelo (muistitietoloissa voit olla epätarkkukšie , šentäh kun šovan alušša Anastasija Petrovnalla oli vain 12 vuotta ):
1. Onttol’an talo – Art’om Stepanov . Naini Uljana . Lapšet : Art’om , F’okla , Uljana .
2. Mehvol’an talo – Mefondii Petrov . Naini Irina Jakovlevna . Lapšet : Pekka , Timofei , Marija , Kiprijan , Aleksei . Mefondin kuoloman jälkeh taluo šanottih Petrol’an talo – P’otr Petrov . Naini Fedora Anufrijevna (Jelettijärveštä ). Lapšet : Mitrofan , Anastasija , Marija , Ivan , Ira , Jefim , Jevdokija , Fedosja (kolme viimeistä kuoli lapšena ). Timofei šiitä eli erikseh .Marija mäni miehellä Vasilii Kuikinin kera ta šiirty elämäh Pinkošalmeh .Kiprijan ta Aleksei kuoltih Kanšalaisšovan jälkeh , perehie heilä ei ollun .Täštä pereheštä niin tarkkah , šentäh kun Anastasija Pakkanen šielä šynty ta eli vanhempieh kera .
3. Miikkul’an tahi Mikkol’an talo – Nikolai tahi Mikko Stepanov . Naini Oksenja . Lapšet : Arhip (naini Ohkemja , Larin tytär ), Pavel (naini Uljana ), Timofei (naini Katerina Jelettijärveštä ), Ivan (naini Fedora ; lapšet : Helmi , Oksenja ).
4. Arhipan talo – Arhip Stepanov .
5. Palakan talo – Palaka ili Pelageja Stepanova . Mieheštä ei ole tietuo . Tytär Fedora , hänen mieheštä niise ei ole tietuo . Šovan jälkeh Fedoralla šynty lapšie : Raija , Lena , Kol’a ).
6. Oleksel’an talo – Aleksei Stepanov . Naisešta ei ole tietuo . Lapšet : Anni , Uljana .
7. Timol’an talo – Timofei Petrov . Naini Aleksandra Jelisejevna . Heilä ei ollun lapšie . Timofei kuoli evakošša Arhankelin alovehella .Aleksandra , kummaista kučuttih tuatonnimen mukah Jelesjevnakši , myöšty kyläh ta pitälti eli P’otr Mefondjevičin pereheššä , kumpani oli hänen kuolluon miehen veikko .Vanhana ollešša Jelesjevna eli Vojačun vanhojenkojissa , šielä naini hauvattihki .
8. Vassel’an talo – Vasilii Smolennikov . Naini Marija Mihailovna . Lapšet : Ivan , Sofja , Ol’ga , Viktor , Nast’a , Dus’a .
9. Pahomovnan talo – Anastasija Pahomovna Petrova . Vasilii-mieš oli karkotettu , häneštä ei ole tietuo . Lapšet : Aili , Fedossa , Matti , Kriikku , Trihvana , Huotari .
10. Kus’mal’an talo – Kuz’ma Stepanov . Naini Agafja . Lapšet : Fedosja ta toiset .
11. Larin talo – Lari Smolennikov . Hänellä oli kakši naista – enšimmäini oli Agafja , a toisen nimi ei jiänyn muistih . Kaikkieštah pereheššä oli 12 lašta : Okahvi , Natali , Uljana , Šimana ta toiset .
12. Anttil’an talo – Andrei Stepanov . Naini Arhippina . Poika Pavel .
13. Trihvol’an talo – Trifon Stepanov . Naisen nimi ei jiänyn muistih . Lapšet : Agafja , Natali . Tytär Natali oli miinojen raivuaja , hiän kuatu šovan jälkeh miinojen raivaukšešša tiellä Tunkutjärvellä , Kuoloman vuaralla .
14. Ristimuamon talo – naini oli monen lapšen ristimuamo Anastasija Petrovnan pereheššä , ka häneštä ei jiänyn tietoja . Eli yksin .
15. Potahvol’an talo – Potafei Stepanov . Hänellä oli kakši čikkuo : Arhippina ta Anastasija .
Kiviniemellä eli vielä kakši perehtä :
16. Onton talo – voit olla , jotta šen isäntä oli Andrei . Naisen nimi ei jiänyn muistih . Pereheššä oli monta lašta .
17. Miikkul’an talo – Nikolai (Miikkula ). Naini Fedosja Dmitrijevna . Lapšet : kolme kuoli pieninä , vielä Vera , Uljana , Olga .
Kylä oli perspektiivitöin ta nuoret muutettih šieltä toisih paikkoih .Vähitellen aikuhiset eläjät niise lähettih pois .Monet šiirryttih rakentujah Sosnovii-pos’olkah .Ajan mittah kylä oli lisätty perspektiivittömien kylien listah ta likvitoitu vuotena 1972.Nykyjäh Pohjosen Šuurenjärven kylän paikalla on niittyjä .
Muamon kylyä ei enyä ole
Karelian Proper
New written karelian
1.
16.